ମୁମ୍ବାଇ,୧୮।୮: ମହାରାଷ୍ଟ୍ରରେ ଏକ ଅଭାବନୀୟ ଘଟଣା ଘଟିଛି। ଜଣେ ଯୁବକଙ୍କୁ ପ୍ଲାଟଫର୍ମରୁ ଟ୍ରାକ୍କୁ ଠେଲି ଦେଇଛନ୍ତି ଦମ୍ପତି। ଫଳରେ ଟ୍ରେନରେ କଟି ଯୁବକଙ୍କ ମୃତ୍ୟୁ ହୋଇଛି। ସିଓନ ଷ୍ଟେଶନରେ ଏହି ଘଟଣା ଘଟିଥିବା ଜଣାପଡିଛି। ଏହି ଘଟଣାରେ ପୋଲିସ ଦମ୍ପତିଙ୍କୁ ଗିରଫ କରିଛି।
ଦାଦର ସରକାରୀ ରେଳ ପୋଲିସ (ଜିଆରପି) ଅନୁଯାୟୀ, ମୃତ ଯୁବକ ଜଣକ ହେଲେ ଘନସୋଲିର ବାସିନ୍ଦା ଦିନେଶ ଦେବରାଓ ରାଥୋଡ। ସେ ସିଓନର ଏକ ଘରୋଇ ସଂସ୍ଥାରେ କାମ କରୁଥିଲେ। ଜିଆରପି ଅଧିକାରୀଙ୍କ କହିବାନୁସାରେ, ଅବିନାଶ ମେନ(୩୨) ଏବଂ ଶୀତଲ ମେନ(୩୦)ନାମକ ଏକ ଦମ୍ପତି ଗତ ରବିବାର ରାତି ପ୍ରାୟ ୯.୧୧ ସମୟରେ ପ୍ଲାଟଫର୍ମ ନମ୍ବର ୱାନରେ ଯାଉଥିବା ଏକ ଟ୍ରେନକୁ ଅପେକ୍ଷା କରିଥିଲେ। ଶୀତଲ ପ୍ଲାଟଫର୍ମ ଶେଷ ଆଡକୁ ଟ୍ରେନକୁ ଅପେକ୍ଷା କରିଥିଲେ ଏବଂ ତାଙ୍କ ସ୍ବାମୀ କିଛି ବାଟ ଦୂରରେ ଥିଲେ। ଏହି ସମୟରେ ରାଥୋଡ ଛତାରେ ଶୀତଲଙ୍କୁ କେଞ୍ଚିଥିଲେ। ଉଦ୍ଦେଶ୍ୟମୂଳକ ଭାବରେ ସେ ତାହା କରୁଥିବା ଶୀତଲ ଅନୁଭବ କରି ନିଜ ଛତା ଉଠାଇ ତାଙ୍କୁ ମାରିବା ଆରମ୍ଭ କରିଥିଲେ।
ଏହି ବିବାଦ ଦେଖି ଅବିନାଶ ଏଥିରେ ହସ୍ତକ୍ଷେପ କରି ରାଥୋଡଙ୍କୁ ଆକ୍ରମଣ କରିଥିଲେ। ପରେ ପ୍ଲାଟଫର୍ମରୁ ଠେଲି ଦେଇଥିଲେ। ରାଥୋଡ ଭାରସାମ୍ୟ ହରାଇ ଟ୍ରାକରେ ପଡ଼ିଯାଇଥିଲେ। ସେ ଠିଆ ହୋଇ ପ୍ଲାଟଫର୍ମକୁ ଚଢିବାକୁ ଚେଷ୍ଟା କରୁଥିବାବେଳେ ଛତ୍ରପତି ଶିବାଜୀ ମହାରାଜ ଟର୍ମିନାସ ନିକଟରୁ ଆସୁଥିବା ଏକ ଟ୍ରେନ ତାଙ୍କୁ ଧକ୍କା ଦେଇଥିଲା। ଫଳରେ ସେ ଗୁରୁତର ଆହତ ହୋଇଥିଲେ।
ରେଳ କର୍ମଚାରୀମାନେ ରାଥୋଡଙ୍କୁ ସ୍ଥାନୀୟ ଡାକ୍ତରଖାନାରେ ଭର୍ତ୍ତି କରିଥିଲେ। ସେଠାରେ ତାଙ୍କର ମୃତ୍ୟୁ ଘଟିଥିଲା। ତାଙ୍କ ମୃତ୍ୟୁପରେ ଦାଦର ଜିଆରପି ପ୍ରଥମେ ଅପମୃତ୍ୟୁ ମାମଲା ରୁଜୁ କରିଥିଲା।
ଅନୁସନ୍ଧାନ ସମୟରେ ଜିଆରପି ଅଧିକାରୀମାନେ ପ୍ଲାଟଫର୍ମର ସିସିଟିଭି ରେକର୍ଡିଂ ଯାଞ୍ଚ୍ କରିଥିଲେ। ରାଥୋଡଙ୍କୁ ଦମ୍ପତି ଟ୍ରାକକୁ ଠେଲି ଦେଇଛନ୍ତି। ଏହା ପରେ ପୋଲିସ ସମ୍ପୃକ୍ତ ବିରୋଧରେ ଏକ ମାମଲା ରୁଜୁ କରିଥିଲା। ଦମ୍ପତିଙ୍କ ଗତିବିଧି ଅନୁସରଣ କରି ସେମାନେ ମାନଖର୍ଡରେ ରହୁଥିବା ଜଣାପଡିଥିଲା। ସେଠାରୁ ତାଙ୍କୁ ଗିରଫ କରାଯାଇଥିଲା।