ନୂଆଦିଲ୍ଲୀ,୧୫ା୭: ୭୫ ବର୍ଷ ହେଲା ଦେଶକୁ ସ୍ବାଧୀନତା ମିଳିଲାଣି। କିନ୍ତୁ ବ୍ରିଟିଶ ଅମଳର ଦେଶଦ୍ରୋହ ଆଇନ ଆଜି ବି ଚାଲୁଛି। ସେତେବେଳେ ସ୍ବାଧୀନତା ସଂଗ୍ରାମୀଙ୍କୁ ଏହି ଆଇନରେ ଗିରଫ କରାଯାଉଥିଲା। ଏହି ଆଇନକୁ କାହିଁକି ହଟାଯାଉ ନାହିଁ। ଗୁରୁବାର କେନ୍ଦ୍ରକୁ ଏଭଳି ପ୍ରଶ୍ନ କରିଛନ୍ତି ସୁପ୍ରିମକୋର୍ଟ। ଅପରପକ୍ଷେ କୃଷି ଆଇନ ବିରୋଧରେ ଚାଲିଥିବା ଆନ୍ଦୋଳନର ୧୦୦ ଚାଷୀଙ୍କ ବିରୋଧରେ ଦେଶଦ୍ରୋହ ମାମଲା ରୁଜୁ କରିଛି ହରିୟାଣା ପୋଲିସ।
ହରିୟାଣାର ଭାଜପା-ଜନନାୟକ ଜନତା ପାର୍ଟି ସରକାରଙ୍କ ବିରୋଧରେ ଚାଷୀମାନେ ବିକ୍ଷୋଭ କରି କୃଷି ଆଇନକୁ ବିରୋଧ କରୁଥିଲେ। ସେହିବାଟ ଦେଇ ହରିୟାଣା ବିଧାନସଭାର ଉପବାଚସ୍ପତି ରଣବୀର ଗାଙ୍ଗୁଲି କାର୍ରେ ଯାଉଥିଲେ। ଆନ୍ଦୋଳନକାରୀ ତାଙ୍କ କାର୍କୁ ଟାର୍ଗେଟ କରି ଭଙ୍ଗାରୁଜା କରିଥିବା ଅଭିଯୋଗ ହୋଇଛି। ଗତ ୧୧ ତାରିଖରେ ସିର୍ସାରେ ଏହି ଘଟଣା ଘଟିଥିଲା। ଏଫ୍ଆଇଆର୍ ମଧ୍ୟ ହୋଇଥିଲା। ପୋଲିସ ସେମାନଙ୍କ ବିରୋଧରେ ଦେଶଦ୍ରୋହ ମାମଲା ରୁଜୁ କରିଛି।
ଚାଷୀ ହରଚରଣ ସିଂ ଓ ପ୍ରହ୍ଲାଦ ସିଂଙ୍କ ବିରୋଧରେ ଦେଶଦ୍ରୋହ ସହ ହତ୍ୟା ଉଦ୍ୟମ ମାମଲା ରୁଜୁ କରାଯାଇଛି। ଆନ୍ଦୋଳନକାରୀ ସଙ୍ଗଠନ ସମ୍ୟୁକ୍ତ କିଷାନ ମୋର୍ଚ୍ଚା (ଏସ୍କେଏମ୍) ପକ୍ଷରୁ ଜାରି କରାଯାଇଥିବା ବିବୃତିରେ ପୋଲିସ କାର୍ଯ୍ୟାନୁଷ୍ଠାନକୁ ନିନ୍ଦା କରାଯାଇଛି।
