![](https://www.dharitri.com/wp-content/uploads/2022/09/19-5.jpg)
ଇସ୍ଲାମାବାଦ,୨୧ା୯: ପରବର୍ତ୍ତୀ ସେନା ମୁଖ୍ୟ ନିଯୁକ୍ତି ସମ୍ପର୍କରେ ପାକିସ୍ତାନ ପ୍ରଧାନମନ୍ତ୍ରୀ ଶେହବାଜ ଶରିଫ୍ ନିଜ ବଡ଼ ଭାଇ ତଥା ପୂର୍ବତନ ପ୍ରଧାନମନ୍ତ୍ରୀ ନଓ୍ବାଜ ଶରିଫ୍ଙ୍କ ପରାମର୍ଶ ଲୋଡ଼ି ଅଡ଼ୁଆରେ ଫସିଛନ୍ତି। ଦୁର୍ନୀତି ନିରୋଧୀ କୋର୍ଟ ଦ୍ୱାରା ଦୋଷୀ ସାବ୍ୟସ୍ତ ହେବା ପରେ ଚିକିତ୍ସା ଆଳରେ ଲଣ୍ଡନ ପଳାୟନ କରିଥିବା ନଓ୍ବାଜ ଶରିଫ୍ ପାକିସ୍ତାନ ପାଇଁ ଜଣେ ପଳାତକ। ଜାତୀୟ ନିରାପତ୍ତା ସମ୍ପର୍କିତ ନିଷ୍ପତ୍ତି ପୂର୍ବରୁ ଏଭଳି ବ୍ୟକ୍ତିଙ୍କ ପରାମର୍ଶ ନେବା ଦେଶଦ୍ରୋହ ବୋଲି ବିରୋଧୀ ପାକିସ୍ତାନ ତେହରିକ୍-ଇ-ଇନ୍ସାଫ୍ (ପିଟିଆଇ) କହିଛି। ଗାଦିଚ୍ୟୁତ ପ୍ରଧାନମନ୍ତ୍ରୀ ଇମ୍ରାନ ଖାନ୍ଙ୍କ ପିଟିଆଇ ପଞ୍ଜାବ ପ୍ରଦେଶରେ କ୍ଷମତାସୀନ। ପଞ୍ଜାବ ବିଧାନସଭାରେ ପିଟିଆଇ ପକ୍ଷରୁ ଶେହବାଜ୍ଙ୍କ ବିରୋଧରେ ଦେଶଦ୍ରୋହ ମାମଲାର ଶୁଣାଣି ଉଦ୍ଦେଶ୍ୟରେ ଆଗତ ଏକ ସଂକଳ୍ପନାମା ଗୃହୀତ ହୋଇଛି। ପ୍ରକାଶ ଯେ, ଶେହବାଜ ବ୍ରିଟେନର ଦିବଂଗତ ମହାରାଣୀ ଏଲିଜାବେଥ୍ ୨ୟଙ୍କ ଅନ୍ତ୍ୟେଷ୍ଟି କ୍ରିୟାରେ ଯୋଗଦେବା ପାଇଁ ଲଣ୍ଡନ ଯାଇଥିବାବେଳେ ପିଏମ୍ଏଲ୍ (ଏନ୍) ମୁଖ୍ୟ ନଓ୍ବାଜ ଶରିଫଙ୍କୁ ଭେଟିଥିଲେ। ବର୍ତ୍ତମାନର ସେନାମୁଖ୍ୟ ଜେନେରାଲ କମାର ଜାଭେଦ ବାଜଓ୍ବା ଆସନ୍ତା ନଭେମ୍ବରରେ ଅବସର ନେବାକୁ ଥିବାବେଳେ ତାଙ୍କ ସ୍ଥାନରେ କାହାକୁ ନିଯୁକ୍ତି ଦିଆଯିବ ବୋଲି ସେହି ସମୟରେ ବଡ଼ଭାଇଙ୍କୁ ପଚାରି ବୁଝିଥିଲେ।