ପଟ୍ଟାମୁଣ୍ଡାଇ,୧୯ା୧୧(ସ୍ବ.ପ୍ର.): ତଟାଞ୍ଚଳକୁ ସୁରକ୍ଷା ଦେବାକୁ ସରକାର ଲୁଣା ନଦୀ ବନ୍ଧଗୁଡ଼ିକର ମରାମତି, ପଥର ପ୍ୟାକିଂ ଓ ପ୍ରଶସ୍ତୀକରଣ ବାବଦକୁ ଅର୍ଥ ଖର୍ଚ୍ଚ କରୁଛନ୍ତି। ହେଲେ ଯେଉଁ କାର୍ଯ୍ୟ ହେଉଛି ତାହା ୨ରୁ ୩ ମାସ ଭିତରେ ଖରାପ ହୋଇପଡୁଛି। ଏପରି ଏକ ଘଟଣା ଘଟିଛି ଆଳି ତଟବନ୍ଧ ବିଭାଗ ଅଧୀନ କେରୁଆଁପାଳ ପ୍ରଭାତି ରାସ୍ତାରେ। ତଟବନ୍ଧ ବିଭାଗ ପକ୍ଷରୁ ନିର୍ମାଣ ହୋଇଥିବା ପଥର ପ୍ୟାକିଂ ଖସି ଯିବାରୁ ସେଥିରେ ବାଲି ବସ୍ତା ଦିଆଯାଇଥିଲା। ଏହି ବାଲି ବାସ୍ତା ବାହାରି ନ ଯିବା ପାଇଁ ସେଥିରେ ଜଙ୍ଗଲରୁ ମୂଲ୍ୟବାନ ଗଛ ବା ବହ୍ଲା ହାଣି ବ୍ୟବହାର କରାଯାଉଥିବା ଗ୍ରାମବାସୀ ଅଭିଯୋଗ କରିଛନ୍ତି।
ସୂଚନା ଅନୁଯାୟୀ. କେନ୍ଦ୍ରାପଡ଼ା ଜିଲା ରାଜନଗର ବ୍ଲକ କେରୁଆଁପାଳ ପଞ୍ଚାୟତ ପ୍ରଭାତୀ ଗଁା ଗହୀରମଥା ତଟବନ୍ଧ ପାଶର୍ବରେ ୪ ମାସ ତଳେ କରାଯାଇଥିବା ପଥର ପ୍ୟାକିଂ ଦୁଇ ମାସ ତଳେ ଧସି ଯାଇ ପଥର ସବୁ ନଦୀ ଗର୍ଭକୁ ଚାଲି ଯାଇଥିଲା। ନିମ୍ନମାନର ନିର୍ମାଣ କାର୍ଯ୍ୟ ଯୋଗୁ ଏଭଳି ପରିସ୍ଥିତି ସୃଷ୍ଟି ହୋଇଥିବା ଗ୍ରାମବାସୀ ଅଭିଯୋଗ କରିଥିଲେ। ଏହାର ପ୍ରତିକାର କରା ନ ଗଲେ ତଟଅଞ୍ଚଳ ପ୍ରତି ବିପଦ ସୃଷ୍ଟି କରି କେରୁଆଁପାଳ ପଞ୍ଚାୟତର ଗ୍ରାମଗୁଡିକ ସମୁଦ୍ର ଲୁଣାନଦୀ ଗର୍ଭରେ ଲୀନ ହୋଇଯିବା ଆଶଙ୍କା ଦେଖି ସେଠାରେ ବାଲି ବସ୍ତା ଦିଆଯାଇଥିଲା। ମାତ୍ର ବାଲିବସ୍ତା ହୋଇଥିବା କାର୍ଯ୍ୟରେ ଜଙ୍ଗଲରୁ ମୂଲ୍ୟବାନ ଗଛ କାଟି ବହ୍ଲା ଭାବେ ବ୍ୟବହାର କରାଯାଇଥିବା ଦେଖିବାକୁ ମିଳିଛି । ଏପରି କି ବହ୍ଲାଗୁଡିକୁ ନିକଟସ୍ଥ ଜଙ୍ଗଲରୁ ଆଣି ଏହି କାର୍ଯ୍ୟରେ ବ୍ୟବହାର କରୁଥିବା ବେଳେ ଏଗୁଡିକୁ ବିଭାଗୀୟ କର୍ମଚାରୀମାନେ ଦେଇଥିବା କାର୍ଯ୍ୟରତ ଶ୍ରମିକମାନେ କହିଥିଲେ। ଯଦି କୌଣସି ବ୍ୟକ୍ତି ଜଙ୍ଗଲରୁ କାଠ ହାଣୁଛି ସେଠାରେ ବନ ବିଭାଗ ଅଧିକାରୀମାନେ ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରୁଛନ୍ତି। ଏଠି କ’ଣ ପାଇଁ କାର୍ଯ୍ୟାନୁଷ୍ଠାନ ନିଆ ଯାଉ ନାହିଁ ସେ ନେଇ ପ୍ରଶ୍ନ ଉଠିଛି। ଏ ନେଇ କନିଷ୍ଠଯନ୍ତ୍ରୀ ଜୟଚନ୍ଦ୍ର ଜେନାଙ୍କୁ ପଚାରିବାରୁ ଏଠାରେ ବ୍ୟବହାର କରାଯାଇଥିବା ବହ୍ଲା ସବୁ ଚାନ୍ଦବାଲିରୁ କିଣାଯାଇଛି। ଏହା ସ୍ଥାନୀୟ ଜଙ୍ଗଲରୁ କଟା ଯାଇନାହିଁ ବୋଲି ସେ କହିଛନ୍ତି।