ନୂଆଦିଲ୍ଲୀ: ଦେଶର ୧୦ ଶ୍ରମିକ ସଙ୍ଗଠନଗୁଡିକ ପକ୍ଷରୁ ଚଳିତ ମାସ ୨୬ରେ ଧର୍ମଘଟ ଡାକରା ଦିଆଯାଇଛି। ଏ ନେଇ ସଙ୍ଗଠନଗୁଡିକ ପକ୍ଷରୁ ମଙ୍ଗଳବାର ସୂଚନା ଦିଆଯାଇଛି। ସେହିଭଳି ଆସନ୍ତା ସପ୍ତାହରେ କୃଷକମାନେ ୨ ଦିନିଆ ଧର୍ମଘଟକୁ ଓହ୍ଲାଇବେ। ଏହି ଧର୍ମଘଟକୁ ମଧ୍ୟ ଶ୍ରମିକ ସଙ୍ଗଠନଗୁଡିକ ସମର୍ଥନ କରିବେ ବୋଲି ଜଣାପଡିଛି। ସୋମବାର କେନ୍ଦ୍ରୀୟ ଶ୍ରମିକ ସଙ୍ଗଠନଗୁଡିକ ମିଳିତ ପ୍ଲାଟଫର୍ମର ବୈଠକ ଭର୍ଚୁଆଲ ଭାବେ ଅନୁଷ୍ଠିତ ହୋଇଥିଲା। ଏହି ପ୍ଲାଟଫର୍ମରେ ଆଇଏନ୍ଟିୟୁସି, ଏଆଇଟିୟୁସି, ଏଚ୍ଏମ୍ଏସ୍, ସିଆଇଟିୟୁ, ଏଆଇୟୁଟିୟୁସି, ଟିୟୁସିସି, ସିଇଡ୍ଲ୍ୟୁଏ, ଏଆଇସିସିଟିୟୁ, ଏଲ୍ପିଏଫ୍, ୟୁଟିୟୁସି ଭଳି ସଂଘ ରହିଛନ୍ତି। କେନ୍ଦ୍ର ସରକାରଙ୍କ ଲୋକମାରଣ, ଶ୍ରମିକ ମାରଣ ଏବଂ ଜାତୀୟତା ବିରୋଧି ନୀତିକୁ ବିରୋଧ କରି ସଙ୍ଗଠନଗୁଡିକ ଏଭଳି ଧର୍ମଘଟକୁ ଓହ୍ଲାଉଥିବା କହିଛନ୍ତି। ଏଥିରେ ସମାଜର ବିଭିନ୍ନ ବର୍ଗର ଲୋକମାନେ ମଧ୍ୟ ସାମିଲ ହେବେ ବୋଲି ସଙ୍ଗଠନଗୁଡିକ ପକ୍ଷରୁ ସୂଚନା ଦିଆଯାଇଛି।