ଯାଜପୁର ଅଫିସ,୨୨ା୧୨: ଟ୍ରାଫିକ ନିୟମ ଖିଲାପ କରି ନ ଥିବା ସତ୍ତ୍ବେ ଜଣେ ଆଇନଜୀବୀଙ୍କ ନାମରେ ଅନ୍ଲାଇନ ଚାଲାଣ କଟାଯିବା ଘଟଣା ଚଣ୍ଡିଖୋଲ ଟ୍ରାଫିକ ଥାନା ଅଧିକାରୀଙ୍କୁ ମହଙ୍ଗା ପଡିଛି। ଏଥିନେଇ ସମ୍ପୃକ୍ତ ଆଇନଜୀବୀ ଚଣ୍ଡିଖୋଲ ଜେଏମ୍ଏଫ୍ସିଙ୍କ କୋର୍ଟରେ ଏକ ଅଭିଯୋଗ ଫର୍ଦ୍ଦ (ମାମଲା ନଂ. ୨୪୭/୨୦୨୧) ଦାଖଲ କରିଛନ୍ତି। ଅଭିଯୋଗକାରୀ ଓ ଅନ୍ୟ ଜଣେ ପ୍ରତ୍ୟକ୍ଷଦର୍ଶୀଙ୍କ ବୟାନକୁ ଆଧାର କରି ଜେଏମ୍ଏଫ୍ସି ସୌମ୍ୟରଞ୍ଜନ ପୃଷ୍ଟି ଟ୍ରାଫିକ ଆଇଆଇସି ହୃଦାନନ୍ଦ ବେହେରା ଏବଂ ତାଙ୍କ ୨ ସହଯୋଗୀ କନ୍ଷ୍ଟେବଳଙ୍କ ବିରୋଧରେ ଆଇପିସିର ଧର୍ତ୍ତବ୍ୟ ଅପରାଧ ଧାରା ୩୮୫/୨୯୪/ ୨୧୧/୪୧୮/୪୬୯/୩୪ରେ ମାମଲା ରୁଜୁ କରିଛନ୍ତି। ଏହିକ୍ରମରେ ଆସନ୍ତା ୨୮ରେ ବ୍ୟକ୍ତିଗତ ଭାବେ କୋର୍ଟରେ ହାଜର ହେବାକୁ ଆଇଆଇସିଙ୍କୁ ସମନ ଜାରି କରାଯାଇଛି।
ଆଇନଜୀବୀ ଉଦୟନାଥ ସାହୁଙ୍କ ଅଭିଯୋଗ ଅନୁଯାୟୀ, ଅକ୍ଟୋବର ୧୨ ଅପରାହ୍ନ ୨ ଟା ୨୦ରେ ସେ ନିଜ କାରକୁ ଚଣ୍ଡିଖୋଲ ଟ୍ରାଫିକ ଛକ ନିକଟ ସର୍ଭିସ ରୋଡ଼ ବାମ ପାର୍ଶ୍ୱରେ ପାର୍କିଂ କରି ପାଖ ଦୋକାନକୁ ଯାଇଥିଲେ। ଟ୍ରାଫିକ୍ ପୋଲିସ ଗାଡ଼ିର ଫଟୋ ଉଠାଇବା ସହ ଥାନାରେ ଦଶହରା ପୂଜା ହେବ, ତେଣୁ ସେମାନଙ୍କୁ ପୂଜା ଖର୍ଚ୍ଚ ୧୦୦୦ ଟଙ୍କା ଦେବାକୁ ଆଇଆଇସି ପରାମର୍ଶ ଦେଇଥିଲେ। ଟଙ୍କା ନ ଦେଲେ ଗାଡ଼ି ଉପରେ ୫ ହଜାର ଟଙ୍କା ଚାଲାଣ କାଟି ଦିଆଯିବ ବୋଲି ଭୟ ଦେଖାଇଥିଲେ। ପ୍ରତିବାଦ କରିବାରୁ ବେହେରା ଉତ୍କ୍ଷିପ୍ତ ହୋଇ ଆଇନଜୀବୀ ସାହୁଙ୍କୁ ର୍ଦୁବ୍ୟବହାର ପ୍ରଦର୍ଶନ କରିଥିଲେ। ସାହୁ ଘଟଣାସ୍ଥଳରୁ ଯାଜପୁର ଏସ୍ପିଙ୍କୁ ଫୋନ ଯୋଗେ ଆଇଆଇସିଙ୍କ ସମ୍ପର୍କରେ ଅବଗତ କରାଇଥିଲେ। ପରେ ସନ୍ଧ୍ୟାରେ ୨ହଜାର ଟଙ୍କା ଜରିମାନା ଲାଗୁ କରାଯାଇଥିବା ନେଇ ବାହନ ପୋର୍ଟାଲରୁ ତାଙ୍କ ଫୋନ୍କୁ ଏକ ଏସ୍ଏମ୍ଏସ୍ ଆସିଥିଲା। ପରଦିନ ଏଥିନେଇ ସେ ସ୍ଥାନୀୟ ପୋଲିସକୁ ଅବଗତ କରାଇବା ପରେ ମଧ୍ୟ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇ ନ ଥିଲା ା ଶେଷରେ ଗତ ୧୦ ତାରିଖ ଦିନ ସାହୁ ଚଣ୍ଡିଖୋଲ ଜେଏମ୍ଏଫ୍ସି କୋର୍ଟଙ୍କ ଇଜଲାସରେ ଅଭିଯୋଗ ଦାଖଲ କରିଥିଲେ। ଆବେଦନକାରୀଙ୍କ ପକ୍ଷରୁ ଆଇନଜୀବୀ ପ୍ରତାପ ଦାସ, କୈଳାସ ଚନ୍ଦ୍ର ସାମଲ ଓ ବିଜୟ ରାଉଳ ପ୍ରମୁଖ ମାମଲା ପରିଚାଳନା କରୁଛନ୍ତି। ଏସଂକ୍ରାନ୍ତରେ ଆଇଆଇସି ବେହେରା କହିଛନ୍ତି, ଆଇନଜୀବୀ ଭୁଲ ରାସ୍ତାରେ ଗାଡ଼ି ପାର୍କିଂ କରିଥିଲେ। ତାଙ୍କୁ କହିବାରୁ ଓଲଟା ଗାଳିଗୁଲଜ କରିଥିଲେ। ତେଣୁ ମୋ ବିରୋଧରେ ହୋଇଥିବା ଅଭିଯୋଗରେ ସତ୍ୟତା ନାହିଁ ବୋଲି ଆଇଆଇସି ପ୍ରକାଶ କରିଛନ୍ତି।