ନୂଆଦିଲ୍ଲୀ,୧୧ା୧: ଦୁଇଜଣ ଭାରତୀୟ ମାତ୍ର ୩ ଦିନରେ ୭ ମହାଦେଶ ବୁଲି ନୂଆ ବିଶ୍ୱ ରେକର୍ଡ ପ୍ରତିଷ୍ଠା କରିଛନ୍ତି। ସେମାନେ ହେଲେ ଡ. ଅଲୀ ଇରାନୀ ଏବଂ ସୁଜୟ କୁମାର ମିତ୍ର। ବିଶ୍ୱର ୭ଟି ଯାକ ମହାଦେଶ ଭ୍ରମଣ କରିବା ପାଇଁ ଉଭୟଙ୍କୁ ୩ ଦିନ ୧ ଘଣ୍ଟା ୫ ମିନିଟ ୪ ସେକେଣ୍ଡ ଲାଗିଥିଲା। ଗତ ଡିସେମ୍ବର ୪ରେ ଅଷ୍ଟ୍ରେଲିଆର ମେଲବୋର୍ନରୁ ବାହାରି ମାତ୍ର ୭ ତାରିଖ (୭୩ ଘଣ୍ଟା) ମଧ୍ୟରେ ଏସିଆ, ଆଫ୍ରିକା, ୟୁରୋପ, ଉତ୍ତର ଆମେରିକା, ଦକ୍ଷିଣ ଆମେରିକା, ଆଣ୍ଟାର୍କଟିକା ଏବଂ ଓସେନିଆ ଭ୍ରମଣ କରିଥିବା ଏହି ଦୁଃସାହସୀ ଭାରତୀୟ ଦ୍ୱୟଙ୍କ ବିରଳ ପଦକ୍ଷେପକୁ ଗିନିଜ୍ ଓ୍ବାଲର୍ଡ ରେକର୍ଡ ସ୍ବୀକୃତି ଦେଇଛି। ଏହା ପୂର୍ବରୁ ଏତେ କମ୍ ସମୟ ମଧ୍ୟରେ ବିଶ୍ୱର କେହି ୭ ମହାଦେଶ ଭ୍ରମଣ କରି ନ ଥିଲେ ବୋଲି ଏହାର ଓ୍ବେବ୍ସାଇଟ୍ରେ ଉଲ୍ଲେଖ କରାଯାଇଛି। ନିଜ ସଫଳତା ସମ୍ପର୍କରେ ଅଲୀ ଓ ସୁଜୟ କହିଛନ୍ତି, ଆଜି ଆମେ ରେକର୍ଡ ଭାଙ୍ଗିବାରେ ସଫଳ ହୋଇଛୁ। କିନ୍ତୁ ଆସନ୍ତାକାଲି ଆଉ କେହି ଆମ ରେକର୍ଡ ଭାଙ୍ଗିବାରେ ସକ୍ଷମ ହୋଇପାରନ୍ତି। ଭ୍ରମଣ ପ୍ରିୟ ଅଲୀ ଓ ସୁଜୟ ହାସଲ କରିଥିବା ଗିନିଜ୍ ଓ୍ବାଲର୍ଡ ରେକର୍ଡ ସାର୍ଟିଫିକେଟ୍କୁ ନିଜ ଇନ୍ଷ୍ଟାଗ୍ରାମ୍ରେ ଶେୟାର କରିଛନ୍ତି।
୬୪ ବର୍ଷୀୟ ଡ. ଅଲୀ ଜଣେ ଜଣାଶୁଣା ଫିଜିଓଥେରାପିଷ୍ଟ। ସେ ଭାରତୀୟ କ୍ରିକେଟ ଟିମ୍ର ଖେଳାଳିମାନଙ୍କୁ ଚିକିତ୍ସା କରିଥାଆନ୍ତି। ଅଦ୍ୟାବଧି ଅଲୀ ୯୦ ଦେଶ ଭ୍ରମଣ କରିସାରିଲେଣି। ଅଲୀ କହିଛନ୍ତି, ଭ୍ରମଣ କେବେ ସୀମାର ବାଧା ବନ୍ଧନ ମାନେ ନାହିଁ। ଏହା ବିଶ୍ୱବାସୀଙ୍କୁ ଏକାଠି କରିଥାଏ। ଅଲୀଙ୍କ ପଦାଙ୍କ ଅନୁସରଣ କରିବା ପରେ ଯାତ୍ରା ପ୍ରତି ସୁଜୟଙ୍କ ଆଗ୍ରହ ବଢ଼ିଥିଲା। କର୍ପୋରେଟ୍ ଜୀବନଶୈଳୀ ଛାଡ଼ି ସେ ମଧ୍ୟ ଏହି ଆଡ୍ଭେଞ୍ଚରରେ ସାମିଲ ହୋଇଥିଲେ। ବିଶ୍ୱର ୧୯୮ ଦେଶ ମଧ୍ୟରୁ ୧୭୨ ରାଷ୍ଟ୍ର ଭ୍ରମଣ ଅଭିଯାନରେ ସେ ଲାଗିଛନ୍ତି। ପ୍ରକାଶ ଯେ, ପୂର୍ବରୁ ଦ୍ରୁତତମ ଭ୍ରମଣକାରୀ ଭାବେ ୟୁନାଇଟେଡ୍ ଆରବ ଏମିରେଟ୍ସ (ୟୁଏଇ)ର ଡ.ଖଓ୍ବଲା ଅଲ୍ ରୋମାଇଥି ରେକର୍ଡ ହାସଲ କରିଥିଲେ। ୨୦୨୦ ଫେବୃୟାରୀରେ ସେ ୩ ଦିନ ୧୪ ଘଣ୍ଟା ୪୬ ମିନିଟ୍ ୪୮ ସେକେଣ୍ଡରେ ୭ ମହାଦେଶ ବୁଲିଥିଲେ। ତାଙ୍କଠାରୁ ୧୩ ଘଣ୍ଟା କମ୍ ସମୟ ନେଇ ଏହି ଦୁଇଜଣ ବିରଳ ରେକର୍ଡର ଅଧିକାରୀ ହୋଇପାରିଛନ୍ତି। ଯାତ୍ରା ପାଇଁ ଉଭୟଙ୍କୁ ସାଇକେଲଠୁ ନେଇ ବିମାନ ପର୍ଯ୍ୟନ୍ତ ମାଧ୍ୟମର ସହାୟତା ନେବାକୁ ପଡ଼ିଥିଲା।
