ଜଟଣୀ,୨୦।୨(ଡି.ଏନ୍.ଏ.): ଖୋର୍ଦ୍ଧା ଜିଲା ଜଟଣୀ ସହରରେ ଦିନକୁ ଦିନ ଟ୍ରାଫିକ ସମସ୍ୟା ବଢ଼ିବାରେ ଲାଗିଛି। ଏହି ସମସ୍ୟା ଉପରେ ଲାଗିପାରୁନିି ଅଙ୍କୁଶ। ଫଳରେ ଯାତାୟାତରେ ସାଧାରଣ ଲୋକେ ଅସୁବିଧାର ସମ୍ମୁଖୀନ ହେଉଛନ୍ତି। ଦୀର୍ଘଦିନଧରି ଏହି ସମସ୍ୟା ଦେଖାଦେଇଥିଲେ ମଧ୍ୟ ସ୍ଥାନୀୟ ପ୍ରଶାସନ ଏଥିପ୍ରତି ଗୁରୁତ୍ୱ ଦେଉ ନ ଥିବା ସାଧାରଣରେ ଅଭିଯୋଗ ହେଉଛି।
ସୂଚନା ମୁତାବକ, ଜଟଣୀ ସହରରେ ଜନସଂଖ୍ୟା ସହିତ ଯାନବାହନ ବୃଦ୍ଧିକୁ ଦୃଷ୍ଟିରେ ରଖି ସ୍ଥାନୀୟ ବୁଦ୍ଧିଜୀବୀ ଏବଂ ବିଭିନ୍ନ ସାମାଜିକ ଅନୁଷ୍ଠାନ ଟ୍ରାଫିକ୍ ନିୟନ୍ତ୍ରଣ ପାଇଁ ପ୍ରଶାସନର ଦୃଷ୍ଟିଆକର୍ଷଣ କରିଥିଲେ। ୨୦୨୦ ଜୁଲାଇରେ ୮ଜଣ ଟ୍ରାଫିକ୍ କର୍ମଚାରୀଙ୍କୁ ନିୟୋଜିତ କରାଯାଇଥିବା ନେଇ ବିଭିନ୍ନ ଗଣମାଧ୍ୟମରେ ପ୍ରକାଶ ପାଇଥିଲା। ହେଲେ ପରବର୍ତ୍ତୀ ସମୟରେ ସ୍ଥାନୀୟ ହରିଭାଇନା ଛକଠାରେ ଦୁଇ ସିଫ୍ଟରେ ୪ଜଣ ଟ୍ରାଫିକ୍ କର୍ମଚାରୀ କାର୍ଯ୍ୟ କରୁଥିବା ଦେଖିବାକୁ ମିଳିଥିଲା। ପରେ ହରିଭାଇନା ଛକ ଏବଂ ଜଟଣୀ ଗେଟ୍ ତଳଖେତା ଛକରେ ପର୍ଯ୍ୟାୟକ୍ରମେ ୮ଜଣ ଟ୍ରାଫିକ କର୍ମଚାରୀ ମୁତୟନ ହୋଇଥିଲେ। ଏବେ ଟ୍ରାଫିକ୍ ପୋଲିସଙ୍କ ଦେଖା ମିଳୁ ନ ଥିବା ସାଧାରଣରେ ଅଭିଯୋଗ ହେଉଛି। ଦୈନିକ ଜଟଣୀ ସରରକୁ ଶତାଧିକ ଲୋକଙ୍କ ସମେତ ବହୁ ଛାତ୍ରୀଛାତ୍ର, କର୍ମଚାରୀ ଆସିଥାନ୍ତି। ଫଳରେ ସହରର ମୁଖ୍ୟ ଛକଗୁଡ଼ିକରେ ଗହଳି ଦେଖାଦେଉଥିବା ବେଳେ ଅନେକ ଦୁର୍ଘଟଣା ଘଟୁଥିବା ନଜିର ରହିଛି। ମାଲବାହୀ ଟ୍ରକ୍, ବସ୍ ଯାତାୟାତ କରୁଥିବାରୁ ରାସ୍ତା ଅବସ୍ଥା ଶୋଚନୀୟ ହୋଇପଡ଼ିଛି। ଏଥିସହ ଜଟଣୀ ଟାଉନ୍ ହଲ ସମ୍ମୁଖ ଏବଂ କୋର୍ଟ ପାର୍ଶ୍ୱ ରାସ୍ତାରେ ଯାନବାହନ ଜାମ ହେବାରୁ ଅନେକ ସମୟରେ ରୋଗୀଙ୍କୁ ନେଇ ଯାଉଥିବା ଆମ୍ମୁଲାନ୍ସ ଫସି ରହୁଥିବା ଦେଖିବାକୁ ମିଳୁଛି। ଟ୍ରାଫିକ ସମସ୍ୟା ସମାଧାନ କେବଳ ଫଟୋ, ପୋଷ୍ଟର ଏବଂ ଗଣମାଧ୍ୟମରେ ସୀମିତ ବୋଲି ସାଧାରଣରେ ଚର୍ଚ୍ଚା ହେଉଛି। ଏହି ସମସ୍ୟା ପ୍ରତି ତୁରନ୍ତ ପ୍ରଶାସନ ଦୃଷ୍ଟି ଦେବାକୁ ସାଧାରଣରେ ଦାବି ହେଉଛି।