ନୂଆଦିଲ୍ଲୀ,୯।୫: ଟୟୋଟା ଗ୍ରୁପ ଅଫ କମ୍ପାନୀ ଏବଂ ଏହାର ଆନୁଷଙ୍ଗିକ କମ୍ପାନୀ ଟିଆଇଇଆଇ ମିଳିତ ଭାବେ କର୍ନାଟକରେ ୪,୮୦୦ କୋଟି ଟଙ୍କା ନିବେଶ କରିବେ। ଏ ନେଇ କର୍ନାଟକ ସରକାରଙ୍କ ସହ ଏକ ଏମ୍ଓୟୁ ନିକଟରେ ସ୍ବାକ୍ଷରିତ ହୋଇଯାଇଛି। କାର୍ବନ ଡାଇଅକ୍ସାଇଡ୍ ନିର୍ଗମନ କମାଇବା ସହ ବିଦ୍ୟୁତୀକରଣ ଏବଂ ସବୁଜ ପ୍ରଯୁକ୍ତିବିଦ୍ୟାକୁ ଗୁରୁତ୍ୱାରୋପ ଲାଗି ଏହି ବୁଝାମଣା ହୋଇଛି। ମେକ ଇନ୍ ଇଣ୍ଡିଆ କାର୍ଯ୍ୟକ୍ରମକୁ ଦେଶରେ ଆଗେଇ ନେବା ପାଇଁ ଟୟୋଟା କିର୍ଲୋସ୍କର ମୋଟର ଏବଂ ଟୟୋଟା କିର୍ଲୋସ୍କର ଅଟୋ ପାର୍ଟସ ପକ୍ଷରୁ ମଧ୍ୟ ୪,୧୦୦ କୋଟି ଟଙ୍କା ବିନିଯୋଗ ପାଇଁ କର୍ନାଟକ ସରକାରଙ୍କ ସହ ଏକ ଚୁକ୍ତିନାମା ହୋଇଛି। ଏହି ପରିପ୍ରେକ୍ଷୀରେ କର୍ନାଟକ ମୁଖ୍ୟମନ୍ତ୍ରୀ ବାସଭରାଜ ବୋମାଇ ଏବଂ ଟୟୋଟା କିର୍ଲୋସ୍କର ମୋଟର ଉପାଧ୍ୟକ୍ଷ ବିକ୍ରମ.ଏସ. କିର୍ଲୋସ୍କରଙ୍କ ମଧ୍ୟରେ ଏକ ଏମଓୟୁ ବିନିମୟ ହୋଇଯାଇଛି। ଅନ୍ୟମାନଙ୍କ ମଧ୍ୟରେ କର୍ନାଟକ ବୃହତ୍ ଏବଂ ମଧ୍ୟମ ଶିଳ୍ପମନ୍ତ୍ରୀ ଡକ୍ଟର ମୁରୁଗେଶ. ଆର୍.ନିରାନି,କର୍ନାଟକ ସରକାରଙ୍କ ମୁଖ୍ୟ ଶାସନ ସଚିବ, ରବି.କୁମାର ପ୍ରମୁଖ ଉପସ୍ଥିତ ଥିଲେ। ଏହି ଅବସରରେ କର୍ନାଟକ ମୁଖ୍ୟମନ୍ତ୍ରୀ ବାସଭରାଜ ବୋମାଇ କହିଛନ୍ତି, ଆମର ଲକ୍ଷ୍ୟ ହେଉଛି ଏକବିଂଶ ଶତାବ୍ଦୀର ଶିଳ୍ପାଞ୍ଚଳ ଏବଂ କରିଡର ନିର୍ମାଣ କରିବା। ନିରନ୍ତର ବିକାଶ ପାଇଁ ଏକ ପ୍ରତିବଦ୍ଧତା ତଥା ଦେଶର ପ୍ରଗତିରେ ସହଯୋଗ କରୁଥିବା ଏକ ରାଜ୍ୟ ଭାବରେ ଆମେ କର୍ନାଟକକୁ ଆମର ଏକ ବିଶ୍ୱ ଯୋଗାଣ-ଶୃଙ୍ଖଳା ଏବଂ ଉତ୍ପାଦନ ହବ୍ କରିବାକୁ ଚାହୁଁଛୁ। ଟୟୋଟା ଗ୍ରୁପ ଅଫ କମ୍ପାନୀଗୁଡିକ ସହିତ ଏମଓୟୁ ଏହି କ୍ଷେତ୍ରରେ ଏକ ବଡ ପଦକ୍ଷେପ। ସେହିଭଳି ଟୟୋଟା କିର୍ଲୋସ୍କର ମୋଟର ଉପାଧ୍ୟକ୍ଷ ବିକ୍ରମ ଏସ. କିର୍ଲୋସ୍କର କହିଛନ୍ତି, ମେକ ଇନ୍ ଇଣ୍ଡିଆ ସହିତ ଘରୋଇ ଉତ୍ପାଦନର ବିଦ୍ୟୁତୀକରଣର ଗତି ବଢ଼ାଇବା ପାଇଁ ଟୟୋଟା ପ୍ରତିଶ୍ରୁତିବଦ୍ଧ। କର୍ନାଟକ ସରକାରଙ୍କ ସହ ଏହି ଏମଓୟୁ ବେଶ୍ ଗୁରୁତ୍ୱପୂର୍ଣ୍ଣ ସାବ୍ୟସ୍ତ ହେବ।