ବ୍ରହ୍ମପୁର ଅଫିସି,୬।୭: ଗଞ୍ଜାମ ଜିଲା କୁକୁଡଡାଖଣ୍ଡି ବ୍ଲକ ଅନ୍ତର୍ଗତ ଲାଠୀ ପଞ୍ଚାୟତର ବେନ୍ଦାଳିଆ ଗ୍ରାମର ଜଣେ ଚାଷୀ କରୋନାରେ ସଂକ୍ରମିତ ହୋଇଛନ୍ତି। ଘଟଣା ଜଣାପଡ଼ିବା ପରେ ସୋମବାର କୁକୁଡ଼ାଖଣ୍ଡି ତହସିଲଦାର ଡ. ଇପ୍ସିତା ପ୍ରିୟଦର୍ଶିନୀ ମିଶ୍ର ଉକ୍ତ ଗ୍ରାମରେ ପହଞ୍ଚି ଲୋକମାନଙ୍କୁ ସଚେତନ କରିଛନ୍ତି । ସମ୍ପୃକ୍ତ ଚାଷୀଙ୍କ ଘରେ ଥିବା ତାଙ୍କ ସ୍ତ୍ରୀ ଓ ଝିଅଙ୍କୁ ଗୃହ ସଂଗରୋଧରେ ରହିବାକୁ ସେ ପରାମର୍ଶ ଦେଇଛନ୍ତି । ଏହା ସହ ତାଙ୍କ ଘର କାନ୍ଥରେ କୋଭିଡ଼ -୧୯ ସମ୍ପର୍କିତ ଏକ ପେପର ଛପାଇ ଦେଇଛନ୍ତି। ସେହିପରି ସଂକ୍ରମିତ ବ୍ୟକ୍ତି ଜଣଙ୍କ କାହା ସଂସ୍ପର୍ଶରେ ଆସିଛନ୍ତି ସେମାନଙ୍କର କଣ୍ଟାକ୍ଟ ଟ୍ରେସିଂ ଆରମ୍ଭ ହୋଇଛି। ଆଶା କର୍ମୀ ଓ ଡାକ୍ତରୀ ଦଳ କାମ ଆରମ୍ଭ କରୁଥିବା ସେ ସୂଚନା ଦେଇଛନ୍ତି । ଅଗ୍ନିଶମ ବାହିନୀ ଗ୍ରାମରେ ପହଞ୍ଚି ସାରା ଗାଁ ବିଶୋଧନ କରିଛି। ତହସିଲଦାର ଗ୍ରାମବାସୀଙ୍କୁ ଗାଁ ବାହାରକୁ ନ ଯିବାକୁ ପରାମର୍ଶ ଦେଇଛନ୍ତି। ଅନ୍ୟପଟେ ଚାଷୀଙ୍କ ପରିବାର ଲୋକ ବାହାରକୁ ନ ଯିବାକୁ ମଧ୍ୟ ସେ ପରାମର୍ଶ ଦେଇଛନ୍ତି। ସେମାନଙ୍କ ଆବଶ୍ୟକ ପ୍ରତ୍ୟେକ ସାମଗ୍ରୀ ପଞ୍ଚାୟତ ତରଫରୁ ଯୋଗାଇଦିଆଯିବ ବୋଲି ତହସିଲଦାର କହିଛନ୍ତି ।
ସୂଚନାନୁଯାୟୀ, ସମ୍ପୃକ୍ତ ଚାଷୀ ଫସଲ ନେଇ ବ୍ରହ୍ମପୁର ବଡ଼ବଜାର ଅଞ୍ଚଳରେ ବିକ୍ରି କରୁଥିଲେ। ଗତ ଶୁକ୍ରବାର ଅସୁସ୍ଥ ଅନୁଭବ କରିବାରୁ ତାଙ୍କୁ ଏମ୍କେସିଜି ମେଡିକଲର ସଂଘରୋଧ କକ୍ଷରେ ଭର୍ତ୍ତି କରାଯାଇଥିଲା । ତାଙ୍କର ସ୍ବାବ ପରୀକ୍ଷା ପରେ ରବିବାର ତାଙ୍କ ରିପୋର୍ଟ ପଜିଟିଭ ଆସିବାରୁ ତାଙ୍କୁ ସିତଳାପଲ୍ଲୀସ୍ଥିତ କୋଭିଡ଼-୧୯ ହସ୍ପିଟାଲକୁ ସ୍ଥାନାନ୍ତର କରାଯାଇଥିଲା । ସେହିପରି ମେଡିକାଲରେ ତାଙ୍କ ପାଖରେ ଥିବା ତାଙ୍କର ୨ ପୁଅ ଏବେ ସଂଗରୋଧରେ ଅଛନ୍ତି।