ଢେଙ୍କାନାଳ ଅଫିସ,୧ା୧୦: କଟକ ଜଗତପୁରରେ ଆତଙ୍କ ସୃଷ୍ଟି କରିଥିବା ୨୦ ବର୍ଷର ମାଈ ହାତୀକୁ ଟ୍ରାଙ୍କୁଲାଇଜ୍ କରି ଗୁରୁବାର ଢେଙ୍କାନାଳ ଜିଲା କପିଳାସ ପ୍ରାଣୀ ଉଦ୍ୟାନ ପରିସରରେ ଥିବା ଏଲିଫ୍ୟାଣ୍ଟ ରେସ୍କ୍ୟୁ ସେଣ୍ଟରରେ ରଖାଯାଇ ଚିକିତ୍ସା କରାଯାଉଛି। ଗୁରୁବାର ନନ୍ଦନକାନନରୁ ଆସିଥିବା ପ୍ରାଣୀ ଚିକିତ୍ସକମାନେ ହାତୀଟିର ଚିକିତ୍ସା କରିଥିଲେ। ସେହିପରି ଶୁକ୍ରବାର ଅନୁଗୋଳ ଜିଲା ସାତକୋଶିଆରୁ ପ୍ରାଣୀ ଚିକିତ୍ସକମାନେ ଆସି ଅଧିକ ଚିକିତ୍ସା କରୁଛନ୍ତି। ଡିହାଇଡ୍ରେସନର ଶିକାର ହୋଇଥିବା ହାତୀଟି ଔଷଧ ଖାଇବା ପରେ ସୁସ୍ଥ ହେଉଛି। ବରଡାଳ ଖାଇବା ସହ ଆବଶ୍ୟକ ଅନୁଯାୟୀ ପାଣି ପିଇଛି। ଏ ସଂକ୍ରାନ୍ତରେ ଜିଲା ବନଖଣ୍ଡ ଅଧିକାରୀ ଡ. ପ୍ରକାଶଚାନ୍ଦ ଗୋଗିନେନି କହିଛନ୍ତିି, ହାତୀଟି ଗୁରୁବାର ଅପେକ୍ଷା ଶୁକ୍ରବାର ସୁସ୍ଥ ଥିବା ଦେଖାଯାଇଛି। ଆବଶ୍ୟକ ଅନୁଯାୟୀ ପାଣି ପିଉଛି ା ତାକୁ ବରଡାଳ ଖାଇବାକୁ ଦିଆଯାଇଛି। ହାତୀଟିର ସ୍ବାସ୍ଥ୍ୟ ପ୍ରତି ବନବିଭାଗ ପକ୍ଷରୁ ସତର୍କତାର ସହ ଦୃଷ୍ଟି ପ୍ରଦାନ କରାଯାଉଛି ବୋଲି ଜିଲା ବନଖଣ୍ଡ ଅଧିକାରୀ ପ୍ରକାଶ କରିଛନ୍ତି।