ଭୁବନେଶ୍ୱର,୩୦।୬(ବ୍ୟୁରୋ):କରୋନା କଟକଣା ଭିତରେ ଓଡ଼ିଶାରୁ ଟ୍ରେନ୍ରେ ବାହାରକୁ ଚାଲାଣ ହେଉଛି ଗଞ୍ଜେଇ। ଏହି କାରବାରରେ ସମ୍ପୃକ୍ତ ହେଉଛନ୍ତି କିନ୍ନର। ସୋମବାର ଗୁଜରାଟର ସୁରଟକୁ ଚାଲାଣବେଳେ ଆର୍ପିଏଫ୍ ଓ କ୍ରାଇମବ୍ରାଞ୍ଚ ମିଳିତ ଭାବେ ଭୁବନେଶ୍ୱର ରେଳ ଷ୍ଟେଶନରେ ଚଢାଉ କରି ଦୁଇ ଚାଲାଣକାରୀ କିନ୍ନରଙ୍କୁ ଗିରଫ କରିଛି। ସେମାନେ ହେଲେ ଗଞ୍ଜାମ ଜିଲା ବେଗୁନିଆପଡା ଥାନା ଖଞ୍ଚଣା ଗ୍ରାମର ଲକ୍ଷ୍ମୀଧର ମହାନ୍ତି ଓରଫ ଲିଜା(୨୫) ଓ ବସନ୍ତ ସ୍ବାଇଁ(୩୪)। ସେମାନଙ୍କଠାରୁ ୧୫ କେଜି ଗଞ୍ଜେଇ ଜବତ ହୋଇଛି। ଏହାର ଆନୁମାନିକ ମୂଲ୍ୟ ଦେଢ ଲକ୍ଷ ଟଙ୍କା ହେବ। ଅଭିଯୁକ୍ତଙ୍କୁ ହସ୍ତାନ୍ତର ପରେ ଜିଆର୍ପି ଥାନାରେ ମାମଲା(୪୬/୨୧) ରୁଜୁ ହୋଇଛି। ଏଥିରେ ଆଉ କେଉଁମାନଙ୍କର ସମ୍ପୃକ୍ତି ରହିଛି ସେନେଇ ପୋଲିସ ଅଧିକ ତଦନ୍ତ ଚଳାଇଛି।
ପୋଲିସ ସୂଚନା ଅନୁଯାୟୀ, କିନ୍ନର ଲିଜା ଓ ବସନ୍ତ ଦୁଇବର୍ଷ ତଳେ ଟ୍ରେନରେ ବୁଲି ଯାତ୍ରୀଙ୍କଠାରୁ ଟଙ୍କା ମାଗୁଥିଲେ। ଏହାପରେ ସେମାନେ ବିଭିନ୍ନ ବିବାହ ଉତ୍ସବରେ ନୃତ୍ୟ ପରିବେଷଣ କରି ରୋଜଗାର କରୁଥିଲେ। ତେବେ କେବେଠୁ ଓ କାହା ଦ୍ୱାରା ଗଞ୍ଜେଇ କାରବାରରେ ସାମିଲ ହୋଇଛନ୍ତି ସେନେଇ ପଚରାଉଚରା ଚାଲିଛି। ସୁରଟରେ ରହୁଥିବା ଓଡିଆ ଶ୍ରମିକଙ୍କ ପାଇଁ ସେମାନେ ଏହି ଗଞ୍ଜେଇ ଚାଲାଣ କରୁଥିଲେ ବୋଲି ସେମାନେ କହିଛନ୍ତି। ସୋମବାର ଅପରାହ୍ନ ପ୍ରାୟ ସାଢ଼େ ୫ଟାରେ ଲିଜା ଓ ବସନ୍ତ ଖୋର୍ଦ୍ଧା ଜିଲା ବାଲୁଗାଁରୁ ପ୍ରଶାନ୍ତି ଏକ୍ସପ୍ରେସରେ ଚଢି ଭୁବନେଶ୍ୱରରେ ୬ଟା ୩୦ରେ ପହଞ୍ଚତ୍ଥିଲେ। ସେମାନେ ଗାନ୍ଧୀଧାମ ଏକ୍ସପ୍ରେସରେ ସୁରଟ ଯିବା ପାଇଁ ଷ୍ଟେଶନରେ ଅପେକ୍ଷା କରିଥିଲେ। ଗଞ୍ଜେଇ ଚାଲାଣ ସଂକ୍ରାନ୍ତରେ ସୂଚନା ପାଇବା ପରେ ଆରପିଏଫ୍ ଏବଂ କ୍ରାଇମବ୍ରାଞ୍ଚ ଟ୍ରେନ୍ ଓ ଷ୍ଟେଶନ ପରିସରକୁ ତନ୍ନତନ୍ନ କରି ଯାଞ୍ଚ କରି ବହୁ ସମୟ ପରେ ଏକ ଲଗେଜରୁ ଗଞ୍ଜେଇ ଠାବ କରିଥିଲେ।