ବାରିପଦା ଅଫିସ,୮ା୧୧: ମୟୂରଭଞ୍ଜ ଜିଲା ବାରିପଦା ସହରରେ ଦିନକୁ ଦିନ ବଢୁଛି ଟ୍ରାଫିକ ସମସ୍ୟା ।
ଦୋକାନୀମାନେ ରାସ୍ତା ଉପରେ ବାଣିଜି୍ୟକ ପ୍ରତିଷ୍ଠାନ ଖୋଲିବା ଦ୍ୱାରା ରାସ୍ତା ସଙ୍କୁଚିତ ହୋଇପଡୁଛି । ଫଳରେ ଗାଡ଼ିମଟର ଚଳାଚଳରେ ବ୍ୟାଘାତ ହେଉଥିବା ବେଳେ ପ୍ରତିଦିନ ଛୋଟବଡ଼ ଦୁର୍ଘଟଣାମାନ ଘଟୁଛି। ଏହାକୁ ନେଇ ବାରିପଦା ପୌର ପରିଷଦ ପକ୍ଷରୁ ସହରର ବିଭିନ୍ନ ସ୍ଥାନରେ ଉଚ୍ଛେଦ ପ୍ରକ୍ରିୟା ଆରମ୍ଭ କରାଯାଇଛି। ମାତ୍ର ପୌର ପରିଷଦର ନାକ ତଳେ ଥିବା ବସଷ୍ଟାଣ୍ଡ ରାସ୍ତାର ଉଚ୍ଛେଦ କରାଯାଉ ନାହିଁ । ଏ ନେଇ ବାରମ୍ବାର ଅଭିଯୋଗ ହେଉଥିଲେ ମଧ୍ୟ ପ୍ରଭାବଶାଳୀ ବ୍ୟବସାୟୀଙ୍କ ଛତ୍ରଛାୟାରେ ଅଧିକାରୀ ତଥା ପୌରପରିଷଦର କର୍ମଚାରୀମାନେ ପଦକ୍ଷେପ ନେବାରେ ଟାଳଟୁଳ ନୀତି ଅବଲମ୍ବନ କରୁଥିବା ଅଭିଯୋଗ ହେଉଛି।
ସୋମବାର ପୌର ପରିଷଦ ପକ୍ଷରୁ ବେଆଇନ ଦୋକାନ ଗୃହଗୁଡ଼ିକ ଉଚ୍ଛେଦ କରାଯାଇଛି। ସହରର ଷ୍ଟାଡିୟମ ଅଞ୍ଚଳ, ଛଉ ପଡ଼ିଆ, ଘୋଡ଼ାବନ୍ଧ, କାଠିଆ ଛକ, ଫ୍ରେଜର ହଷ୍ଟେଲ ଛକ ଓ ପିଆର୍ଏମ୍ ମେଡିକାଲ ପାର୍ଶ୍ୱବର୍ତ୍ତୀ ଅଞ୍ଚଳରେ ବେଆଇନ ଭାବେ ଗଢ଼ି ଉଠିଥିବା ଦୋକାନଗୁଡ଼ିକ ଭାଙ୍ଗି ଦିଆଯାଇଛି। ପିଆର୍ଏମ୍ ମେଡିକାଲର ସାତମହଲା ବିଲ୍ଡିଂକୁ ସଂଯୋଗ କରୁଥିବା ରାସ୍ତାରେ ବାରମ୍ବାର ଉଚ୍ଛେଦ କରିବା ଦ୍ୱାରା ସ୍ଥାନୀୟ ଅଞ୍ଚଳରେ ଚାପା ଉତ୍ତେଜନା ପ୍ରକାଶ ପାଇଥିଲା । ସରକାରୀ ଜମିକୁ ମାଡ଼ି ବସିଥିବା କୋଠା ଘର ଗୁଡ଼ିକ ଭଙ୍ଗା ଯାଉ ନ ଥିବା ବେଳେ ଗରିବ ଖଟିଖିଆଙ୍କ କୁଡିଆ ଘର ସଦୃଶ ଦୋକାନକୁ ଭାଙ୍ଗିବାରେ ମ୍ୟୁନସିପାଲିଟି ବ୍ୟସ୍ତ ରହୁଥିବା ନେଇ ଅସନ୍ତୋଷ ପ୍ରକାଶ ପାଇଛି। ତେବେ ପଡ଼ୋଶୀ ପଶ୍ଚିମବଙ୍ଗ ଓ ଝାଡଖଣ୍ଡ ରାଜ୍ୟରୁ ଆସୁଥିବା ରୋଗୀ ଏବଂ ଜିଲା ସଦର ମହକୁମାକୁ ଆସୁଥିବା ଜିଲାବାସୀ ସହରର ଭିଡ଼ ମଧ୍ୟରେ ଅଣନିଃଶ୍ୱାସୀ ହୋଇପଡ଼ୁଛନ୍ତି । ମ୍ୟୁନସିପାଲିଟିକୁ ଲାଗିଥିବା ଓ ଜିଲାପାଳଙ୍କ କାର୍ଯ୍ୟାଳୟକୁ ସଂଯୋଗ କରୁଥିବା ବସ୍ଷ୍ଟାଣ୍ଡ ମୁଖ୍ୟ ରାସ୍ତା ପାର୍ଶ୍ୱରେ ଦୋକାନୀମାନେ ବେଆଇନ ଭାବେ ରାସ୍ତାକୁ ଦଖଲ କରିବାରେ ଲାଗିଛନ୍ତି। ଫଳରେ ଯାତ୍ରୀବାହୀ ବସ୍ ଯିବା ସମୟରେ ସମ୍ମୁଖ ଭାଗ କିମ୍ବା ପଛ ପାର୍ଶ୍ୱରୁ ଗାଡ଼ି ମଟର ଚଳପ୍ରଚଳ କଷ୍ଟକର ହୋଇପଡୁଛି। ଭିଡ଼କୁ ନିୟନ୍ତ୍ରଣ କରିବା ପାଇଁ ପୋଲିସକୁ ଦାୟିତ୍ୱ ଦେଇ ପୌର ପରିଷଦ ଦାୟିତ୍ୱ ଖସାଇ ନେଉଛି। ଫଳରେ ଦିନକୁ ଦୁଇ ଶହରୁ ଊର୍ଦ୍ଧ୍ୱ ବସ ଚଳାଚଳ କରୁଥିବାରୁ ଉକ୍ତ ରାସ୍ତା ଦେଇ ଜିଲାପାଳଙ୍କ କାର୍ଯ୍ୟାଳୟ କିମ୍ବା କଚେରୀ କାର୍ଯ୍ୟକୁ ଆସୁଥିବା ଲୋକମାନେ ବହୁ ହଇରାଣ ହରକତ ହୋଇ ବୁଲାଣିଆ ରାସ୍ତାରେ ଯାଉଛନ୍ତି । ଜିଲା ପ୍ରଶାସନ ଓ ପୌର ପରିଷଦ ପକ୍ଷରୁ ସ୍ବତନ୍ତ୍ର ଦୃଷ୍ଟି ଦେଇ ଅନ୍ୟମାନଙ୍କ ଭଳି ଉଚ୍ଛେଦ କରିପାରିଲେ ସମସ୍ୟାର ସମାଧାନ ହୋଇପାରନ୍ତା ବୋଲି ସହରବାସୀ ପ୍ରକାଶ କରିଛନ୍ତି। ଏ ସଂକ୍ରାନ୍ତରେ ପୌରାଧ୍ୟକ୍ଷ କୃଷ୍ଣାନନ୍ଦ ମହାନ୍ତିଙ୍କୁ ପଚାରିବାରୁ ଉକ୍ତ ରାସ୍ତାକୁ ମାଡ଼ି ଆସିଥିବା ଦୋକାନୀମାନଙ୍କୁ ଅବଗତ କରି ଖୁବଶୀଘ୍ର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।