କୋଲକାତା,୧୨ା୮: ପଶ୍ଚିମବଙ୍ଗର ରାଜଧାନୀ କୋଲକାତାସ୍ଥିତ ଆର୍ଜି କର ମେଡିକାଲ କଲେଜ ଏବଂ ହସ୍ପିଟାଲରେ ଜଣେ ମହିଳା ଟ୍ରେନି ବା ପ୍ରଶିକ୍ଷକ ଡାକ୍ତରଙ୍କୁ ବଳାତ୍କାର ଓ ହତ୍ୟା କରିଥିବା ଅଭିଯୁକ୍ତଙ୍କୁ ପୋଲିସ ଗିରଫ କରିଛି। ଅଭିଯୁକ୍ତ ଜଣକ ସଞ୍ଜୟ ରାୟ ବୋଲି ଜଣାପଡ଼ିଛି, ଯିଏ ଡାକ୍ତରଖାନାର କର୍ମଚାରୀ ନୁହନ୍ତି। କିନ୍ତୁ ତାଙ୍କୁ ପ୍ରାୟତଃ କ୍ୟାମ୍ପସ୍ ଭିତରେ ଦେଖିବାକୁ ମିଳୁଥିଲା। ଶନିବାର (ଅଗଷ୍ଟ ୧୦) ପୋଲିସ ଅଭିଯୁକ୍ତଙ୍କୁ ଗିରଫ କରିଥିଲା। ବର୍ତ୍ତମାନ ସେ ୧୪ ଦିନ ପାଇଁ ନ୍ୟାୟିକ ହେପାଜତରେ ଅଛନ୍ତି।
ଏକ ରିପୋର୍ଟ ଅନୁଯାୟୀ, ସଞ୍ଜୟ କୋଲକାତା ପୋଲିସ ସହିତ ନାଗରିକ ସ୍ବେଚ୍ଛାସେବୀ ଭାବେ କାମ କରୁଥିଲେ। ଟ୍ରାଫିକ ପରିଚାଳନା ତଥା ବିପର୍ଯ୍ୟୟର ମୁକାବିଲା ଭଳି ବିଭିନ୍ନ କାର୍ଯ୍ୟରେ ପୋଲିସକୁ ସାହାଯ୍ୟ କରିବା ପାଇଁ ନାଗରିକ ସ୍ବେଚ୍ଛାସେବୀମାନଙ୍କୁ ନିଯୁକ୍ତି ଦିଆଯାଇଛି। ଚୁକ୍ତିନାମା ଅନୁଯାୟୀ ସେମାନଙ୍କୁ ନିଯୁକ୍ତି ଦିଆଯାଏ। ନାଗରିକ ସ୍ବେଚ୍ଛାସେବୀମାନଙ୍କୁ ମଧ୍ୟ ପ୍ରତି ମାସରେ ୧୨୦୦୦ଟଙ୍କା ଦରମା ଦିଆଯାଏ। ତଥାପି ସେମାନେ ନିୟମିତ ସେବା ପାଆନ୍ତି ନାହିଁ।
ପୋଲିସ ପଚରାଉଚରା ଆରମ୍ଭ କରିବା ମାତ୍ରେ ଅଭିଯୁକ୍ତ ସଞ୍ଜୟ ତାଙ୍କ ଅପରାଧ ସ୍ବୀକାର କରିଛନ୍ତି। ଏହି ଜଘନ୍ୟ ଅପରାଧ ପାଇଁ ତାଙ୍କର କୌଣସି ଡର ଭୟ କିମ୍ବା ଲାଜ ମଧ୍ୟ ନ ଥିଲା କି ଅନୁତାପ ମଧ୍ୟ ନ ଥିଲା। ସେ ପୋଲିସକୁ କହିଥିଲେ, ଯଦି ତୁମେ ଚାହଁ ମୋତେ ଫାଶୀରେ ଝୁଲାଇ ଦିଅ। ସଞ୍ଜୟ ତାଙ୍କ ମୋବାଇଲରେ ଅଶ୍ଳୀଳ ଭିଡିଓ ଦେଖୁଥିଲେ। ସିସିଟିଭି କ୍ୟାମେରା ଫୁଟେଜ୍ ଜରିଆରେ ଅଭିଯୁକ୍ତଙ୍କୁ ଚିହ୍ନଟ କରାଯାଇ ଗିରଫ କରାଯାଇଥିଲା।
ହତ୍ୟା ଓ ବଳାତ୍କାର କରିବା ପରେ ଅଭିଯୁକ୍ତ ତାଙ୍କ ଘରକୁ ଯାଇ ଶୋଇଥିଲେ। ଯେତେବେଳେ ସେ ଉଠିଲେ ପ୍ରମାଣ ହଟାଇବା ପାଇଁ ସେ ନିଜ ପୋଷାକ ମଧ୍ୟ ଧୋଇଥିଲେ। ପୋଲିସ ତାଙ୍କ ଜୋତାରେ ରକ୍ତ ଦାଗ ଲାଗିଥିବାର ଜବତ କରିଛି। ବର୍ତ୍ତମାନ ଅଭିଯୁକ୍ତ ୨୩ ଅଗଷ୍ଟ ପର୍ଯ୍ୟନ୍ତ ପୋଲିସ ହେପାଜତରେ ରହିବେ।