ଖୋର୍ଦ୍ଧା ଅଫିସ,୬ା୭ : ରାଜ୍ୟରେ କରୋନା ସ୍ଥିତି ସଙ୍ଗିନ ହେବାରେ ଲାଗିଛି। ଜିଲାରେ ଆକ୍ରାନ୍ତଙ୍କ ସଂଖ୍ୟା ଉଦ୍ବେଗଜନକ ରହିଛି। ଅନ୍ୟପଟେ କେତେଜଣ ଅମାନିଆ ବିନା ମାସ୍କରେ ବୁଲୁଥିବା ବେଳେ ସାମାଜିକ ଦୂରତା ଏବଂ କୋଭିଡ-୧୯ ଗାଇଡଲାଇନକୁ ଖୋଲା ଉଲ୍ଲଂଘନ କରୁଛନ୍ତି। ଫଳରେ ଗୋଷ୍ଠୀ ସଂକ୍ରମଣ ବ୍ୟାପିବା ଆଶଙ୍କା ସୃଷ୍ଟି ହୋଇଛି। ଏନେଇ ଜିଲା ପ୍ରଶାସନ ପକ୍ଷରୁ କଡ଼ା ଆଭିମୁଖ୍ୟ ଗ୍ରହଣ କରାଯାଇଛି।
ସୋମବାର ପୁଣି ଥରେ ଖୋର୍ଦ୍ଧା ସହରର ପ୍ରମୁଖ ଜନହଗହଳି ସ୍ଥାନକୁ ବ୍ୟାରିକେଟ ବୁଲାଇ ସିଲ୍ କରାଯାଇଛି। ଜନସ୍ବାର୍ଥ ଏବଂ ଲୋକଙ୍କ ସୁରକ୍ଷା ଦୃଷ୍ଟିରୁ କୋଭିଡ ଗାଇଡଲାଇନକୁ କଡାକଡି କରାଯାଇଛି ବୋଲି ଜିଲାପାଳ ଶିତାଂଶୁ କୁମାର ରାଉତ କହିଛନ୍ତି। ଗତ ମାର୍ଚ୍ଚ, ଏପ୍ରିଲ ଏବଂ ମଇ ମାସ ଶେଷ ପର୍ଯ୍ୟନ୍ତ ଜନସାଧାରଣ କୋଭିଡ ଗାଇଡଲାଇନକୁ ପାଳନ କରୁଥିବା ବେଳେ ଜୁନ୍ ପହିଲା ଅନଲକ୍ ତଥା ନିୟମ କୋହଳ ହେବା ପରେ ଲୋକେ ଏହାକୁ ଖୋଲା ଉଲ୍ଲଂଘନ କରୁଛନ୍ତି। କେହି ନିୟମ ମାନିବାକୁ ପ୍ରସ୍ତୁତ ନୁହନ୍ତି। ଏଣୁ ଅମାନିଆଙ୍କୁ ସାବଡ କରିବା ତଥା ଲୋକଙ୍କ ହିତ ଦୃଷ୍ଟିରୁ ଏହି ପଦକ୍ଷେପ ଗ୍ରହଣ କରାଯାଇଛି। ଆସନ୍ତା ୩୧ ତାରିଖ ପର୍ଯ୍ୟନ୍ତ ସମସ୍ତ ପ୍ରମୁଖ ଛକ ସ୍ଥାନକୁ ବନ୍ଦ ରହିବ। ଏଣିକି ବିନା ମାସ୍କ ବୁଲିଲେ, ଦୋକାନୀ ମାନେ ସାମାଜିକ ଦୂରତା ପ୍ରତି ଗୁରୁତ୍ୱ ନ ଦେଲେ, କଡା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ବାଧ୍ୟତାମୂଳକ ଭାବେ ଜରିମାନା ଆଦାୟ କରାଯିବ। ପୂର୍ବ ଘୋଷଣା ଅନୁଯାୟୀ ସକାଳ ୬ଟାଠାରୁ ଅପରାହ୍ନ ୨ଟା ପର୍ଯ୍ୟନ୍ତ ଦୋକାନ ବଜାର ଖୋଲାରହିବ। ଏହା ପରେ କୌଣସି ଦୋକାନ ଖୋଲା ରହିଲେ, ଦୃଢ଼ କାର୍ଯ୍ୟାନୁଷ୍ଠାନ ନିଆଯିବ। ବିଭିନ୍ନ ଛକରେ ଯାନବାହନ ଯାଞ୍ଚ କଡାକଡି ହେବ। ସବୁ ଛକ ସ୍ଥାନରେ ପୋଲିସ ଓ ପ୍ରଶାସନିକ ଅଧିକାରୀଙ୍କୁ ମୁତୟନ କରାଯିବ। ଅତ୍ୟାବଶ୍ୟକ ନ ଥିଲେ, ଘରେ ରହିବାକୁ ଅନୁରୋଧ କରାଯାଉଛି। ତେବେ କହି ଏହାକୁ ମାନିବାକୁ ରାଜି ହେଉ ନଥିବା ବେଳେ ଏଣିକି ଆଉ ଅନୁରୋଧ ନୁହେଁ ଜରିମନା ଏବଂ କାର୍ଯ୍ୟାନୁଷ୍ଠାନ ନିଆଯିବ। ଘରେ ରୁହନ୍ତୁ ସୁରକ୍ଷିତ ରୁହନ୍ତୁ ବୋଲି ଜିଲାପାଳ ରାଉତ କହିଛନ୍ତି।