ଯାଜପୁରରୋଡ଼,୩୧।୧(ପବିତ୍ର ରଞ୍ଜନ ମହାନ୍ତି): କଳିଙ୍ଗନଗର ଶିଳ୍ପାଞ୍ଚଳର ବିଭିନ୍ନ କାରଖାନାରେ କୋଇଲାକୁ ଜାଳେଣି ଭାବେ ବ୍ୟବହାର କରାଯାଇଥାଏ। ପରେ ସେଥିରୁ ବହୁ ପରିମାଣରେ ପାଉଁଶ ବାହାରିଥାଏ।। ସେହି ପାଉଁଶ କାରଖାନାର କୌଣସି କାମରେ ବ୍ୟବହୃତ ହୋଇ ନ ଥାଏ। ସେହି ବିଷାକ୍ତ ପାଉଁଶ ବାୟୁ ପ୍ରଦୂଷଣ ସୃଷ୍ଟି କରିବା ସହ ପ୍ରାଣୀମାନଙ୍କ ପାଇଁ କ୍ଷତିକାରକ ହୋଇଥାଏ। ଏହାକୁ ଆଖି ଆଗରେ ରଖି ପରିବେଶ ଅନୁକୂଳ ପାଇଁ ସରକାରୀସ୍ତରରେ ଏହାର କେତେକ ବିକଳ୍ପ ବ୍ୟବସ୍ଥା କରାଯାଇଛି। ସେହି ପାଉଁଶ ନିର୍ମାଣ କାର୍ଯ୍ୟରେ ବ୍ୟବହାର ହେଉଥିବା ଇଟା (ଆଶ୍ ବ୍ରିକ୍) ତିଆରି ହେଉଛି। ରାସ୍ତା କାମରେ ବି ସେହି ପାଉଁଶ ବ୍ୟବହାର କରାଯିବାକୁ ଅନୁମତି ରହିଛି। ଏଥିପାଇଁ ପ୍ରତିଦିନ ଶତାଧିକ ପାଉଁଶ ବୋଝେଇ ଟ୍ରକ ବିଭିନ୍ନ ସ୍ଥାନକୁ ଚାଲିଛି। ହେଲେ ଉକ୍ତ ପାଉଁଶ ନେଉଥିବା ଟ୍ରକ୍ ଚାଳକମାନେ ଅତି ଖାମଖିଆଲି ଭାବେ ପରିବହନ କରୁଛନ୍ତି ବୋଲି ଅଭିଯୋଗ ହୋଇଛି।
ପ୍ରଦୂଷଣ ନିୟନ୍ତ୍ରଣ ବିଭାଗ ନିୟମ ଅନୁଯାୟୀ ରାସ୍ତାରେ ପରିବହନ ସମୟରେ ଉକ୍ତ ପାଉଁଶ ଉପରେ ପାଣି ପକାଇବା ସହ ପାଲ ଘୋଡାଇ ନେବାକୁ କଡ଼ା ନିୟମ ରହିଛି। ଯେପରି ଏହି ବିଷାକ୍ତ ପାଉଁଶ ଉଡ଼ି ଅନ୍ୟମାନଙ୍କ ପାଇଁ ବିପଦ ସୃଷ୍ଟି ନ କରୁ କିମ୍ବା ପରିବେଶର କୌଣସି କ୍ଷତି ନ ହେଉ। ହେଲେ ଏହି ନିୟମକୁ ଫୁ କରିଛନ୍ତି କାରଖାନା କର୍ତ୍ତୃପକ୍ଷ। କଳିଙ୍ଗନଗର ବିଭିନ୍ନ କାରଖାନାରୁ ବିଭିନ୍ନ ସ୍ଥାନକୁ ଦୈନିକ ଶତାଧିକ ଟ୍ରିପ ପାଉଁଶ ଜନଗହଳି ପୂର୍ଣ୍ଣ ରାସ୍ତାରେ ଖୁଲମଖୁଲା ପରିବହନ ହେଉଛି। ଏହି ବିଷାକ୍ତ ପାଉଁଶ ପରିବହନ ସମୟରେ ଉକ୍ତ ପାଉଁଶ ଉପରେ ପାଣି ସିଞ୍ଚନ କରାଯାଉନାହିଁ କିମ୍ବା ତା’ଉପରେ ପାଲ ଘୋଡ଼ା ଯାଉନାହିଁ। ନିର୍ଭୟରେ ଟ୍ରକ ଚାଳକମାନେ ଉକ୍ତ ପାଉଁଶ ପରିବହନ କରୁଥିବା ଦେଖିବାକୁ ମିଳୁଛି। ଏପରି କି କ୍ଷମତାଠାରୁ ଅଧିକ (ଓଭର ଲୋଡ଼) ପାଉଁଶ ପରିବହନ କରାଯାଉଛି। କେତେକ ଖୋଲା ସ୍ଥାନରେ ଏହାକୁ ଜମାରଖି ଅନ୍ୟ କାର୍ଯ୍ୟରେ ବ୍ୟବହାର କରାଯାଉଛି। ଏହାଦ୍ୱାରା ସହରରେ ଉକ୍ତ ବିଷାକ୍ତ ପାଉଁଶ ଉଡିବା ଦ୍ୱାରା ରାସ୍ତାରେ ଯାଉଥିବା ଲୋକମାନଙ୍କ ଆଖି ଓ ନାକରେ ପଡୁଥିବା ଅଭିଯୋଗ ହୋଇଛି। ଏହି କାରଣରୁ ଅଧିକାଂଶ ସମୟରେ ଦୁର୍ଘଟଣା ଘଟୁଛି। ଅନ୍ୟପଟେ ରାସ୍ତା କଡରେ ଥିବା ହୋଟେଲ ଓ ଖାଦ୍ୟ ପଦାର୍ଥରେ ପାଉଁଶ ପଡୁଥିବା ଦେଖିବାକୁ ମିଳୁଛି।ଏହା ଦ୍ୱାରା ଆଖି ନାକ ପୋଡିବା ସହ ଖାଦ୍ୟ ପଦାର୍ଥ ବିଷାକ୍ତ ହୋଇ ଲୋକଙ୍କ ସ୍ବାସ୍ଥ୍ୟ ପ୍ରତି ବିପଦ ସୃଷ୍ଟି କରୁଛି। ଏହାକୁ ନେଇ ସହରର ବୁଦ୍ଧିଜୀବୀମାନେ ଅସନ୍ତୋଷ ବ୍ୟକ୍ତ କରିବା ସହ କାରଖାନା କର୍ତ୍ତୃପକ୍ଷଙ୍କ ଦାୟିତ୍ୱହୀନତାକୁ ନେଇ ଚିନ୍ତାପ୍ରକଟ କରିଛନ୍ତି। ଏଭଳି ବେଆଇନ ପରିବହନ ଓ ବ୍ୟବହାର ଉପରେ ସ୍ଥାନୀୟ ପ୍ରଦୂଷଣ ନିୟନ୍ତ୍ରଣ ବିଭାଗ ଓ ପରିବହନ ବିଭାଗ ଚୁପ ରହିବା ସାଧାରଣରେ ସନ୍ଦେହ ସୃଷ୍ଟି କରୁଛି।