ଭୁବନେଶ୍ୱର,୧୨।୧୦(ଅନୁରାଧା ମହାରଣା)କେନ୍ଦ୍ରମନ୍ତ୍ରୀ ଅନୁରାଗ ଠାକୁର ବୁଧବାର ଏକ ଆନିମେଟେଡ୍ ସିରିଜ୍ କ୍ରିସ୍, ତ୍ରିସ୍ ଆଣ୍ଡ ବାଲ୍ଟିବୟ (କେଟିବି) – ଭାରତ ହୈ ହମ୍ର ଟ୍ରେଲର୍ ଲଞ୍ଚ କରିଛନ୍ତି। କେନ୍ଦ୍ରୀୟ ସଞ୍ଚାର ବ୍ୟୁରୋ, କେନ୍ଦ୍ରୀୟ ସୂଚନା ଓ ପ୍ରସାରଣ ମନ୍ତ୍ରଣାଳୟ ଏବଂ ଗ୍ରାଫିଟି ଷ୍ଟୁଡିଓ ଦ୍ୱାରା ପ୍ରସ୍ତୁତ ଏହି ସିରିଜ୍ରେ ୨ଟି ସିଜନ୍ ରହିଛି। ଏହି ସିରିଜରେ ମୋଟ୍ ୫୨ଟି ଏପିସୋଡ୍ ରହିଥିବାବେଳେ ପ୍ରତି ଏପିସୋଡର ସମୟ ଅବଧି ୧୧ ମିନିଟ୍ ରହିଛି। ୧୫୦୦ରୁ ୧୯୪୭ ମସିହା ମଧ୍ୟରେ ଭାରତର ସ୍ବାଧୀନତା ସଂଗ୍ରାମ ସମ୍ପର୍କରେ ଏହି ସିରିଜରେ ବର୍ଣ୍ଣନା କରାଯାଇଛି। ୩ ଆନିମେଟେଡ ଚରିତ୍ର କ୍ରିସ୍, ତ୍ରିସ୍ ଏବଂ ବାଲ୍ଟିବୟ ଦ୍ୱାରା ସିରିଜ୍ ହୋଷ୍ଟ କରାଯାଇଛି। ମୁଞ୍ଜାଲ ଶ୍ରଫ୍ ଏବଂ ତିଳକରାଜ୍ ସେଟ୍ଟୀଙ୍କ ଦ୍ୱାରା ସିରିଜଟି ପ୍ରସ୍ତୁତ। ଦୂରଦର୍ଶନରେ ଅକ୍ଟୋବର ୧୫ ରୁ ୨୦୨୪ ଜାନୁୟାରୀ ୭ରେ ପ୍ରଥମ ସିଜନ୍ ପ୍ରସାରିତ ହେବ। ସେହିପରି ଜାନୁୟାରୀ ୨୮ରୁ ଏପ୍ରିଲ ୨୧ରେ ଦ୍ୱିତୀୟ ସିଜନ୍ ପ୍ରସାରିତ ହେବ। ନେଟ୍ଫ୍ଲିକ୍ସ ଓ ଆମାଜନ ପ୍ରାଇମ୍ ଭିଡିଓରେ ଅକ୍ଟୋବର ୧୫ରେ ପ୍ରଥମ ସିଜିନ୍ ଏବଂ ୨୦୨୪ ଜାନୁୟାରୀ ୨୮ରେ ଦ୍ୱିତୀୟ ସିଜନ୍ ପ୍ରସାରିତ ହେବ। ମୂଳ ସ୍କ୍ରିପ୍ଟ ହିନ୍ଦୀ ହୋଇଥିବାବେଳେ ତାମିଲ, ତେଲୁଗୁ, କନ୍ନଡ, ମାଲାୟାଲମ୍, ମରାଠୀ, ଗୁଜରାଟୀ, ପଞ୍ଜାବୀ, ବଙ୍ଗାଳି, ଅହମୀୟା, ଓଡ଼ିଆ ଓ ଇଂରାଜୀ ଆଦି ୧୨ଟି ଭାଷାରେ ଏହା ପ୍ରସ୍ତୁତ କରାଯାଇଛି। ଅନ୍ୟପଟେ ଅନ୍ତର୍ଜାତୀୟ ଭାଷା ଫ୍ରେଞ୍ଚ, ସ୍ପାନିସ୍୍, ରୁଷିଆନ୍, ଆରାବିକ, ଚାଇନିଜ୍, ଜାପାନିଜ୍ ଓ କୋରିଆନ୍ ଭାଷାରେ ମଧ୍ୟ ଏହା ଉପଲବ୍ଧ ହେବ। ଏହିପରି ମୋଟ୍ ୧୯ ଭାଷାରେ ସିରିଜ ମୁକ୍ତିଲାଭ କରିବ।
