ବାହାରକୁ ଯାଇଥିବା ସମୟରେ ପବ୍ଲିକ ଟଏଲେଟ୍ ବ୍ୟବହାର କରିବାକୁ ହୁଏ। ତେବେ ଅନେକ ସମୟରେ ଦେଖିବାକୁ ମିଳେ ତାହା ଏତେ ଅପରିଷ୍କାର ହୋଇଥାଏ ଯେ, ଭିତରକୁ ପଶିଥିବା ବ୍ୟକ୍ତି ବାନ୍ତି ଉଠେଇ ବାହାରକୁ ପଳେଇ ଆସନ୍ତି। ତେବେ ଜାପାନର ରାଜଧାନୀ ଟୋକିଓର କିଛି ପାର୍କରେ ଏମିତି କିଛି ଟଏଲେଟ୍ ସ୍ଥାପନ କରାଯାଇଛି, ଯାହାକୁ ବାହାରୁ ଦେଖି ଜାଣିପାରିବେ ତାହା ସଫା ଅଛି ନା ନାହିଁ । କାରଣ ଏସବୁ ଶୌଚାଳୟ ସମ୍ପୂର୍ଣ୍ଣ ଟ୍ରାନ୍ସପରେଣ୍ଟ। ଭିତରର ସବୁକିଛି ବାହାରକୁ ଦେଖାଯାଏ। ଏହାକୁ ଶିଗେରୁ ବେନ୍ ନାମକ ଆର୍କିଟେକ୍ଟ ତିଆରି କରିଛନ୍ତି। ସେ ଟଏଲେଟ୍ର କାନ୍ଥଗୁଡିକ ଏଭଳି କାଚରେ ତିଆରି କରିଛନ୍ତି, ଯାହା ମଧ୍ୟ ଦେଇ ଲୋକେ ବାହାରପଟୁ ଭିତରକୁ ଦେଖିପାରିବେ। ହେଲେ ଟଏଲେଟ୍ ବ୍ୟବହାର କରୁଥିବା ସମୟରେ କିନ୍ତୁ ତାହା ଟ୍ରାନ୍ସପରେଣ୍ଟ ହୋଇ ରହେ ନାହିଁ। ଆଉ ଭିତରେ ଥିବା ଲୋକ ବାହାରକୁ ଦେଖାଯାଆନ୍ତି ନାହିଁ। ତେଣୁ ଏହାକୁ ବ୍ୟବହାର କରିବାରେ କେହି ସଙ୍କୋଚ ମନେକରିବେ ନାହିଁ।