ସୋନପୁର,୨୮।୪(ମୃତ୍ୟୁଞ୍ଜୟ ଶତପଥୀ): ସୋନପୁର ଟାଉନ ପୋଲିସ ଏକ ଲୁହାରଡ ବୋଝେଇ ଟ୍ରକ୍ରେ ବୌଦ୍ଧ ଜିଲା କଣ୍ଟାମାଳରୁ ମଧ୍ୟପ୍ରଦେଶକୁ ବିପୁଳ ପରିମାଣର ଗଞ୍ଜେଇ ଚୋରାଚାଲାଣ ବେଳେ ଜବତ କରିଛି। ଟ୍ରକ୍ ଡ୍ରାଇଭର ତଥା ମଧ୍ୟପ୍ରଦେଶର ଦିନଦୋରୀ ଜିଲା ବଗାଗ ଥାନା ପିନ୍ଦ୍ରୁକ୍ଷି ଅଞ୍ଚଳର ବିଜୟ ଗାବଲେ(୨୪) ଓ ହେଲପର ତଥା ମଧ୍ୟପ୍ରଦେଶ ସାଣ୍ଢୋଲ ଜିଲା କାରି ଗ୍ରାମର ବିନୋଦ ମାଝି(୪୫)ଙ୍କୁ ଗିରଫ କରାଯାଇଛି। ଜବତ ଟ୍ରକ୍ ନଂ ଏମ୍ପି୧୮ଜିଏ-୨୭୩୬ରେ ଲୁହାରଡ ପରିବହନ ହେଉଥିଲା।
ତେବେ ପୋଲିସ ଓ ଅବକାରୀ ବିଭାଗ ଆଖିରେ ଧୂଳି ଦେଇ ଉକ୍ତ ଟ୍ରକ୍ରେ ଗଞ୍ଜେଇ ମଧ୍ୟ ଚାଲାଣ କରାଯାଉଥିଲା। ତନଖି ସମୟରେ ୧୧ଟି ଜରି ବସ୍ତାରେ ଥିବା ମୋଟ ୩ କୁଇଣ୍ଟାଲ ୭୫କିଲୋ ଗଞ୍ଜେଇ ଜବତ ହୋଇଛି। ଜବତ ଗଞ୍ଜେଇର ମୂଲ୍ୟ ପ୍ରାୟ ୩୭ଲକ୍ଷ ୫୦ହଜାର ଟଙ୍କା ହେବ। ସେହିପରି ଟ୍ରକ୍ ଡାଲାରୁ ୨୪ଟନ ୯୬୦କିଲୋ ଟିଏମ୍ଟି ବାର ଆଇରନ ରଡ ଜବତ ହୋଇଛି। ଜବତ ରଡର ମୂଲ୍ୟ ୧୫ଲକ୍ଷ ଟଙ୍କା ହେବ ବୋଲି ସୁବର୍ଣ୍ଣପୁର ଏସ୍ପି ୟଶପ୍ରତାପ ଶ୍ରୀମାଲ୍ ସୋମବାର ସୋନପୁର ଥାନା ପରିସରରେ ଆୟୋଜିତ ଏକ ଖବରଦାତା ସମ୍ମିଳନୀରେ ସୂଚନା ଦେଇଛନ୍ତି। ଏସ୍ପିଙ୍କ ସୂଚନା ଅନୁଯାୟୀ ଟ୍ରକ୍ରେ ସମ୍ବଲପୁର ଲାପାଙ୍ଗା ସ୍ଥିତ ଶ୍ୟାମ ମେଟାଲିକ୍ସରୁ ଲୁହା ରଡ ବୋଝେଇ ହୋଇଥିଲା। ରଡ ସମ୍ବଲପୁରରୁ ମଧ୍ୟପ୍ରଦେଶର ଜବଲପୁରକୁ ଯାଉଥିଲା। ତେବେ ଗଞ୍ଜେଇ ଚୋରାଚାଲାଣକାରୀ ଟ୍ରକ୍କୁ ଗଞ୍ଜେଇ ପରିବହନରେ ବ୍ୟବହାର କରିଥିଲେ। ଟ୍ରକ୍ ସମ୍ବଲପୁରରୁ ବୌଦ୍ଧ ଜିଲାର କଣ୍ଟାମାଳକୁ ଆସିଥିଲା। କଣ୍ଟାମାଳ ଅଞ୍ଚଳରୁ ଗଞ୍ଜେଇ ବୋଝେଇ ପରେ ଟ୍ରକ୍ ସୁବର୍ଣ୍ଣପୁର ରାସ୍ତା ଦେଇ ମଧ୍ୟପ୍ରଦେଶ ଅଭିମୁଖେ ଯାଉଥିଲା।
