ନୂଆଦିଲ୍ଲୀ: ଭାରତୀୟ ରେଳ ବିଭାଗ ଏକ ନୂତନ ରେକର୍ଡ ସୃଷ୍ଟି କରିଛି। ଦେଶରେ ପ୍ରଥମ ଥର ପାଇଁ ୨ କିଲୋମିଟର ଲମ୍ବା ଟ୍ରେନ୍ ଚଳାଚଳ କରୁଛି। ଏହି ଟ୍ରେନର ନାମ ‘ସୁପର ଆନାକୋଣ୍ଡା’ ରଖାଯାଇଛି। ରେଳମନ୍ତ୍ରୀ ପିୟୁଷ ଗୋୟଲ ସୋସିଆଲ ମିଡିଆରେ ଟ୍ରେନର ଭିଡିଓ ଶେୟାର କରିଥିବାବେଳେ ଏହାକୁ ‘ସୁପର ଆନାକୋଣ୍ଡା’ ବୋଲି କହିଛନ୍ତି। ସେ ଟୁଇଟ୍ କରି ଲେଖିଛନ୍ତି, ଟ୍ରାକ୍ରେ ୧୭୭ ଓ୍ବାଗନ୍ ଥିବା ଏହି ଟ୍ରେନ୍ ଚଳାଇବା ଭାରତୀୟ ରେଳବାଇ ପାଇଁ ଏକ ବଡ଼ ସଫଳତା।
ପ୍ରକୃତପକ୍ଷେ, ଦକ୍ଷିଣ ପୂର୍ବ କେନ୍ଦ୍ରୀୟ ରେଳବାଇ ୨ଟି ମାଲବାହୀ ଟ୍ରେନ୍ ଯୋଗ କରି ଏହି ନୂତନ ରେକର୍ଡ ସୃଷ୍ଟି କରିଛି। ଏହି ଟ୍ରେନ ‘ଆନାକୋଣ୍ଡା ଫର୍ମେସନ’ରେ ଓଡ଼ିଶାର ଲାଜକୁରା ଏବଂ ରାଉରକେଲା ମଧ୍ୟରେ ଚାଲିଥିଲା। ଉକ୍ତ ଟ୍ରେନରେ ସମୁଦାୟ ୧୫୦୦୦ ଟନ୍ ସାମଗ୍ରୀ ରହିଥିଲା। ସମୟ ବଞ୍ଚାଇବା ପାଇଁ ଏହି ଅନନ୍ୟ ପରୀକ୍ଷଣ କରାଯାଇଥିଲା। ରେଳବାଇ ପାଇଁ ଏହି ଟ୍ରେନ ଚଳାଇବା ଚ୍ୟାଲେଞ୍ଜ ସଦୃଶ ଥିଲା। କାରଣ ଏହା ମାଲବାହୀ ଟ୍ରେନ ବ୍ୟସ୍ତବହୁଳ ଟ୍ରାକ୍ରେ ଗଡ଼ିଥିଲା।
ପରେ ଏହି ଟ୍ରେନ୍ରେ ତିନୋଟି ମାଲବାହୀ ଟ୍ରେନ୍ ଏକାଠି କରାଯାଇଥିଲା। ଯେଉଁଥିରେ ୧ କୋଟିରୁ ଅଧିକ ମୂଲ୍ୟର ସାମଗ୍ରୀ ବିଳାସପୁର ଏବଂ ଚକ୍ରଧରପୁର ବିଭାଗ ମାଧ୍ୟମରେ ପରିବହନ କରାଯାଇଥିଲା। ଏହି ମାଲବାହୀ ଟ୍ରେନର ସର୍ବାଧିକ ବେଗ ଘଣ୍ଟା ପ୍ରତି ୬୦କିଲୋମିଟର ଥିଲା।
ବ୍ରଜଜନଗର ନିକଟ ଲାଜକୁରାଠାରୁ ଆରମ୍ଭ କରି ଏହି ‘ସୁପର ଆନାକୋଣ୍ଡା’ ରେକର୍ଡ ସମୟ ୨ ଘଣ୍ଟା ୧୫ ମିନିଟ୍ରେ ରାଉରକେଲା ଷ୍ଟେଶନରେ ପହଞ୍ଚିଥିଲା। ଜଣେ ବରିଷ୍ଠ ରେଳ ଅଧିକାରୀ କହିଛନ୍ତି, ଥରେ ତିନୋଟି ମାଲବାହୀ ଟ୍ରେନ ଚଳାଇବା ଏକ ରୋମାଞ୍ଚକର ଅନୁଭୂତି ଅଟେ।
ଏଥିପାଇଁ ୬୦୦୦ ହର୍ସ ପାଓ୍ବାର ବିଶିଷ୍ଟ ୩ ଟି ଇଲେକ୍ଟ୍ରିକ ଇଞ୍ଜିନ ଲଗାଯାଇଥିଲା। ଏହାକୁ ମୁଖ୍ୟ ଲୋକୋ ପାଇଲଟ୍ ରାନ୍ଧୀର କୁମାର ଏବଂ ରାୟଗଡ଼ରୁ ଗାର୍ଡ ଏସ୍ ମଲ୍ଲିକ ପରିଚାଳନା କରିଥିଲେ। ଏହି ଲୋକୋ ପାଇଲଟ୍ ଟିମ୍ରେ ୬ ଜଣ ଲୋକୋ ପାଇଲଟ୍ ଏବଂ ଜଣେ ସହାୟକ ଲୋକୋ ପାଇଲଟ୍ ଥିଲେ।