ପୋଲସରା,୧୮।୪(ଡି.ଏନ୍.ଏ.): ଗଞ୍ଜାମ ଜିଲା ପୋଲସରା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଅବ୍ୟବସ୍ଥା ମଧ୍ୟରେ ଚାଲିଛି। ରବିବାର ସନ୍ଧ୍ୟାରେ ବିଦ୍ୟୁତ୍ କାଟ ହୋଇଥିବା ବେଳେ କ୍ୟାଣ୍ଡେଲ ଓ ମୋବାଇଲ ଫୋନ୍ ଆଲୁଅରେ ରୋଗୀ ଚିକିତ୍ସା କରାଯାଇଛି। ଏପରିକି ଜଣେ ମହିଳାଙ୍କ ପ୍ରସବ ମଧ୍ୟ କରାଯାଇଛି। ପୋଲସରା ସ୍ବାସ୍ଥ୍ୟକେନ୍ଦ୍ରରେ ଏହି ସମସ୍ୟା ନିତିଦିନିଆ ବୋଲି ରୋଗୀ ଓ ସେମାନଙ୍କ ସମ୍ପର୍କୀୟ ଅଭିଯୋଗ କରିଛନ୍ତି।
ଗ୍ରାମର ତପସ୍ବିନୀ ସାହୁ କହିଛନ୍ତି, ଅପରାହ୍ନ ପ୍ରାୟ ୪ଟାରେ ଜଣେ ସମ୍ପର୍କୀୟ ମାଉସୀଙ୍କ ପ୍ରସବ ବେଦନା ହୋଇଥିଲା। ତେଣୁ ତାଙ୍କୁ ପୋଲସରା ଡାକ୍ତରଖାନାକୁ ଆଣିଥିଲେ। ସେଠାରେ କୌଣସି ସୁବିଧା ନ ଥିଲା। ସନ୍ଧ୍ୟା ୭ଟାରେ ମାଉସୀଙ୍କ ଏକ ଶିଶୁପୁତ୍ର ଜନ୍ମ ନେଇଥିଲା। ପିଲା ଜନ୍ମ ବେଳେ ଡାକ୍ତରଖାନାରେ ବିଦ୍ୟୁତ୍ ନ ଥିଲା। ବିକଳ୍ପ ଭାବେ ଜେନେରେଟରର ମଧ୍ୟ ସୁବିଧା ନ ଥିବାରୁ ନର୍ସମାନେ ମୋବାଇଲ ଫୋନ୍ ଲାଇଟ ପକାଇ ଇଞ୍ଜେକସନ ଦେଲେ ଏବଂ ପ୍ରସବ ମଧ୍ୟ କରାଇଥିଲେ। ସେହିପରି ଅନ୍ୟ ଓ୍ବାର୍ଡରେ ମଧ୍ୟ ମହମବତି ଓ ମୋବାଇଲ ଲାଇଟରେ ଚିକିତ୍ସା କରାଯାଇଥିବା ରୋଗୀ ଓ ସେମାନଙ୍କ ସମ୍ପର୍କୀୟମାନେ କହିଥିଲେ। ଅବହେଳା କରୁଥିବା ଅଧିକାରୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବା ସହିତ ସମସ୍ୟା ସମାଧାନ ଦିଗରେ ଦୃଷ୍ଟି ଦେବାକୁ ତପସ୍ବିନୀ ଓ ଅନ୍ୟମାନେ ଦାବି କରିଛନ୍ତି। ଅନ୍ୟପକ୍ଷରେ ଏ ନେଇ ଡିୟୁଟିରେ ଥିବା ଡାକ୍ତର ପ୍ରଜ୍ଞା ପ୍ରଥମାଙ୍କୁ ପଚାରିବାରେ ସେ କହିଛନ୍ତି, ବିଦ୍ୟୁତ ଗଲାପରେ କୌଣସି ସୁବିଧା ନାହିଁ। ତେଣୁ ମହମବତି ହେଉ କି ମୋବାଇଲ ଲାଇଟ ଲଗାଇ ରୋଗୀଙ୍କ ସେବା କରିବି ବୋଲି କହିଛନ୍ତି।