ଭୁବନେଶ୍ୱର, ୨୭।୪ (ବ୍ୟୁରୋ): ଜାମୁରୋଳ ଗିଳି ଅସୁସ୍ଥ ହୋଇ ପଡିଥିବା ନାଗ ସାପର ଚିକିତ୍ସା କରାଯାଇଛି। ବୁଧବାର ଓୟୁଏଟିସ୍ଥିତ ଭେଟେରିନାରି କଲେଜରେ ଅସ୍ତ୍ରୋପଚାର କରାଯାଇ ସାପ ପେଟରୁ ଜାମୁରୋଳ କଢାଯାଇଛି। ସାପଟିକୁ ଓୟୁଏଟି ଆଣିବା ପରେ ତା’ ପେଟରେ କ’ଣ ଅଛି ତାହା ଦେଖିବା ପାଇଁ ଏକ୍ସରେ କରାଯାଇଥିଲା। ମାତ୍ର ଏଥିରୁ କିଛି ଜଣାପଡି ନ ଥିଲା। ଏହାପରେ କଲେଜର ସର୍ଜରି ବିଭାଗ ପ୍ରଫେସର ଡା. ଇନ୍ଦ୍ରମଣି ନାଥଙ୍କ ନେତୃତ୍ୱରେ ଡାକ୍ତରୀ ଟିମ୍ ଅସ୍ତ୍ରୋପଚାର କରି ସାପ ପେଟରୁ ଜାମୁରୋଳ ବାହାର କରିଥିଲେ।
ପୁରୀ ଜିଲା ଡେଲାଙ୍ଗ ବ୍ଲକ ଅନ୍ତର୍ଗତ ପ୍ରହରାଜପୁର ଗ୍ରାମର ବସନ୍ତ ବେହେରା ତାଙ୍କ ବାଡିରେ ମଙ୍ଗଳବାର ଏହି ସାପକୁ ଦେଖିଥିଲେ। ଏହାପରେ ସେ ପଡୋଶୀ ଘରେ ରହୁଥିବା ସ୍ନେକ୍ ହେଲ୍ପ ଲାଇନ୍ ସଦସ୍ୟ ସୁଶାନ୍ତ କୁମାର ବେହେରାଙ୍କୁ ଖବର ଦେଇଥିଲେ। ସୁଶାନ୍ତ ଏହି ୪ଫୁଟ ଲମ୍ବର ନାଗ ସାପକୁ ଉଦ୍ଧାର କରିବା ସମୟରେ ତା’ ପେଟ ଭିତରେ କିଛି କଠିନ ପଦାର୍ଥ ଥିବା ଦେଖିବାକୁ ପାଇଥିଲେ। ଏହାପରେ ଡେଲାଙ୍ଗ ରେଞ୍ଜ ଅଫିସରଙ୍କ ପରାମର୍ଶକ୍ରମେ ସୁଶାନ୍ତ ସାପଟିକୁ ସ୍ନେକ ହେଲ୍ପ ଲାଇନ କାର୍ଯ୍ୟାଳୟ ଆଣିବା ପରେ ଭେଟେରିନାରି କଲେଜରେ ତାହାର ଚିକିତ୍ସା କରାଯାଇଥିଲା। ଏନେଇ ପ୍ରଫେସର ନାଥ କହିଛନ୍ତି, ୩୦ ବର୍ଷର ଚାକିରି କାଳ ମଧ୍ୟରେ ସାପ ଜାମୁରୋଳ ଖାଇବା କେବେ ଦେଖି ନ ଥିଲି। ଅପରେଶନ ପରେ ସାପଟି ସୁସ୍ଥ ଅଛି। ତାକୁ ଆଣ୍ଟିବାୟୋଟିକ୍ ଏବଂ ପେନ୍କିଲର ଇଞ୍ଜେକ୍ସନ ଦିଆଯିବା ସହ ଅବଜରଭେଶନରେ ରଖାଯାଇଛି।
ଗ୍ୟାଷ୍ଟ୍ରୋ-ଇଣ୍ଟେନ୍ଷ୍ଟାଇନାଲ ଟ୍ରାକ୍କୁ ଜାମୁରୋଳ ଫଳ ଅବରୋଧ କରିଥିଲା। ଜାମୁରୋଳ ଫଳକୁ ହଜମ କରିବା ପାଇଁ ଯେଉଁ ପ୍ରୋଟିନ ବା ଏନ୍ଜାଇମ୍ ଆବଶ୍ୟକ ତାହା ସାପଙ୍କ ପାକସ୍ଥଳୀରେ ନ ଥାଏ। ସାପ ପେଟରୁ ଏହାକୁ ବାହାର କରାଯାଇ ନ ଥିଲେ ସେ କିଛିଦିନ ପରେ ମରିଯାଇଥାନ୍ତା ବୋଲି ପ୍ରଫେସର ନାଥ କହିଛନ୍ତି। ସେହିପରି ସ୍ନେକ ହେଲ୍ପ ଲାଇନର ସାଧାରଣ ସମ୍ପାଦକ ଶୁଭେନ୍ଦୁ ମଲ୍ଲିକ କହିଛନ୍ତି, ସାପମାନେ ପ୍ରାକୃତିକ ଭାବେ ମାଂସାସୀ। ମୂଷା କିମ୍ବା ଗୁଣ୍ଡୁଚି ମୂଷା ସେହି ଜାମୁରୋଳକୁ ଅଳ୍ପ ଖାଇ ଛାଡି ଦେଇଥିବ। ତାଙ୍କ ଶରୀରର ଗନ୍ଧ ସେହି ଫଳରେ ଥିବା ହେତୁ ସାପଟି ଭୁଲ୍ବଶତଃ ଜାମୁରୋଳକୁ ଖାଦ୍ୟ ଭାବି ଗିଳି ଦେଇଥିବ। ତେବେ ସାପଟି ସୁସ୍ଥ ହୋଇଯିବା ପରେ ତାକୁ ପ୍ରାକୃତିକ ଆବାସସ୍ଥଳୀରେ ଛାଡି ଦିଆଯିବ ବୋଲି ସୂଚନା ଦିଆଯାଇଛି।