ଭୁବନେଶ୍ୱର,୩୦।୫(ବ୍ୟୁରୋ): ଜଣେ ବ୍ୟକ୍ତିଙ୍କ ପାଖରୁ ‘ଫୋନ୍ପେ’ ଜରିଆରେ ୧୦ ହଜାର ଟଙ୍କା ଲାଞ୍ଚ ନେଇ ବିଦ୍ୟୁତ୍ ବିତରଣ ସଂସ୍ଥା ଟିପିସିଓଡିଏଲ୍ର ଜଣେ କର୍ମଚାରୀ ଭିଜିଲାନ୍ସ ଦ୍ୱାରା ସୋମବାର ଗିରଫ ହୋଇଛନ୍ତି। ସେ ହେଲେ ଏହି ସଂସ୍ଥାର ନୟାପଲ୍ଲୀସ୍ଥିତ ଗ୍ରିଭାନ୍ସ ରିଡ୍ରେସାଲ୍ ଫୋରମ୍ (ଜିଆର୍ଏଫ)ର ଅଫିସ ଆସିଷ୍ଟାଣ୍ଟ୍ ଗ୍ରେଡ୍-୩ ତରୁଣ ରଞ୍ଜନ ନାୟକ। ଏଥିସହ ଜଣେ ମହିଳା ସହଯୋଗୀ ଶୈଳଜା ମୁଦୁଲିଙ୍କୁ ମଧ୍ୟ ଗିରଫ କରାଯାଇଛି। ଏନେଇ ଭୁବନେଶ୍ୱର ଭିଜିଲାନ୍ସ ଥାନାରେ ଏକ ମାମଲା (ନଂ. ୧୪/୨୦୨୩) ରୁଜୁ କରାଯାଇ ଉଭୟଙ୍କୁ କୋର୍ଟଚାଲାଣ କରାଯାଇଛି। ତେବେ ଓଡ଼ିଶା ଭିଜିଲାନ୍ସ ଇତିହାସରେ ‘ଫୋନ୍ପେ’ରେ ଲାଞ୍ଚ ନେଇ ଧରାପଡ଼ିବା ପ୍ରଥମ ଘଟଣା ବୋଲି କୁହାଯାଉଛି। ଏଭଳି ଭାବେ ତରୁଣ ନିୟମିତ ଶୈଳଜାଙ୍କ ଦ୍ୱାରା ‘ଫୋନପେ’ରେ ଲାଞ୍ଚ ନେଇଥିବା ଭିଜିଲାନ୍ସ ସନ୍ଦେହ କରୁଛି। ତେଣୁ ଆୟ ବହିର୍ଭୂତ ସମ୍ପତ୍ତି ଠୁଳ ଦିଗକୁ ନେଇ ତରୁଣଙ୍କ ମଞ୍ଚେଶ୍ୱର ଥାନା ଅନ୍ତର୍ଗତ ପାଣ୍ଡରାସ୍ଥିତ ବାସଭବନ ଓ କେନ୍ଦ୍ରାପଡ଼ା ଜିଲାର ଚାନ୍ଦୋଳ ଗ୍ରାମସ୍ଥିତ ପୈତୃକ ଘରେ ଚଢ଼ାଉ କରାଯାଉଥିବା ଭିଜିଲାନ୍ସ ପକ୍ଷରୁ କୁହାଯାଇଛି।
ସୂଚନା ଅନୁଯାୟୀ, ଅଭିଯୋଗକାରୀ ସନ୍ଦୀପ କୁମାର ସ୍ବାଇଁ ବରଗଡ଼ ଥାନା ଅଞ୍ଚଳରେ ତାଙ୍କ ନିଜ କୋଠାରେ ପରିବାର ସହ ରହୁଛନ୍ତି। ହେଲେ ସେଠାରେ ବିଦ୍ୟୁତ୍ ସଂଯୋଗ ନ ଥିଲା। ଏଥିପାଇଁ ୨ଟି ବିଦ୍ୟୁତ ଖୁଣ୍ଟ ଓ ଟ୍ରାନ୍ସଫର୍ମରର ଆବଶ୍ୟକ ପଡ଼ିଥିଲା। ଏନେଇ ସେ କନିଷ୍ଠ ଯନ୍ତ୍ରୀଙ୍କୁ ଭେଟି ମଧ୍ୟ ସୁବିଧା ପାଇପାରି ନ ଥିଲେ। ଏ ସଂକ୍ରାନ୍ତରେ ସନ୍ଦୀପ ଏଜିଏମ୍ଙ୍କୁ ଭେଟିଥିଲେ। ଗ୍ରିଭାନ୍ସ ରିଡ୍ରେସାଲ୍ ଫୋରମ୍ରେ ଏନେଇ ଅଭିଯୋଗ କରିବା ପାଇଁ ସନ୍ଦୀପଙ୍କୁ ଏଜିଏମ୍ ପରାମର୍ଶ ଦେଇଥିଲେ। ତେବେ ଜିଆର୍ଏଫ୍ରେ କାର୍ଯ୍ୟରତ ତରୁଣ ଏନେଇ କେସ୍ ପଞ୍ଜୀକୃତ କରିବା ପାଇଁ ୧୦ ହଜାର ଟଙ୍କା ଲାଞ୍ଚ ମାଗିଥିଲେ। ରବିବାର ଶୈଳଜାଙ୍କ ଫୋନପେ ନମ୍ବରରେ ସନ୍ଦୀପ ଏହି ଟଙ୍କା ଦେଇ ଏ ସଂକ୍ରାନ୍ତରେ ଭିଜିଲାନ୍ସରେ ଅଭିଯୋଗ କରିଥିଲେ। ପୂର୍ବପ୍ରସ୍ତୁତି ଅନୁଯାୟୀ ସୋମବାର ସନ୍ଦୀପ ଗ୍ରିଭାନ୍ସ ଆପ୍ଲିକେଶନ୍ ଫର୍ମ ଗ୍ରହଣ କରିବାବେଳେ ସେଠାରେ ଛକି ରହିଥିବା ଭିଜିଲାନ୍ସ ଅଧିକାରୀମାନେ ତରୁଣଙ୍କୁ ଗିରଫ କରିଥିଲେ।