କେନ୍ଦୁଝର,୨୭ା୩(ସ୍ବ.ପ୍ର.):କେନ୍ଦୁଝର ସହରର ମୁଖ୍ୟ ରାସ୍ତାରୁ ଅଜନ୍ତା ଲଜ୍ ଗଳିକୁ ସଂଯୋଗ କରୁଥିବା ରାସ୍ତାରେ ଟ୍ରାଫିକ ସମସ୍ୟା ଉକତ୍ଟ ରୂପ ଧାରଣ କରିଛି। ଅଞ୍ଚଳରେ ରାତି ୧୦ଟାରୁ ସକାଳ ୮ଟା ପର୍ଯ୍ୟନ୍ତ ମାଲ ବୋଝେଇ ଗାଡି ଅନଲୋଡିଂ କରିବାକୁ ପୋଲିସ ଓ ପୌରପାଳିକା ପକ୍ଷରୁ ନିର୍ଦ୍ଦେଶ ରହିଛି। ମାତ୍ର ଗୋଦାମ ମାଲିକ ନିର୍ଦ୍ଦେଶକୁ ଭୃକ୍ଷେପ ନ କରି ୧୬ ଚକିଆ ଗାଡ଼ିକୁ ଅଣ ଓସାରିଆ ରାସ୍ତାରେ ଭର୍ତ୍ତି କରି ମାଲ ଅନଲୋଡ୍ କରୁଛନ୍ତି। ଅନେକ ସମୟରେ ଗାଡି ଖରାପ ହେଲେ ଜନାକୀର୍ଣ୍ଣ ରାସ୍ତାରେ ଯାତାୟାତ ଠପ୍ ହୋଇଯାଉଛି।
ସୂଚନାଯୋଗ୍ୟ, କେନ୍ଦୁଝର ସହରର ମୋଚିବନ୍ଧସାହିସ୍ଥିତ ମୋଚିବନ୍ଧ ଉଚ୍ଚ ବିଦ୍ୟାଳୟଠାରୁ ବୁଲାଦ୍ୱାର ସାହି ପର୍ଯ୍ୟନ୍ତ ଥିବା ରାସ୍ତାର ଉଭୟ ପାର୍ଶ୍ୱରେ ବିଭିନ୍ନ ପ୍ରକାର ଗୋଦାମ ଗୃହ ରହିଛି। ଫଳରେ ପ୍ରତିଦିନ ମାଲବାହୀ ଟ୍ରକ୍ ଠିଆ ହୋଇ ରହୁଛି। ଏଥିପାଇଁ ଉକ୍ତ ରାସ୍ତାରେ ଥିବା ଜନସାଧାରଣ ନାହିଁ ନ ଥିବା ଅସୁବିଧା ଭୋଗ କରୁଛନ୍ତି। ରାସ୍ତାଟି ଅଣ ଓସାରିଆ ହୋଇଥିଲେ ମଧ୍ୟ ଏହା ଏକ ବ୍ୟସ୍ତ ବହୁଳ ରାସ୍ତା। ଲୋକମାନେ ସାଧାରଣତଃ ଜାତୀୟ ରାଜପଥରୁ ଷ୍ଟେଟବ୍ୟାଙ୍କ ରୋଡ୍ରେ ମିଶିବା ପାଇଁ ଏହି ରାସ୍ତାକୁ ବ୍ୟବହାର କରିଥାଆନ୍ତି। କିନ୍ତୁ ଗୋଦାମ ମାଲିକମାନେ ଦିନ ତମାମ ୧୪ରୁ ୧୬ ଚକିଆ ଟ୍ରକ୍ ରଖି ମାଲ ଲୋଡ ଅନ୍ଲୋଡ କରିବା ଯୋଗୁ ରାସ୍ତାରେ ଟ୍ରାଫିକ ସମସ୍ୟା ବଢ଼ୁଛି ବୋଲି ସ୍ଥାନୀୟ ଅଧିବାସୀ ପ୍ରଦୀପ ମହାନ୍ତି କହିଛନ୍ତି। ଭାରିଯାନ ଚଳାଚଳ ଯୋଗୁ ରାସ୍ତା ନଷ୍ଟ ହୋଇଗଲାଣି। ବିନା ପାର୍କିଂରେ ବ୍ୟବସାୟମାନେ ଗୋଦାମ ଘର କରିଛନ୍ତି। ଦିନ ତମାମ ଗାଡ଼ି ରାସ୍ତା ଉପରେ ରଖାଯାଉଛି। ଫଳରେ ସ୍ଥାନୀୟ ଲୋକେ ଯାତାୟାତରେ ସମସ୍ୟା ଭୋଗୁଥିବା ବେଳେ ରାସ୍ତା ଜାମ ହେଉଛି ବୋଲି ଆଇନଜୀବୀ ସୁରଜ ମହାପାତ୍ର କହିଛନ୍ତି। ମୋଚିବନ୍ଧ ସାହି ରାସ୍ତା ପାର୍ଶ୍ୱରେ ଥିବା ମୋଚିବନ୍ଧ ଉଚ୍ଚ ବିଦ୍ୟାଳୟ ଏବଂ ମୋଚିବନ୍ଧ ୟୁଜିଏମ୍ଇ ବିଦ୍ୟାଳୟର ଛାତ୍ରୀଛାତ୍ରମାନେ ବିପଦପୂର୍ଣ୍ଣ ଭାବେ ବିଦ୍ୟାଳୟକୁ ଯିବା ଆସିବା କରୁଥିବା ସ୍ଥାନୀୟ ନିବାସୀ ବିପିନ ସାହୁ କହିଛନ୍ତି। ଏହି ସ୍ଥାନରୁ ଗୋଦାମ ଘର ଅନ୍ୟତ୍ର ସ୍ଥାନାନ୍ତର ପାଇଁ ପୌରପାଳିକା ଓ ପୋଲିସ ପ୍ରଶାସନ ପକ୍ଷରୁ ନିର୍ଦ୍ଦିଷ୍ଟ ସମୟ ଦିଆଯାଇଥିଲେ ସୁଦ୍ଧା ବ୍ୟବସାୟୀ ଏହାକୁ ଫୁ କରିଦେଇଥିବା ସ୍ଥାନୀୟ ଲୋକେ କହିଛନ୍ତି।