ଭୁବନେଶ୍ୱର,୭।୪: ଟିପି ସେଂଟ୍ରାଲ ଓଡ଼ିଶା ଡିଷ୍ଟ୍ରିବ୍ୟୁସନ ଲିମିଟେଡ୍ (ଟିପିସିଓଡିଏଲ୍) ପକ୍ଷରୁ ନିକଟରେ ଏକ ମେଗା ଗ୍ରାହକ ସଚେତନତା କାର୍ଯ୍ୟକ୍ରମ ‘ଆପଣଙ୍କ ମିତ୍ର,ଆପଣଙ୍କ ସାଥିରେ’ର ଶୁଭାରମ୍ଭ କରାଯାଇଛି। ଉକ୍ତ ସଚେତନତା କାର୍ଯ୍ୟକ୍ରମ ଚଳିତ ବର୍ଷ ଏପ୍ରିଲ୍୧ରୁ ୩୦ ପର୍ଯ୍ୟନ୍ତ ଜାରି ରହିବ। ବିଶେଷ କରି ଭୁବନେଶ୍ୱର ଓ କଟକର ଅଗ୍ରଣୀ ହାଉସିଂ ସୋସାଇଟିର ଆବାସିକ କଲ୍ୟାଣ ସଂଘ (ଆର୍ଡବ୍ଲୁଏ)ର ବିଭିନ୍ନ ସଦସ୍ୟ ଓ ୨୦ ବରିଷ୍ଠ ନାଗରିକଙ୍କ ଉପସ୍ଥିତିରେ ଟିପିସିଓଡିଏଲ୍ର ସିଇଓ ଏମ୍ ସେନବାଗମ ଉକ୍ତ ଅଭିଯାନକୁ ଉଦଘାଟନ କରିଛନ୍ତି। ଏହି ପରିପ୍ରେକ୍ଷୀରେ ଆବାସିକ କଲ୍ୟାଣ ସଂଘର ସଦସ୍ୟମାନେ କଂପାନିର କେନ୍ଦ୍ରୀୟ ବିଦ୍ୟୁତ ବ୍ୟବସ୍ଥା ନିୟନ୍ତ୍ରଣ ବ୍ୟବସ୍ଥା, କଲ୍ ସେଂଟର ଓ ଗ୍ରାହକ ସେବା କେନ୍ଦ୍ରକୁ ବୁଲି ଦେଖିବା ସହ ଗ୍ରାହକମାନଙ୍କୁ ଉତମ ସେବା ଯୋଗାଇବା ଏବଂ ଗ୍ରାହକମାନଙ୍କ ସାମଗ୍ରିକ ଅନୁଭୂତିରେ ଉନ୍ନତି ଆଣିବା ଲାଗି ପ୍ରଯୁକ୍ତିକୁ କଂପାନି କିଭଳି ବ୍ୟବହାର କରୁଛି, ତା’ର ପ୍ରଥମ ଅନୁଭୂତି ପାଇଥିଲେ।
ଏ ସମ୍ପର୍କରେ ଟିପିସିଓଡିଏଲ୍ର ସିଇଓ ଏମ୍.ସେନବାଗମ କହିଛନ୍ତି, ଆମ ଗ୍ରାହକମାନଙ୍କୁ ଶ୍ରେଷ୍ଠ ସେବା ପ୍ରଦାନ କରିବା ଉପରେ ଆମେ ବିଶ୍ୱାସ କରୁଛୁ। ଭରସାଯୋଗ୍ୟ ବିଦ୍ୟୁତ ଯୋଗାଣ ସହ ଗ୍ରାହକ ସୁବିଧାସୁଯୋଗ ଏବଂ ସନ୍ତୁଷ୍ଟି ହେଉଛି ଆମର ପ୍ରାଥମିକତା। ସେହି ଦିଗରେ ଆମେ ବହୁ ସଂଖ୍ୟକ ପଦକ୍ଷେପ ଗ୍ରହଣ କରିଛୁ। ଗ୍ରାହକମାନେ ଏହି ସବୁ ସୁବିଧା ବିଷୟରେ ନିଶ୍ଚିତ ରୂପେ ଜାଣିବା ଓ ତାହାର ସମ୍ପୂର୍ଣ୍ଣ ଲାଭ ଉଠାଇବା ଦରକାର।ସେହିଭଳି ଏହି ଗ୍ରାହକ ସଚେତନତା ମାସରେ ଟିପିସିଓଡିଏଲ୍ ଉଭୟ ଡିଜିଟାଲ୍ ଓ ପାରମ୍ପରିକ ସମେତ ବିଭିନ୍ନ ମିଡିଆ ପ୍ଲାଟଫର୍ମ ଏବଂ ବିଟିଏଲ୍ କାର୍ଯ୍ୟକ୍ରମକୁ ବ୍ୟବହାର କରି ଗ୍ରାହକମାନଙ୍କ ଲାଗି କଂପାନି ଗ୍ରହଣ କରିଥିବା ବିଭିନ୍ନ ପଦକ୍ଷେପ ଯଥା କେନ୍ଦ୍ରୀୟ କଲ୍ ସେଂଟର, ସବୁ ପ୍ରକାର ପ୍ରଶ୍ନ ଏବଂ ବିଲ୍ ସମସ୍ୟାର ସମାଧାନ ଲାଗି ଦେୟମୁକ୍ତ ନମ୍ବର, ହ୍ବାଟସ୍ଆପ୍ରେ ବିଲ୍, ଗ୍ରାହକଙ୍କ ସବୁ ପ୍ରକାର ଆବଶ୍ୟକତା ଲାଗି ଏକକ ସମାଧାନ ମିତ୍ର ଆପ୍, ଅନ୍ଲାଇନ୍ ବିଲ୍ ପେମେଂଟ୍, ଗ୍ରାମୀଣ ଗ୍ରାହକଙ୍କ ସୁବିଧା ଲାଗି ବିଦ୍ୟୁତ ସେବା କେନ୍ଦ୍ର ଆଦି ବିଷୟରେ ଗ୍ରାହକଙ୍କୁ ସୂଚିତ କରିବ। ଏହି ଅବସରରେ ଉପସ୍ଥିତ ଆବାସିକ କଲ୍ୟାଣ ସଂଘର ସଦସ୍ୟମାନେ ଟିପିସିଓଡିଏଲ୍ର ଉଦ୍ୟମକୁ ପ୍ରଶଂସା କରିଥିଲେ ଏବଂ ଗ୍ରାହକ ମିତବ୍ୟୟୀ ସୁବିଧାସୁଯୋଗଗୁଡ଼ିକ ବିଷୟରେ ଜାଣିବା ପରେ ସେମାନେ ବଡ଼ ଧରଣରେ ଉପକୃତ ହେବେ ବୋଲି ସେମାନେ ସହମତ ହୋଇଥିଲେ।