ଢେଙ୍କାନାଳ ଅଫିସ,୬ା୧୦: ଜଗତପୁର ଅଞ୍ଚଳରୁ ଗତ ୨୯ ତାରିଖରେ ମଣିଷ ମାରି ଆତଙ୍କ ସୃଷ୍ଟି କରିଥିବା ୩୫ ବର୍ଷର ମାଈ ହାତୀକୁ ଟ୍ରାଙ୍କୁଲାଇଜର କରି ଢେଙ୍କାନାଳ ଜିଲା କପିଳାସ ପ୍ରାଣୀଉଦ୍ୟାନରେ ଥିବା ହାତୀ ଉଦ୍ଧାର କେନ୍ଦ୍ରକୁ ଆଣାଯାଇଥିଲା। ସେଠାରେ ମାଈ ହାତୀକୁ କ୍ରଲ ମଧ୍ୟରେ ରଖି ଚିକିତ୍ସା କରାଯାଉଥିଲା। ମା’ ହାତୀଟି ତା’ର ଛୁଆକୁ ଖୋଜିବା ସହିତ ଗର୍ଜନ କରୁଥିଲା । ଏଣେ ଅଣ୍ତିରା ଛୁଆ ହାତୀ ମା’କୁ ଖୋଜି ଖୋଜି ଜଗତପୁର ଅଞ୍ଚଳରୁ ବିରୂପା ନଦୀ ପାର ହୋଇ ଟାଙ୍ଗୀ ଦେଇ କପିଳାସ ଅଭୟାରଣ୍ୟରେ ପଶିଥିଲା। ଛୁଆ ହାତୀର ଗତିବିଧି ଉପରେ ନଜର ରଖୁଥିବା କଟକ ଜିଲା ବନ କର୍ମଚାରୀମାନେ ଏ ସମ୍ପର୍କରେ ଢେଙ୍କାନାଳ ଜିଲା ବନ ଅଧିକାରୀ ଓ କର୍ମଚାରୀଙ୍କୁ ଜଣାଇଥିଲେ। ଛୁଆ ହାତୀକୁ କପିଳାସ ଆଭୟାରଣ୍ୟରେ ଥିବା ଅନ୍ୟ ଦଳର ହାତୀମାନେ ପାଖରେ ପୂରାଇ ନ ଥିଲେ। ଫଳରେ ହାତୀଛୁଆଟି ଅଭୟାରଣ୍ୟ ନିକଟସ୍ଥ ଢେଙ୍କାନାଳ ଜିଲାର ଷୋରିଷିଆପଦା ଗ୍ରାମରେ ବିଲରେ ପଶି ଧାନ ଖାଇଥିଲା। ଗ୍ରାମବାସୀ ଉତ୍ତ୍ୟକ୍ତ ହୋଇ ବନ ବିଭାଗକୁ ଖବର ଦେଇଥିଲେ। ଡିଏଫ୍ଓଙ୍କ ନେତୃତ୍ୱରେ ବନ ବିଭାଗ ପକ୍ଷରୁ ୨ ତାରିଖ ରାତିରେ ହାତୀ ଛୁଆଟିକୁ ଟ୍ରାଙ୍କୁଲାଇଜର କରାଯାଇ କପିଳାସ ହାତୀ ଉଦ୍ଧାର କେନ୍ଦ୍ରକୁ ଆଣିଥିଲେ। ସେଠାରେ ମାଆ ଛୁଆଙ୍କ ମିଳନ ଏକ ହୃଦୟସ୍ପର୍ଶୀ ହୋଇଥିଲା। ଛୁଆକୁ ନ ଦେଖି ଗର୍ଜୁଥିବା ହାତୀ ଶାନ୍ତ ହୋଇ ଛୁଆକୁ କୋଳେଇ ନେଇଥିଲା। ଏହାପରେ ୩ ତାରିଖ ରାତିରେ ମା’ ଓ ଛୁଆକୁ ଏକ ଗାଡ଼ିରେ ନେଇ ଜିଲାର ହିନ୍ଦୋଳ ରେଞ୍ଜ ସୀମା ତଥା ନରସିଂହପୁର ଓ ସାତକୋଣିଆ ସୀମାରେ ପ୍ରବଳ ବର୍ଷାରେ ଜଙ୍ଗଲରେ ଛାଡ଼ି ଦିଆଯାଇଥିଲା। ଏହି ଘଟଣା ରାଜ୍ୟରେ ପ୍ରଥମ। ଏହାର ପ୍ରତିବାଦରେ ହିନ୍ଦୋଳ ରେଞ୍ଜ ଦଣ୍ଡିରି ବିଟ୍ ହାଉସଠାରେ ଅଞ୍ଚଳବାସୀ ଧାରଣା ଦେଇଛନ୍ତି। କିନ୍ତୁ ମା’ ଓ ଛୁଆହାତୀ ଗ୍ରାମଠାରୁ ବହୁ ଦୂରରେ ଥିବା ବନବିଭାଗ ସୂତ୍ରରୁ ପ୍ରକାଶ।