ଜୟପୁର,୨୨।୨: ଶୀର୍ଷକକୁ ପଢ଼ିଲେ ନିଶ୍ଚୟ ଆଶ୍ଚର୍ଯ୍ୟ ଲାଗୁଥିବ। କିନ୍ତୁ କଥାଟି ସତ। କିଛି ଦିନ ପୂର୍ବରୁ ପାକିସ୍ତାନ ଲାହୋରର ଏକ ରେଳ ଷ୍ଟେସନ ନିକଟରେ ମଧ୍ୟ ଜଣେ ଟ୍ରେନ୍ ଡ୍ରାଇଭର ଦହି କିଣିବା ପାଇଁ ଟ୍ରେନ୍କୁ ଅଟକାଇ ଦେଇଥିବା ଘଟଣା ସାମ୍ନାକୁ ଆସିଥିଲା। ଏହି ଘଟଣା ଲୋକଲୋଚନକୁ ଆସିବା ପରେ ତଦନ୍ତ କରାଯାଇ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଥିଲା। ତେବେ ପାକିସ୍ତାନ ପରେ ଏବେ ଭାରତରୁ ମଧ୍ୟ ସମାନ ଘଟଣା ସାମ୍ନାକୁ ଆସିଛି। ଯେଉଁଠାରେ ଟ୍ରେନ୍ ଡ୍ରାଇଭର କଚୋଡି ଖାଇବା ପାଇଁ ଟ୍ରେନ୍କୁ ଅଟକାଇ ଦେଇଥିବା ଜଣାପଡ଼ିଛି। ଏହି ଘଟଣା ରାଜସ୍ଥାନର ଅଲୱର ଜିଲାରୁ ଆସିଛି। ଅଲୱର ସ୍ଥିତ ଏକ ରେଲଓ୍ବେ ଷ୍ଟେସନ ନିକଟରେ ଜଣେ ଟ୍ରେନ୍ ଡ୍ରାଇଭର କଚୋଡି ଖାଇବା ପାଇଁ ଟ୍ରେନ୍କୁ ଅଟକାଇ ଦେଇଥିଲେ। ସେହି ସମୟର ଦୃଶ୍ୟ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ଉକ୍ତ ଭିଡିଓରେ ଜଣେ ବ୍ୟକ୍ତି ନିଜ ହାତରେ କଚୋଡି ଧରି ଠିଆ ହୋଇଥିବାର ନଜର ଆସିଛନ୍ତି। କିଛି ସମୟ ପରେ ସେଠାକୁ ଏକ ଟ୍ରେନ୍ ଆସି ପହଞ୍ଚିବା ପରେ ବ୍ୟକ୍ତି ଜଣକ ଉକ୍ତ କଚୋଡି ପ୍ୟାକେଟକୁ ଇଞ୍ଜିନ ଡ୍ରାଇଭରଙ୍କୁ ଧରାଇଥାନ୍ତି। କଚୋଡି ନେବା ମାତ୍ରେ ହିଁ ଟ୍ରେନ୍ ନିଜର ଯାତ୍ରା ଆରମ୍ଭ କରିଥିବା ଉକ୍ତ ଭିଡିଓରେ ଦେଖିବାକୁ ମିଳିଛି। ଅନ୍ୟପଟେ ଟ୍ରେନ୍ ଡ୍ରାଇଭରର ଏଭଳି କାର୍ଯ୍ୟ ଯୋଗୁ ଅନେକ ଲୋକ ହଇରାଣ ହରକତ ହେବାକୁ ପଡ଼ିଛି। କିଛି ସମୟ ଧରି ଫାଟକ ବାହାରେ ଲୋକଙ୍କୁ ଅପେକ୍ଷା କରିବାକୁ ପଡିଥିଲା। ଏହି ସମୟର ଦୃଶ୍ୟକୁ ଅନେକ ଲୋକ ନିଜ ମୋବାଇଲରେ ରେକର୍ଡ କରି ସୋସିଆଲ ମିଡିଆରେ ପୋଷ୍ଟ କରିଛନ୍ତି। ଯାହା ବର୍ତ୍ତମାନ ଭାଇରାଲ ହେବାରେ ଲାଗିଛି।