ରସୁଲପୁର,୨୦ା୫(ଡି.ଏନ.ଏ.): କୁଆଖିଆ ବିଦ୍ୟୁତ୍ ସେକ୍ସନ ଅଧୀନ ଭୋଟକା ପଞ୍ଚାୟତର ଶାରଳା ଛକ ଓ ପଞ୍ଚାୟତ ଅଫିସ ହନୁମାନ ମନ୍ଦିର ନିକଟରେ ଟ୍ରାନ୍ସଫର୍ମର ସ୍ଥାପନ କରାଯାଇଛି। ତେବେ ଛକକୁ ଦୈନିକ ଶତାଧିକ ଲୋକ ଯାଆସ କରୁଛନ୍ତି। ଏହି ବାଟ ଦେଇ ବହୁ ଲୋକ ପଞ୍ଚାୟତ ବାହାରକୁ ଯାଉଛନ୍ତି। ତେବେ ଏହି ଛକର ରାସ୍ତାକଡରେ ବସିଥିବା ଟ୍ରାନ୍ସଫର୍ମରଟି ମୁକୁଳା ପଡ଼ିଛି। ସେହିଭଳି ହନୁମାନ ମନ୍ଦିର ନିକଟରେ ବସିଥିବା ଟ୍ରାନ୍ସଫର୍ମର ନିକଟରେ ଅନୁରୂପ ଅବସ୍ଥା ଦେଖିବାକୁ ମିଳିଛି। ଏହି ସ୍ଥାନକୁ ଦୈନିକ ବହୁ ଭକ୍ତ ମନ୍ଦିରକୁ ଆସୁଛନ୍ତି। ଏହାଛଡ଼ା ଏଠାରେ ଏକ ବିଦ୍ୟାଳୟ ରହିଛି। ଏହିଭଳି ଭାବରେ ଜନସମାଗମ ହେଉଥିବା ସ୍ଥାନରେ ସୁରକ୍ଷିତ ବିଦ୍ୟୁତ୍ ସେବାକୁ ବିଭାଗ ପକ୍ଷରୁ ଅଣଦେଖା କରାଯାଉଛି। ନିୟମାନୁଯାୟୀ ଟ୍ରାନ୍ସଫର୍ମର ସ୍ଥାପନ ହେଉଥିବା ସ୍ଥାନରେ ବିଭାଗ ପକ୍ଷରୁ ସୁରକ୍ଷାବାଡ଼ ଲଗାଇବା ବାଧ୍ୟତାମୂଳ ରହିଛି। ତେବେ ଠିକାଦାରଙ୍କ ପକ୍ଷରୁ ଟ୍ରାନ୍ସଫର୍ମର ବସାଇବା ସମୟରେ ବିଭାଗ ଏହାକୁ ଅଣଦେଖାକରି ଠିକାଦାର ପ୍ରତି ଅନୁକମ୍ପା ଦେଖାଇଥିବା କୁହାଯାଉଛି। ଏପରି କି ଟ୍ରାନ୍ସଫର୍ମରକୁ ସଂଯୋଗ କରୁଥିବା ୧୧କେ.ଭି. ଲାଇନ କମ୍ ଉଚ୍ଚତାରେ ଝୁଲୁଛି। ତାରର ଏଭଳି ସ୍ଥିତି ଧନଜୀବନପ୍ରତି ବିପଦ ସୃଷ୍ଟି କରୁଛି। ବିଦ୍ୟୁତ ସରବାରାହ ଓ ମରାମତି ଦାୟିତ୍ୱରେ ଥିବା ଟାଟା ପାୱାର ଏଥିପ୍ରତି ଧ୍ୟାନ ଦେଉ ନ ଥିବା ଅଭିଯୋଗ ହେଉଛି। ତେଣୁ ବିଭାଗ ପକ୍ଷରୁ କରାଯାଇଥିବା ତ୍ରୁଟି ଓ ଅବହେଳାରେ ତୁରନ୍ତ ସୁଧାର ଆଣିବାକୁ ଦାବି ହୋଇଛି। ଏଥିରେ ବିଳମ୍ବ ଘଟିଲେ ବିଦ୍ୟୁତ୍ ଜନିତ ଦୁର୍ଘଟଣାରେ ଜୀବନହାନୀ ଘଟିବାର ସମ୍ଭାବନାକୁ ଏଡ଼ାଇ ଦିଆଯାଇ ନ ପାରେ। ଏନେଇ ବିଭାଗୀୟ କନିଷ୍ଠ ଯନ୍ତ୍ରୀ ସୟଦ ଇବ୍ରାର ଅଲ୍ଲୀଙ୍କୁ ପଚାରିବାରୁ ଏଭଳି ସ୍ଥିତି ପ୍ରତି ସେ ଅବଗତ ନାହାନ୍ତି। ଉକ୍ତ ସ୍ଥାନଗୁଡିକୁ ପରିଦର୍ଶନ କରିବା ସହ ଆବଶ୍ୟକ ପଦକ୍ଷେପ ନେବେ ବୋଲି ମତ ରଖିଛନ୍ତି।