ମୋରଡ଼ା,୩ା୬(ଡି.ଏନ୍.ଏ.): ଆଖିରୁ ଲୁହ ଶୁଖୁନି। ମା’, ବାପା, ସ୍ତ୍ରୀ ଓ ପରିବାର ଲୋକେ ନିଜ ଲୋକଙ୍କ ଫେରିବା ବାଟକୁ ଚାହିଁ ବସିଛନ୍ତି। ପରିବାର ପୋଷଣ ପାଇଁ କାମ କରିବାକୁ ଚେନ୍ନାଇ ଯାଉଥିଲେ। କିନ୍ତୁ ସବୁ ଅଟକି ଯାଇଥିଲା ଶୁକ୍ରବାର ସନ୍ଧ୍ୟାରେ। ବାଲେଶ୍ୱର ଜିଲା ବାହାନଗା ଷ୍ଟେଶନରୁ ମାତ୍ର ଅଳ୍ପ କିଛି ଦୂରରେ ଗତକାଲି ଘଟିଥିବା ମମନ୍ତୁଦ କରମଣ୍ଡଳ ଟ୍ରେନ୍ ଦୁର୍ଘଟଣାରେ ମୃତ୍ୟୁସଂଖ୍ୟା ୨୬୧ ଛୁଇଁଥିବା ବେଳେ ଶତାଧିକ ଆହତ ହୋଇଛନ୍ତି। ଏବେବି ଚାଲିଛି ଉଦ୍ଧାର କାର୍ଯ୍ୟ। ତେବେ ଉକ୍ତ ଦୁର୍ଘଟଣାଗ୍ରସ୍ତ ଟ୍ରେନ୍ରେ ଥିଲେ ମୟୂରଭଞ୍ଜ ଜିଲା ମୋରଡ଼ା ଥାନା ଅଧୀନ ଗଡ଼ିଆ ପଞ୍ଚାୟତର ପୁଟକିଶୋଳ ଗ୍ରାମର ୪ଜଣ ଯୁବକ। ଉକ୍ତ ଗ୍ରାମର ଅକ୍ଷୟ ସିଂଙ୍କ ପୁଅ କୀର୍ତ୍ତନ, ଦାଶରଥି ଦାସଙ୍କ ପୁଅ ବ୍ରହ୍ମାକାନ୍ତ, ଭାଗିରଥି ଦାସଙ୍କ ପୁଅ ଭରତ ଓ ତାରାକାନ୍ତ ପାଟବନ୍ଧାଙ୍କ ପୁଅ ସତ୍ୟନାଥ ଥିଲେ ବୋଲି ପରିବାର ଲୋକେ ସୂଚନା ଦେଇଛନ୍ତି। ଗତକାଲି ୪ଜଣ ଘରୁ ବାହାରି ସନ୍ଧ୍ୟା ୬ଟାରେ ଟ୍ରେନରେ ଚଢ଼ିବା ପରେ ଫୋନରେ ଯୋଗାଯୋଗ କରିଥିଲେ କିନ୍ତୁ ତା’ପରେ ଆଉ ଯୋଗାଯୋଗ ସମ୍ଭବ ହୋଇପାରୁନାହଁ ବୋଲି ଦୁଃଖଭରା କଣ୍ଠରେ କହିଛନ୍ତି ପରିବାର ଲୋକେ। କୀର୍ତ୍ତନଙ୍କ ସ୍ତ୍ରୀ ଟୁନି, ତାଙ୍କର ଗୋଟିଏ ପୁଅ ଏବଂ ଝିଅ,ବ୍ରହ୍ମାକାନ୍ତଙ୍କ ସ୍ତ୍ରୀ ମିନା ଏବଂ ତାଙ୍କର ଦୁଇ ପୁଅ,ଭରତଙ୍କ ସ୍ତ୍ରୀ,ଗୋଟିଏ ପୁଅ ଏବଂ ଝିଅ ଏବଂ ସତ୍ୟନାଥ ପାଟବନ୍ଧା ପରିବାର ଲୋକଙ୍କୁ ଛାଡ଼ି ପରିବାରର ପେଟପୋଷଣ ପାଇଁ ଯାଉଥିଲେ ଚେନ୍ନାଇକୁ।
କିନ୍ତୁ ଅଞ୍ଚଳରୁ ଯାଉଥିବା କିଛି ଲୋକଙ୍କ ସୂଚନା ଅନୁଯାୟୀ, ଭରତଙ୍କର ଉକ୍ତ ଦୁର୍ଘଟଣାରେ ମୃତ୍ୟୁ ଘଟିଛି ଏବଂ ଅନ୍ୟ ୩ ଜଣଙ୍କ ବିଷୟରେ ବର୍ତ୍ତମାନ ସୁଦ୍ଧା କୌଣସି ଖବର ମିଳିପାରିନାହିଁ।