ପଟ୍ଟାଙ୍ଗୀ୨୩ା୫(ଡି.ଏନ.ଏ.): ବର୍ତ୍ତମାନ ଅନେକ ସରକାରୀ ଓ ବେସରକାରୀ କାର୍ଯ୍ୟ ଅନ୍ଲାଇନ ମାଧ୍ୟମରେ ହେଉଛି। ଟେଲି ନେଟୱାର୍କ ସୁବିଧା ଥିବା ଅଞ୍ଚଳରେ ସମସ୍ତ କାର୍ଯ୍ୟ ସୁରୁଖୁରୁରେ ହେଉଛି। କିନ୍ତୁ ନେଟୱର୍କ ନ ଥିବା କିମ୍ବା ସମସ୍ୟା ଉପୁଜୁଥିବା ଅଞ୍ଚଳରେ ଲୋକଙ୍କୁ ନାହିଁ ନ ଥିବା ସମସ୍ୟାର ସମ୍ମୁଖୀନ ହେବାକୁ ପଡୁଛି। ବିଶେଷକରି ସୀମାନ୍ତ ଜିଲାଗୁଡ଼ିକର ଗ୍ରାମାଞ୍ଚଳରେ ଏହି ସମସ୍ୟା ବେଶି ଦେଖିବାକୁ ମିଳିଥାଏ। ବ୍ୟାଙ୍କକୁ ଭତ୍ତା ଟଙ୍କା ନେବାକୁ ଆସି ହିତାଧିକାରୀ ଅସୁବିଧାର ସମ୍ମୁଖୀନ ହେଉଛନ୍ତି। କୋରାପୁଟ ଜିଲା ପଟ୍ଟାଙ୍ଗୀ ବ୍ଲକର ଦେଓପଟ୍ଟାଙ୍ଗୀ ପଞ୍ଚାୟତ ଏହାର ଏକ ଉଦାହରଣ।
ଉକ୍ତ ପଞ୍ଚାୟତ ବ୍ଲକ ସଦର ମହକୁମାରୁ ୮ କିଲୋମିଟର ଦୂରରେ ରହିଛି। ପଞ୍ଚାୟତରେ ନେଟୱର୍କ ସୁବିଧା ନ ଥିବାରୁ ସମସ୍ତ ସରକାରୀ କାର୍ଯ୍ୟ ସମ୍ପାଦନ ବେଳେ କର୍ମଚାରୀଙ୍କୁ ନାକେଦମ ହେବାକୁ ପଡିଥାଏ। ଜରୁରୀ କାର୍ଯ୍ୟ ସମୟରେ ପଞ୍ଚାୟତ କାର୍ଯ୍ୟ ସଲପଗୁଡା ତଥା କରଞ୍ଜଗୁଡା ଛକରେ ଥିବା ବରଗଛ ମୂଳେ ହୋଇଥାଏ। ଏଠାରେ ଲୋକଙ୍କ ଭିଡ ଜମିଥାଏ। ଏବେ ବାର୍ଦ୍ଧକ୍ୟ ଭତ୍ତା ଟଙ୍କା ହିତାଧିକାରୀଙ୍କ ବ୍ୟାଙ୍କ ସଞ୍ଚୟ ଖାତାକୁ ଆସୁଛି। ଦେଓପଟ୍ଟାଙ୍ଗୀ ପଞ୍ଚାୟତରେ ନେଟୱର୍କ ସୁବିଧା ନ ଥିବାରୁ ପଞ୍ଚାୟତ ପାଇଁ ଏକ କିଓକ୍ସି ବ୍ୟାଙ୍କ ସୁବିଧା କରାଯାଇଛି। ତେବେ ନେଟ୍ଓ୍ବର୍କ ସମସ୍ୟା ହେତୁ ବ୍ୟାଙ୍କର କୌଣସି କାର୍ଯ୍ୟ ହୋଇପାରୁନାହିଁ। ଫଳରେ ପ୍ରତ୍ୟେକ ଦିନ ଏହି ବ୍ୟାଙ୍କର ଜଣେ ମହିଳା କର୍ମଚାରୀ ଉପରୋକ୍ତ ଛକରେ ଥିବା ବରଗଛ ତଳେ ନେଟୱର୍କ ଆସୁଥିବା ସ୍ଥାନରେ ବସି କାମ କରୁଥିବା ଦେଖିବାକୁ ମିଳୁଛି। ହିତାଧିକାରୀ ପହଞ୍ଚତ୍ ଭତ୍ତା ଟଙ୍କା ନେବା ସହ ନିଜ ସଞ୍ଚୟ ଖାତାରେ ଭତ୍ତା ଟଙ୍କା ସମ୍ପର୍କିତ ବିବରଣୀ ପାଇଁ ଭିଡ ଜମାଇଥାନ୍ତି। ଏପରି ସମସ୍ୟା ପଞ୍ଚାୟତରେ ଲାଗି ରହିଥିଲେ ମଧ୍ୟ ଏହାର ସମାଧାନ ଲାଗି ପ୍ରଶାସନିକ ସ୍ତରରେ କୌଣସି ଉଦ୍ୟମ ହେଉନାହିଁ। ଏ ସମ୍ପର୍କରେ ଜିଲା ପରିଷଦ ସଭ୍ୟା ଟିକାଇ ଗେମେଲଙ୍କ ଦୃଷ୍ଟି ଆକର୍ଷଣ କରିବାରୁ ସେ ଜିଲାପାଳଙ୍କ ସହ ଆଲୋଚନା କରି ନେଟୱର୍କ ସମସ୍ୟା ସମାଧାନ କରିବି ବୋଲି ପ୍ରକାଶ କରିଛନ୍ତି। ଏନେଇ ସରପଞ୍ଚ ନରେନ୍ଦ୍ର ବଡନାୟକଙ୍କୁ ପଚାରିବାରୁ ସେ କହିଲେ ନିକଟରେ ପଞ୍ଚାୟତକୁ ଗସ୍ତରେ ଆସିଥିବା ଏମ୍ପି ସପ୍ତଗିରି ଉଲାକାଙ୍କୁ ଭେଟି ଏହି ନେଟୱର୍କ ସମସ୍ୟା ସମ୍ପର୍କରେ ଜଣାଇଛି। ଏଠାରେ ଏକ ଟାୱାର ସ୍ଥାପନ ପାଇଁ ପ୍ରସ୍ତାବ ଦେଇଥିବା ବଡନାୟକ କହିଛନ୍ତି।