ସୋନପୁର ଆଇଆଇସି ଲୋକନାଥ ସାହୁଙ୍କୁ ଏକ ବିଶ୍ୱସ୍ତ ସୂତ୍ରରୁ ସୂଚନା ମିଳିଥିଲା ଯେ, ଏକ ନିର୍ଦ୍ଦିଷ୍ଟ ଟ୍ରକ୍ରେ ବୌଦ୍ଧ ଜିଲାରୁ ସୁବର୍ଣ୍ଣପୁର ସହର ରାସ୍ତା ଦେଇ ଗଞ୍ଜେଇ ଚୋରାଚାଲାଣ କରାଯାଉଛି। ଏସମ୍ପର୍କରେ ସେ ଏସ୍ପିଙ୍କୁ ଜଣାଇଥିଲେ। ଏସ୍ପିଙ୍କ ନିର୍ଦ୍ଦେଶକ୍ରମେ ଏକ ପୋଲିସ ଟିମ୍ ଜିଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଜଗି ରହିଥିଲେ। ପୋଲିସ ଟିମ୍ ଟ୍ରକ୍କୁ ଅଟକ ରଖି ତନଖି କରିବା ପରେ ଲୁହା ରଡ ସହ ବିପୁଳ ପରିମାଣର ଗଞ୍ଜେଇ ମିଳିଥିଲା। ପୋଲିସ ଟ୍ରକ୍, ଗଞ୍ଜେଇ, ଲୁହା ରଡ, ହେଲପର ଓ ଡ୍ରାଇଭରଙ୍କ ନିକଟରୁ ୨ଟି ମୋବାଇଲ ଜବତ କରିବା ସହ ଉଭୟଙ୍କ କୋର୍ଟଚାଲାଣ କରିଛି। ଖବରଦାତା ସମ୍ମିଳନୀରେ ସୋନପୁର ଏସ୍ଡିପିଓ ପ୍ରତାପ ଚନ୍ଦ୍ର ତ୍ରିପାଠୀ ଓ ସୋନପୁର ଆଇଆଇସି ଲୋକନାଥ ସାହୁ ଉପସ୍ଥିତ ଥିଲେ।
ଟ୍ରକ୍ରେ ମଧ୍ୟପ୍ରଦେଶକୁ ଗଞ୍ଜେଇ ଚୋରାଚାଲାଣ ଘଟଣାରେ ଡ୍ରାଇଭର ଓ ହେଲପରଙ୍କ ସମେତ ଅନ୍ୟମାନଙ୍କ ସମ୍ପୃକ୍ତି ରହିଛି। ଗଞ୍ଜେଇ ଚାଷ ଓ ପରିବହନ ପଛରେ ପଡୋଶୀ ବୌଦ୍ଧ ଜିଲା ଓ ବାହାରେ ଏକ ବଡ ର଼୍ୟାକେଟ୍ କାମ କରୁଛି। ସେମାନଙ୍କୁ ଚିହ୍ନଟ କରାଯାଇଛି। ଖୁବ୍ଶୀଘ୍ର ମୁଖ୍ୟ ଅଭିଯୁକ୍ତଙ୍କୁ ଗିରଫ କରାଯିବ। ଗଞ୍ଜେଇ ବିକ୍ରେତା ଓ ପରିବହନକାରୀଙ୍କ ଅର୍ଥନୈତିକ କାରବାର ସମ୍ପର୍କରେ ତଦନ୍ତ କରାଯିବ ବୋଲି ଏସ୍ପି ୟଶପ୍ରତାପ ଶ୍ରୀମାଲ୍ କହିଛନ୍ତି।