ଭୁବନେଶ୍ୱର,୧୫ା୧୨ (ସୌମ୍ୟରଞ୍ଜନ ରାଉତ): ଟ୍ରେନ୍ରେ ୨ୟ ଓ୍ବାକିଂ ବୁକ୍ଫେୟାର- ଟ୍ରାଭେଲ୍ ରାଇଟିଂ ଫେଷ୍ଟିଭାଲ ଶନିବାର ଅନୁଷ୍ଠିତ ହୋଇଯାଇଛି। ଭୁବନେଶ୍ୱର ରେଳଷ୍ଟେଶନରୁ ଟ୍ରେନ ଯାତ୍ରା ମାଧ୍ୟମରେ ଭ୍ରମଣକାରୀମାନେ ଏହି ସାହିତ୍ୟ ଉତ୍ସବର ମଜା ଉଠାଇବା ସହ ଅନୁଭୂତି ବଖାଣିଛନ୍ତି। ଓ୍ବାକିଂ ବୁକ୍ଫେୟାର ପକ୍ଷରୁ ସମ୍ବଲପୁର ଇଣ୍ଟରସିଟି ଏକ୍ସପ୍ରେସ୍ରେ ପୁରୀ ଅଭିମୁଖେ ଏହି ଭ୍ରାମ୍ୟମାଣ ସାହିତ୍ୟ ଉତ୍ସବର ଆୟୋଜନ କରାଯାଇଥିଲା। ଏଥିଲାଗି ପାଠକ ଏବଂ ଲେଖକମାନଙ୍କ ପାଇଁ ଟ୍ରେନର କୋଚ୍କୁ ସ୍ବତନ୍ତ୍ର ଭାବେ ବୁକିଂ କରାଯାଇଥିଲା। ଯାତ୍ରା ସମୟରେ ପୁରୀର ଇତିହାସ ସମ୍ବନ୍ଧରେ ଅନେକ କଥା ଆଲୋଚନା ହୋଇଥିଲା। ଏଥିରେ ସାମିଲ ହୋଇ ‘ଧରିତ୍ରୀ’ ଏବଂ ‘ଓଡ଼ିଶା ପୋଷ୍ଟ’ର ସମ୍ପାଦକ ତଥାଗତ ସତପଥୀ କହିଲେ, ୮୦ ଦଶକରେ ପୁରୀରେ ଜେଡ୍ ହୋଟେଲ ଚଳାଇବା ବେଶ୍ କଷ୍ଟଦାୟକ ତଥା ସଂଘର୍ଷପୂର୍ଣ୍ଣ ଥିଲା। ହୋଟେଲକୁ ସର୍ବସାଧାରଣ ବ୍ୟବହାର କରିବା ନିମନ୍ତେ ଅନେକ ବାଧା ମଧ୍ୟ ଉପୁଜିଥିଲା। ହୋଟେଲଟି ପୂର୍ବରୁ ‘ୟୁରୋପୀୟ ହୋଟେଲ’ ଭାବେ ପରିଚିତ ହୋଇଥିବାରୁ ପରବର୍ତ୍ତୀ ସମୟରେ ଏହା ବିଦେଶୀଙ୍କ ପାଇଁ ହଟ୍ସ୍ପଟ୍ ହେବାର ମାନ୍ୟତା ପାଇଥିଲା।
ସେତେବେଳେ ପୁରୀରେ କେବଳ ହାତଗଣତି କିଛି ବିଳାସପୂର୍ଣ୍ଣ ହୋଟେଲ ଥିଲା। ଧୀରେ ଧୀରେ ଜେଡ୍ ହୋଟେଲ ସର୍ବୋତ୍ତମ ବିଳାସପୂର୍ଣ୍ଣ ହୋଟେଲ ଭାବେ ପରିଗଣିତ ହେଲା। ଏହାପୂର୍ବରୁ ଏନ୍ସିସି ଏହି ହୋଟେଲ୍କୁ ଭଡ଼ାରେ ନେଇଥିଲା। ୧୯୭୯ ମସିହାରେ ସେ ହୋଟେଲର ମାଲିକାନା ହାସଲ କରିଥିଲେ। ଆବଶ୍ୟକ ନବୀକରଣ ପରେ ୧୯୮୦ ଫେବୃଆରୀ ୧୬ରେ ବୁକିଂ ଆରମ୍ଭ ହୋଇଥିଲା। ୨୭ଶଯ୍ୟା ସହ ହୋଟେଲ ଉଦ୍ଘାଟିତ ହୋଇଥିଲା। କିନ୍ତୁ ପ୍ରଥମ ଦିନରେ ୪୨ଜଣ ଲୋକ ବୁକ୍ କରିବାକୁ ଆସିଥିଲେ। ଏଥିସହିତ ହୋଟେଲ ସହ ରହିଥିବା କେତେକ ଚମତ୍କାର ଅନୁଭୂତି ବଖାଣିଥିଲେ ତଥାଗତ। ତେବେ ବର୍ତ୍ତମାନର ପୁରୀ ସହର ତା’ର ମୂଳ ଆକର୍ଷଣ ଧୀରେଧୀରେ ହରେଇବାରେ ଲାଗିଛି ବୋଲି ତଥାଗତ କହିଛନ୍ତି। ଏହି ଅବସରରେ ସେ ଫଟୋଗ୍ରାଫ ସେସନରେ ଯୋଗଦେଇଥିଲେ।