ସିରିଜ୍ର ଟ୍ରେଲର ଲଞ୍ଚ କାର୍ଯ୍ୟକ୍ରମରେ ମନ୍ତ୍ରୀ ଠାକୁର କହିଛନ୍ତି, ସ୍ବାଧୀନତା ସଂଗ୍ରାମରେ ଅନେକ ବୀରଙ୍କ ଅବଦାନ ବିଷୟରେ ଯୁବପିଢ଼ି ଜାଣନ୍ତି ନାହିଁ। ଶିକ୍ଷା ବ୍ୟବସ୍ଥାରେ ମଧ୍ୟ ଅନେକଙ୍କ ବିଷୟରେ ସବିଶେଷ ତଥ୍ୟ ନାହିଁ। ତେଣୁ ସେମାନଙ୍କ ସମ୍ପର୍କରେ ଜାଣିବା ପାଇଁ ଏହା ଯୁବପିଢ଼ିଙ୍କ ନିମନ୍ତେ ସହାୟକ ହେବ ବୋଲି ସେ କହିଛନ୍ତି। ସେହିପରି ଆଧୁନିକ ଭାରତରେ ଲୋକଙ୍କ କ’ଣ ଭୂମିକା ରହିଥିଲା ସେ ସମ୍ପର୍କରେ ମଧ୍ୟ ଆଗାମୀ ପିଢ଼ି ଜାଣିପାରିବେ। ସେହିପରି ବିଦେଶୀ ଶାସକଙ୍କ ବିରୋଧରେ ଆଦିବାସୀ ମହିଳାଙ୍କ ଅବଦାନ କ’ଣ ରହିଥିଲା ସେ ସମ୍ପର୍କରେ ପୂର୍ବରୁ ଏତେ ଆଲୋଚନା ହୋଇ ନ ଥିବାବେଳେ ଏହି ସିରିଜ୍ରେ ତାହା ଦେଖିବାକୁ ମିଳିବ। ଏକାଧିକ ଭାଷାରେ ମୁକ୍ତିଲାଭ କରୁଥିବାରୁ ସମଗ୍ର ବିଶ୍ୱବାସୀ ଏ ବିଷୟରେ ଜାଣିପାରିବେ ବୋଲି ଠାକୁର ଆଶା ପ୍ରକାଶ କରିଛନ୍ତି। ଅନ୍ୟପଟେ ଆଗାମୀ ଅଧିବେଶନରେ ସମସ୍ତ ସାଂସଦଙ୍କୁ ଏହି ସିରିଜ ପ୍ରଦର୍ଶିତ କରାଯିବ ବୋଲି ମନ୍ତ୍ରୀ ଘୋଷଣା କରିଛନ୍ତି। ପ୍ରଥମଥର ଏପରି ଆନିମେଟେଡ୍ ସିରିଜ ଲଞ୍ଚ କରାଯାଇଥିବା ବିଭାଗୀୟ ସଚିବ ଅପୂର୍ବ ଚନ୍ଦ୍ର ସୂଚନା ଦେଇଛନ୍ତି। ଆନିମେଟେଡ୍ ସିରିଜ ଗୁଡ଼ିକରେ ସାଧାରଣତଃ ୨୫ରୁ ୩୦ ଚରିତ୍ର ସହ ୪୦ ବ୍ୟାକଗ୍ରାଉଣ୍ଡ ରହିଥାଏ। ମାତ୍ର କେବିଟି- ଭାରତ ହେଁ ହମରେ ୧୦୦ ପାଖାପାଖି ଚରିତ୍ର ଏବଂ ପ୍ରାୟ ୫୦ଟି ବ୍ୟାକ୍ଗ୍ରାଉଣ୍ଡ ରହିଛି। ହିମାଚଳପ୍ରେଦେଶ, ପଶ୍ଚିମବଙ୍ଗ, ପଞ୍ଜାବ କେରଳଠାରୁ ଆରମ୍ଭ କରି ଦେଶର ଅନ୍ୟାନ୍ୟ ସ୍ଥାନର ଚିତ୍ରଣ କରାଯାଇଛି। ରାଣୀ ଆବାକ୍କା, ତିଲକା ମଞ୍ଝୀ, ତିରୋତ୍ ସିଂହ, ତାନ୍ତିଆ ଟୋପେ, କୋଟଓ୍ବାଲ ଧାନ୍ସିଂହ, କୁନ୍ଓ୍ବର ସିଂହ, ରାଣୀ ଚେନ୍ନାମା, ଟିକେନ୍ଦ୍ରଜିତ୍ ସିଂହଙ୍କ ଭଳି ସ୍ବାଧୀନତା ସଂଗ୍ରାମୀଙ୍କ ବିଷୟରେ ବର୍ଣ୍ଣନା କରାଯାଇଛି।