ଭୁବନେଶ୍ୱର, ୨।୪ (ବ୍ୟୁରୋ): ରାଜ୍ୟରେ ଗଞ୍ଜେଇ ଚୋରାଚାଲାଣ ଦିନକୁ ଦିନ ବଢ଼ିବାରେ ଲାଗିଛି। ଗଞ୍ଜେଇ ବେପାରିମାନେ ନୂଆ ନୂଆ କୌଶଳ ଅବଲମ୍ବନ କରି ରାଜ୍ୟ ତଥା ରାଜ୍ୟ ବାହାରକୁ ଚୋରା ଚାଲାଣ କରିବାରେ ସକ୍ରିୟ ହୋଇପଡିଛନ୍ତି। କେତେବେଳେ କଖାରୁ ବୋଝେଇ ଗାଡିରୁ ତ ପୁଣି କେତେବେଳେ କଦଳୀ ଗାଡିରେ ଗଞ୍ଜେଇ ଚାଲାଣ କରୁଛନ୍ତି। ତେବେ ପୋଲିସ ହାତରେ ଧରାପଡିବା ପରେ ଚୋରା ଚାଲାଣକାରୀମାନେ କୌଶଳ ବଦଳାଉଛନ୍ତି। ରାସ୍ତା ପଥରେ ନ ଯାଇ ନ ଯାଇ ଟ୍ରେନକୁ ଗଳା ବାଟ କରି କୋଟି କୋଟି ଟଙ୍କାର ଗଞ୍ଜେଇ ଚୋରାଚାଲାଣ କରୁଛନ୍ତି। ଭୁବନେଶ୍ୱର ରେଳ ଷ୍ଚେଶନରୁ ୨୦୨୦ ମସିହାରେ ରେଲ୍ଓ୍ବେ ପୋଲିସ ୫୬୬.୧ କେଜି ଗଞ୍ଜେଇ ଜବତ କରିଥିଲା। ୯ଟି ମାମଲା ରୁଜୁ କରାଯାଇ ମୋଟ ୧୮ ଜଣଙ୍କୁ ଗିରଫ କରିଯାଇଥିଲା। ଗିରଫ ବ୍ୟକ୍ତିଙ୍କ ମଧ୍ୟରୁ ପୁରୁଷ ୧୩ ଜଣ ହୋଇଥିବା ବେଳେ ୫ ଜଣ ମହିଳା ଅଛନ୍ତି। ସେହିପରି ୨୦୨୧ରେ ଗଞ୍ଜେଇ ଚୋରାଚାଲାଣ ସାମନ୍ୟ ହ୍ରାସ ପାଇଥିବାବେଳେ ଗିରଫ ସଂଖ୍ୟା ବୃଦ୍ଧି ପାଇଛି। ଉକ୍ତ ବର୍ଷକରେ ୩୩୨.୧ ଗଞ୍ଜେଇ ଜବତ କରାଯାଇଥିବାବେଳେ ମୋଟ ୨୩ ଜଣଙ୍କୁ ଗିରଫ କରାଯାଇଛି। ତେବେ ଏଠି ପ୍ରଶ୍ନ ଉଠୁଛି ଟ୍ରେନର ମୁଖ୍ୟ ଫାଟକଠୁ ଆରମ୍ଭ କରି ଷ୍ଟେଶନ ପରିସରରେ ରେଲ୍ଓ୍ବେ ପୋଲିସ ୨୪ ଘଣ୍ଟା ପଇଁତାର ମାରୁଥିବା ସତ୍ତ୍ୱେ ବେପାରୀମାନେ ଟ୍ରେନ ମାଧ୍ୟମରେ ଗୋଟିଏ ସ୍ଥାନରୁ ଅନ୍ୟ ସ୍ଥାନକୁ ଯାଉଛନ୍ତି କିପରି ? ସେହିପରି ଟ୍ରେନରେ ଅଧିକାଂଶ ଯାତ୍ରୀ ଯାତ୍ରା କରୁଥିବାରୁ ଚେକିଂରେ ଢିଲା ହୋଇଥିବା ଦେଖି ଟ୍ରେନକୁ ଗଳା ବାଟ କରି ଗଞ୍ଜେଇ ଚୋରାଚାଲାଣ କରୁନାହାନ୍ତି ତ ? ଏନେଇ ଜିଆର୍ପି ଥାନା ଆଇଆଇସିଙ୍କୁ ପଚାରିବାରୁ ସେ କହିଛନ୍ତି, ଯେଉଁମାନେ ଚୋରାଚାଲାଣ କରୁଛନ୍ତି, ନଜର ପଡିଲେ ସେମାନଙ୍କୁ ସଙ୍ଗେ ସଙ୍ଗେ ଗିରଫ କରାଯାଉଛି।
