ଲୋଇସିଂହା,୨୫।୧୧(ଡି.ଏନ.ଏ): ବଲାଙ୍ଗୀର-ବରଗଡ ୨୬ ନଂ ଜାତୀୟ ରାଜପଥ ପ୍ରଶସ୍ତିକରଣ କାମ ଚାଲିଛି। ଏଥିପାଇଁ ରାସ୍ତାକଡରେ ଥିବା ବ୍ରିଟିଶ ଅମଳର ମହାଦ୍ରୁମ ଲିମ୍ବ, ଅର୍ଜୁନ ଗଛ ସବୁ କଟା ଚାଲିଛି। ଲୋଇସିଂହା ଥାନା ସାଲେଭଟାରୁ ବଲାଙ୍ଗୀର ପର୍ଯ୍ୟନ୍ତ ପ୍ରାୟ ୩୦କିମି ମଧ୍ୟରେ ୩ ହଜାରରୁ ଅଧିକ ଗଛ କଟିଥିବା କୁହାଯାଉଛି। ଗଛକଟା ଯୋଗୁଁ ୨୬ ନଂ ଜାତୀୟ ରାଜପଥ ଏବେ ବୃକ୍ଷଶୂନ୍ୟ ହୋଇପଡିଛି। ଗଛ କଟିବା ପରେ ରାଜପଥ ଲଣ୍ଡା ଦେଖାଯାଉଛି। କେଉଁ ସ୍ଥାନ କେଉଁଠି ତାହା ପଥଚାରୀ ଜାଣିପାରୁନାହନ୍ତି। ଶୀତଋତୁ ଥିବାରୁ ରାଜପଥରେ ଗଛର ଅଭାବ ଅନୁଭୂତ ହେଉନାହିଁ। ହେଲେ ଆଗାମୀ ଗ୍ରୀଷ୍ମଦିନରେ ପଥାଚାରୀ ଛାୟା ନ ପାଇ ଦୁର୍ଦ୍ଦଶାର ସମ୍ମୁଖୀନ ହେବା ନିଶ୍ଚିତ ବୋଲି ଏବେଠାରୁ ଲୋକେ ଆଲୋଚନା କଲେଣି। ବରଗଡ-ବୋରିଗୁମା ୨୬ ନଂ ଜାତୀୟ ରାଜପଥରେ ବଲାଙ୍ଗୀରୁ ବରଗଡର ଦୂରତା ୭୫କିମି। ପଥାଚାରୀଙ୍କୁ ଛାୟା ଦେବା ଉଦ୍ଦେଶ୍ୟରେ ରାଜାରାଜୁଡା ଅମଳରୁ ଏହି ପଥର ରାସ୍ତାପାର୍ଶ୍ୱରେ ଲିମ୍ବ ଓ ଅର୍ଜୁନ ସମେତ ବିଭିନ୍ନ ଗଛ ଲାଗିଥିଲା। ଲିମ୍ବଗଛ ଗୁଡିକ ପ୍ରାୟ ଦେଢଶହ ବର୍ଷର ପରୁଣା ବୋଲି ଲୋକେ କହନ୍ତି। କ୍ଲାନ୍ତ ଅନୁଭବ କଲେ ଯାତ୍ରୀମାନେ ଗଛଛାଇରେ ବିଶ୍ରାମ ନେଉଥିଲେ। ଏବେ ଜନସଂଖ୍ୟା ତାଳ ଦେଇ ଯାନବାହାନ ବୃଦ୍ଧି ପାଇଛି। ସମ୍ବଲପୁରକୁ ସଂଯୋଗୀକରଣ ହୋଇଥିବା ବଲାଙ୍ଗୀର-ବରଗଡ ରାଜପଥ ଗତ କିଛିଦଶନ୍ଧି ହେଲା ବ୍ୟସ୍ତବହୁଳ ହୋଇ ପଡିଛି। ୨୦୦୦ ମସିହା ପରେ ଉକ୍ତ ପଥକୁ ଦୁଇ ଲାଇନ ବିଶିଷ୍ଟ କରାଯାଇଥିଲା। ୨୦୧ନଂ ରାଜପଥରୁ ୨୬ ନଂ ରାଜପଥକୁ ଉନ୍ନୀତ କରାଯାଇଥିଲା। ଏବେ ପୁଣି ପ୍ରଶସ୍ତୀକରଣ ପରେ ରାସ୍ତା ପାର୍ଶ୍ୱ ଗଛ କଟିଛି। ଫଳରେ ଗଛଗୁଡିକରେ ଆଶ୍ରୟ ନେଇଥିବା ପକ୍ଷୀମାନେ ବାସହରା ହୋଇ ପଡିଛନ୍ତି। ଲୋଇସିଂହା ଚାରିଛକଠାରେ ଥିବା ଏକ ଲିମ୍ବଗଛ କଟିଯିବା ପରେ ସେଥିରେ ଆଶ୍ରୟ ନେଇଥିବା ବଗପଲ ବାସହରା ହୋଇ ଏଣେତେଣେ ଘୁରି ବୁଲିଥିବା ସ୍ଥାନୀୟ ଲୋକେ କହିଛନ୍ତି। ସ୍ଥାନୀୟ ଜଣେ ବନ କର୍ମଚାରୀ କହିଛନ୍ତି, ଲୋଇସିଂହା ବନ ରେଞ୍ଜ ଅନ୍ତର୍ଗତ ସାଲେଭଟାରୁ ଫାସଡ ସୀମା ମଧ୍ୟରେ ୬୩୬ଗଛ କଟିଛି। କଟିଥିବା ଗଛର ଗଣ୍ଡି ସବୁ ଓଡିଶା ବନ ଉନ୍ନୟନ ନିଗମକୁ ଯାଇଛି। ନିଗମ ପକ୍ଷରୁ ଗଣ୍ଡି ସବୁ ନିଲାମ କରି ବିକ୍ରି କରାଯାଇଥାଏ। ସେହି ଟଙ୍କା ଏବଂ ସରକାରୀ ଅନୁଦାନରେ କଟିଥିବା ଗୋଟିଏ ଗଛର ବଦଳା ୫ଟି ଗଛ ଲଗାଯିବ ବୋଲି କହିଛନ୍ତି। କଟିଥିବା ଗଛ ସବୁ ଅମୂଲ୍ୟ ଥିଲା। ତାହା ଭରଣା କରିବା କଷ୍ଟକର ବୋଲି ସେ କହିଥିଲେ। ପୁଣି ଯଦି ରାସ୍ତପାର୍ଶ୍ୱରେ ଗଛ ଲଗାଯାଏ ଶୀଘ୍ର ବଢୁଥିବା ଓ ଦୀର୍ଘଜୀବୀ ହେଉଥିବା ଲିମ୍ବ ଚାରା ଲଗାଇବାକୁ ସାଧାରଣରେ ଦାବି ହେଉଛି।
ରିପୋର୍ଟ: ସୁଶାନ୍ତ ବାରିକ