କେନ୍ଦୁଝର,୧୭ା୩(ନରେଶ ଚନ୍ଦ୍ର ପଟ୍ଟନାୟକ): ଦିନକୁ ଦିନ କେନ୍ଦୁଝର ସହରରେ ଲୋକସଂଖ୍ୟା ବହୁଳ ମାତ୍ରାରେ ବଢ଼ିବାରେ ଲାଗିଛି। ସହର ଭିତରେ ବିଭିନ୍ନ ଶିକ୍ଷାନୁଷ୍ଠାନ, ସରକାରୀ ବେସରକାରୀ କାର୍ଯ୍ୟାଳୟ, ଜିଲା ମୁଖ୍ୟ ଚିକିତ୍ସାଳୟ, କୋର୍ଟ, ଜିଲାପାଳଙ୍କ କାର୍ଯ୍ୟାଳୟ, ଆରଟିଓ ଆଦି ମୁଖ୍ୟ କାର୍ଯ୍ୟାଳୟ ରହିଥିବାରୁ ସକାଳ ୮ଟାରୁ ରାତି ୧୦ଟା ପର୍ଯ୍ୟନ୍ତ ଭିଡ଼ ଲାଗି ରହୁଛି। ଜିଲାର ପ୍ରତ୍ୟେକ କୋଣ ଅନୁକୋଣରୁ ହଜାର ହଜାର ଲୋକ ବିଭିନ୍ନ କାର୍ଯ୍ୟରେ କୋର୍ଟ କଚେରି,କେନ୍ଦୁଝର ମେଡିକାଲକୁ ଆସୁଛନ୍ତି। ପୂର୍ବରୁ କେନ୍ଦୁଝର ସହର ଭିତରେ ଟ୍ରାଫିକ ସମସ୍ୟା ଦୂର କରିବା ପାଇଁ ମାଲବାହୀ ଟ୍ରକ୍କୁ ବାଇପାସ୍ ମାଧ୍ୟମରେ ଯାତାୟାତ କରିବା ପାଇଁ ରାସ୍ତା ନିର୍ମାଣ କରାଗଲା। ତା’ପରେ କିଛି ମାତ୍ରାରେ ଟ୍ରାଫିକ ସମସ୍ୟା ଓ ବାୟୁ ପ୍ରଦୂଷଣରୁ କେନ୍ଦୁଝର ସହର ଆଶ୍ୱସ୍ତି ଲାଭ କଲା। କିନ୍ତୁ ସମ୍ପୂର୍ଣ୍ଣ ରୂପରେ ସମସ୍ୟା ଦୂର ହୋଇନାହିଁ। ଗାଡ଼ି ସଂଖ୍ୟା ବୃଦ୍ଧି ସହିତ ରାସ୍ତାକଡ଼ରେ ଦୋକାନ ବଜାର, ବିନା ପାର୍କିଂ ବ୍ୟବସ୍ଥାରେ ମାର୍କେଟ କମ୍ପ୍ଲେକ୍ସ, ହୋଟେଲ, ମଲ୍, ବଡ଼ ବଡ଼ ଦୋକାନ, ବ୍ୟାଙ୍କ ଆଦି ଚାଲିଥିବାରୁ ରାସ୍ତା ଉପରେ ପାର୍କିଂ ଆଦି କାରଣରୁ ରାସ୍ତାରେ ଟ୍ରାଫିକ ସମସ୍ୟା ଗୁରୁତର ହୋଇପଡ଼ିଛି। ସେହିପରି ଟ୍ରାଫିକ୍ ଥାନା ଘୋଷଣା ହୋଇଥିଲେ ହେଁ ଖୋଲୁନହିଁ। ଲୋକମାନେ ଟ୍ରାଫିକ୍ ସମସ୍ୟାର ସମ୍ମୁଖୀନ ହୋଇ ବିଭିନ୍ନ ପ୍ରକାର ଦୁର୍ଘଟଣା ଘଟିବାର ନଜିର ରହିଛି। ଏବେ କେନ୍ଦୁଝରରେ ବିଭିନ୍ନ ଟ୍ରାଫିକରେ କମ୍ପ୍ୟୁଟରୀକରଣ କରାଯାଇ ସମୟ ନିର୍ଦ୍ଧାରଣ କରାଯାଇଛି। ତାହା ସହିତ ଟ୍ରାଫିକ ପୋଲିସ ମଧ୍ୟ ମୁତୟନ କରାଯାଇଛି। ତାହା ସତ୍ତ୍ୱେ ଟ୍ରାଫିକ ସମସ୍ୟା ତୀବ୍ର ହେବାରେ ଲାଗିଛି। ଶୌଚାଳୟ ଅଭାବରୁ ସାଧାରଣ ଲୋକଙ୍କଠାରୁ ଆରମ୍ଭ କରି ଦୀର୍ଘଘଣ୍ଟା ଧରି ଡ୍ୟୁଟି କରିଥିବା ଟ୍ରାଫିକ ପୋଲିସ ବିଶେଷ କରି ମହିଳା ପୋଲିସ ବହୁ ଅସୁବିଧା ଭୋଗୁଛନ୍ତି। ଗାନ୍ଧୀ ଛକ ସମେତ ସମସ୍ତ ଟ୍ରାଫିକରେ ସିଗନାଲ ଲାଇଟ୍ ବଦଳରେ ଗୋଲେଇ ଛକ ଏବଂ ଟାଉନ ଭିତରେ ଓଭର ବ୍ରିଜ୍ ନିର୍ମାଣ କଲେ ଟ୍ରାଫିକ ସମସ୍ୟାରୁ ଲୋକେ ମୁକ୍ତି ପାଇ ପାରିବେ ବୋଲି ଯୁବ ଓ ଶ୍ରମ ବିକାଶ ମଞ୍ଚ କେନ୍ଦୁଝରଗଡ଼ ସଭାପତି ରଞ୍ଜନ କୁମାର ବେହେରା,ଉପସଭାପତି ଜୟକୃଷ୍ଣ ନାଏକ କହିଛନ୍ତି। ଜିଲା ପ୍ରଶାସନ ଏ ଦିଗରେ ପଦକ୍ଷେପ ଗ୍ରହଣ କରିବାକୁ ଦାବି ଜଣାଇଛନ୍ତି।
