ନୂଆଦିଲ୍ଲୀ :ପାର୍ବଣଋତୁରେ ଚାଇନାକୁ ୪୦ ହଜାର କୋଟି ଟଙ୍କାର ଝଟକା ଦେବା ଲାଗି ଦେଶର ବ୍ୟବସାୟୀମାନେ ପ୍ରକ୍ରିୟା ଜାରି କରିଛନ୍ତି। ଚାଇନାରୁ ଏହି ସମୟରେ ଆମଦାନୀ କମ୍ କରିବା ଉପରେ ସର୍ବଭାରତୀୟ ବ୍ୟବସାୟୀ ମହାସଂଘ(ସିଏଆଇଟି) ଫୋକସ ରଖିଛି। ଏପ୍ରିଲରୁ ଅଗଷ୍ଟ ମଧ୍ୟରେ ଚାଇନାରୁ ଆମଦାନୀ ୨୭.୬୩% ହ୍ରାସ ହୋଇଥିବା ସରକାର ସଂସଦକୁ ଦେଇଥିବା ଡାଟାରୁ ଜଣାପଡିଛି। ଏହି ପରିପ୍ରେକ୍ଷୀରେ ସିଏଆଇଟିର ଅଧ୍ୟକ୍ଷ ବି.ସି.ଭରତିଆ କହିଛନ୍ତି ଯେ, ଚାଇନାକୁ ପାର୍ବଣରେ ପୁଣି ଥରେ ଝଟକା ଦେବା ଲାଗି ଯୋଜନା ରଖାଯାଇଛି। ପାର୍ବଣ ସମୟରେ ଚାଇନାରୁ ଆମଦାନୀକୁ କମ୍ କରିବା ଉପରେ ଏବେ ଧ୍ୟାନ ରଖାଯାଇଛି। ଦୀପାବଳି ସମେତ ଅନ୍ୟ କିଛି ପର୍ବପର୍ବାଣିରେ ଦେଶ ମଧ୍ୟରେ ପ୍ରାୟ ୪୦ ହଜାର କୋଟି ଟଙ୍କାର ଆମଦାନୀ ଭାରତକୁ ହୋଇଥାଏ। ଚଳିତ ବର୍ଷ ଏହାକୁ ବନ୍ଦ କରିବା ଲାଗି ବ୍ୟବସାୟୀ ସଂଘ ନିଷ୍ପତ୍ତି ନେଇଛି।
ସିଏଆଇଟି ପକ୍ଷରୁ ପୁଣି କୁହାଯାଇଛି, ଚାଇନା ସରକାରଙ୍କ ମୁଖପତ୍ର ଭାବେ କାମ କରୁଥିବା ଖବରକାଗଜ ଗ୍ଲୋବାଲ ଟାଇମ୍ସକୁ ଭାରତୀୟମାନେ ଉଚିତ ଜବାବ ଦେଇଛନ୍ତି। ଭାରତ ଚାଇନା ଉପରେ ଏତେ ନିର୍ଭରଶୀଳ ଯେ, ଆମଦାନୀ କମ୍ କରିପାରିବ ନାହିଁ ବୋଲି ଗ୍ଲୋବାଲ ଟାଇମ୍ସ ପକ୍ଷରୁ ଏକ ରିପୋର୍ଟରେ ଜୋର ଦିଆଯାଇଥିଲା। ହେଲେ ବର୍ତ୍ତମାନ ହେଉଥିବା ଆମଦାନୀ ହ୍ରାସ ଚାଇନାକୁ କଡା ଜବାବ ବୋଲି କୁହାଯାଉଛି। ଚାଇନା ସାମଗ୍ରୀ ବହିଷ୍କାର କରିବା ଲାଗି ସିଏଆଇଟି ପକ୍ଷରୁ ଜୁନ ୧୦ରୁ ସାରା ଦେଶରେ ଅଭିଯାନ ଆରମ୍ଭ ହୋଇଛି। ଚାଇନାର କାର୍ଯ୍ୟକଳାପରେ ଅତିଷ୍ଟ ହୋଇ ସରକାର ମଧ୍ୟ ବିଭିନ୍ନ ପଦକ୍ଷେପ ହାତକୁ ନେଇଛନ୍ତି।
ବିଦେଶୀ ସାମଗ୍ରୀ ବର୍ଜନ କରିବା ସହ ଘରୋଇ ସାମଗ୍ରୀକୁ ପ୍ରାଥମିକତା ଦେବା ଲାଗି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଦେଶବାସୀଙ୍କୁ ଆହ୍ବାନ ଦେଇଛନ୍ତି। ସରକାର ଲୋକାଲ ଫର୍ ଭୋକାଲ ଏବଂ ଆତ୍ମନିର୍ଭର ଭାରତ ଦିଗରେ ବର୍ତ୍ତମାନ ଧ୍ୟାନ ଦେଉଛନ୍ତି। ଲୋକମାନେ ମଧ୍ୟ ବିଦେଶୀ ସାମଗ୍ରୀ ବ୍ୟବହାର ପରିବର୍ତ୍ତେ ଘରୋଇ ବଜାରର ସାମଗ୍ରୀକୁ ପ୍ରାଥମିକତା ଦେବା ଲାଗି ସରକାର ଆହ୍ବାନ ଜଣାଇଛନ୍ତି। ବର୍ତ୍ତମାନ ଚାଇନାରୁ ସାମଗ୍ରୀ ଆମଦାନୀ ୨୭% କମିଥିବା ବେଳେ ଦୀପାବଳିରୁ ଏହାର ପ୍ରଭାବ ଆହୁରି ଦେଖାଯିବ ବୋଲି ସିଏଆଇଟି ପକ୍ଷରୁ ଦାବି କରାଯାଇଛି।