ଝରିଗାଁ,୨୫ା୨(ସ୍ବ.ପ୍ର.): ନବରଙ୍ଗପୁର ଜିଲା ଝରିଗାଁ ବ୍ଲକ ସଭା ଗୃହଠାରେ ଏକ ଦିବସୀୟ ପାରମ୍ପରିକ ବିହନ ମେଳା ଅନୁଷ୍ଠିତ ହୋଇଯାଇଛି। ଏହି ଅବସରରେ ଭୁବନେଶ୍ୱରରୁ ଆସିଥିବା ଆରସିଡିସି କର୍ମୀ ରାମକୃଷ୍ଣ ମହାରଣାଙ୍କ ସଭାପତିତ୍ୱରେ ଏକ ବୈଠକ ଅନୁଷ୍ଠିତ ହୋଇଥିଲା। ଏଥିରେ ମୁଖ୍ୟ ଅତିଥି ଭାବେ ବ୍ଲକ ଅଧ୍ୟକ୍ଷ ଦୁର୍ଗା ପ୍ରସାଦ ମାଝୀ, ସମ୍ମାନିତ ଅତିଥି ଭାବେ ସ୍ଥାନୀୟ ବିଡ଼ିଓ ସତ୍ୟ ନାରାୟଣ ମେହେର,କୃଷି ଅଧିକାରୀ ପ୍ରଶାନ୍ତ କୁମାର ବାଗ, ପ୍ରାଣୀ ଚିକିତ୍ସକ ସାରଦା ନାୟକ, ଫରେଷ୍ଟର ତନୁଜ କୁମାର ପରିଛା, ଜିଲ୍ଲା ପରିଷଦ ସଭ୍ୟା ଯମୁନା ଗଣ୍ଡ, ଜିଲ୍ଲା ଅତିରିକ୍ତ ମଙ୍ଗଳ ଅଧିକାରୀ ପ୍ରଫୁଲ୍ଲ କୁମାର ସେଠୀ, ଆସିଡିଏସ୍ ସୁପରଭାଇଜର ମୋହିନୀ ଭତ୍ରା, ପୁଫୁଗାଁ ସରପଞ୍ଚ, ବାଣୁଆଗୁଡା ସରପଞ୍ଚ ଲଷ୍ମୀ ପୂଜାରୀ, ସମାଜ ସେବୀ ତଥା ଆଇ ଡବ୍ଲୁ ଡି ଏସ ନିର୍ଦ୍ଦେଶକ ପରମା ପଣ୍ଡା ପ୍ରମୁଖ ଯୋଗଦେଇଥିଲେ। ବର୍ତ୍ତମାନ ଚାଷୀମାନେ ଅଧିକ ଅମଳ ଆଶା କରି ଶଙ୍କର ଜାତୀୟ ବିହନ ଏବଂ ରାସାୟନିକ ସାର ବ୍ୟବହାର କରୁଥିବାରୁ ମାଟିର ଉର୍ବରତା କମୁଛି ବୋଲି ଅତିଥିମାନେ କହିଥିଲେ। ତେଣୁ ଲୋପ ପାଇଯାଉଥିବା ବିଭିନ୍ନ କିସମର ଚାଷ ସମ୍ପର୍କରେ କହିବା ସହ ପାରମ୍ପରିକ ବିହନରେ ଜୈବିକ ସାର ପ୍ରୟୋଗ କରି ଚାଷ କରିବା ପାଇଁ ଚାଷୀ ମାନଙ୍କୁ ସଚେତନ କରିଥିଲେ। ସେହିପରି ୮ଟି ଷ୍ଟଲରେ ବିଭିନ୍ନ କିସମର ଦେଶୀ ବିହନ, ଡାଲି ଜାତୀୟ ବିହନ, ତୈଳ ଜାତୀୟ ବିହନ, ଲତା ଜାତୀୟ ବିହନ, କନ୍ଦା ଜାତୀୟ ଔଷଧ ତଥା ଖାଦ୍ୟ, ପାରମ୍ପରିକ ପିଠା ପ୍ରଦର୍ଶନ ହୋଇଥିଲା। କୋଷାଗୁମୁଡା ବ୍ଳକର ବରଷ୍ଠ ଚାଷୀ ଶଙ୍କର ପଟ୍ଟନାୟକ ପ୍ରାୟ ୪ ଶହରୁ ଉର୍ଦ୍ଧ କିସମର ଦେଶୀ ଧାନ ବିହନ ପ୍ରଦର୍ଶନ କରିଥିଲେ। ଚାଷୀ ମାନଙ୍କ ମଧ୍ୟରେ ଦେଶୀ ବିହନ ଆଦାନ ପ୍ରଦାନ କରାଯାଇଥିଲା। ଶେଷରେ ବିଭିନ୍ନ ପଞ୍ଚାୟତରୁ ଆସିଥିବା କଳାକାର ମାନଙ୍କୁ ନେଇ ସାଂକୃତିକ କାର୍ଯ୍ୟକ୍ରମ ହୋଇଥିଲା। ନବରଙ୍ଗପୁର ଜିଲା ଆର୍ସିଡିସି ପ୍ରକଳ୍ପ ସଂଯୋଜକ ଦୁଷ୍ମନ୍ତ କୁମାର ଓଝା ଧନ୍ୟବାଦ ଦେଇଥିଲେ। କାର୍ଯ୍ୟକ୍ରମରେ ବିଭିନ୍ନ ପଞ୍ଚାୟତରୁ ଆଠ ଶହ ଚାଷୀ ଉପସ୍ଥିତ ଥିଲେ।