ଲଣ୍ଡନ,୨ା୩(ପି.ଟି.)-ସୋମବାର ଇଂଲଣ୍ଡ ପୂର୍ବତନ ଓପନର ମାର୍କସ ଟ୍ରେସ୍କୋଥିକ୍ଙ୍କୁ ଜାତୀୟ କ୍ରିକେଟ ଦଳର ନୂଆ ବ୍ୟାଟିଂ କୋଚ୍ ଭାବେ ନିଯୁକ୍ତି ଦେଇଛି। ଏହାଛଡ଼ା ଜନ୍ ଲିଓ୍ବିସ ଓ ନ୍ୟୁଜିଲାଣ୍ଡର ଜିତନ ପଟେଲଙ୍କୁ ଯଥାକ୍ରମେ ସ୍ଥାୟୀ ଭିତ୍ତିରେ ବୋଲିଂ ଓ ସ୍ପିନ ବୋଲିଂ କୋଚ୍ ଭାବେ ନିଯୁକ୍ତି ମିଳିଛି। ଖ୍ରିସ୍ ସିଲ୍ଭରଉଡ୍ ଦଳର ମୁଖ୍ୟକୋଚ ରହିଛନ୍ତି। ଟ୍ରେସ୍କୋଥିକ୍ ଜୋନାଥନ ଟ୍ରଟ୍ଙ୍କଠାରୁ ଦାୟିତ୍ୱ ଗ୍ରହଣ କରିବେ। ଟ୍ରଟ୍ ଦକ୍ଷିଣ ଆଫ୍ରିକୀୟ ଜ୍ୟାକ୍ସ କାଲିସ୍ଙ୍କ ସ୍ଥାନରେ ନିଯୁକ୍ତି ପାଇଥିଲେ। କାଲିସ୍ ଇଂଲଣ୍ଡର ଶ୍ରୀଲଙ୍କା ଟୁର୍ ବେଳେ ବ୍ୟାଟିଂ ପରାମର୍ଶଦାତା ଭୂମିକା ନିର୍ବାହ କରିଥିଲେ। ମାର୍କସ, ଜନ୍ ଏବଂ ଜିତନ ଉଚ୍ଚସ୍ତରରେ ସେମାନଙ୍କ ସାମର୍ଥ୍ୟ ପ୍ରତିପାଦନ କରିସାରିଛନ୍ତି। ଭବିଷ୍ୟତରେ ସେମାନଙ୍କଠାରୁ ଆହୁରି କିଛି ଆଶା କରାଯାଏ ବୋଲି ଇଂଲଣ୍ଡ ଓ ଓ୍ବେଲ୍ସ କ୍ରିକେଟ ବୋର୍ଡ (ଇସିବି) ପର୍ଫର୍ମାନ୍ସ ଡାଇରେକ୍ଟର ମୋ ବୋବାଟ୍ ପ୍ରକାଶ କରିଛନ୍ତି। ଟ୍ରେସ୍କୋଥିକ୍ ୨୦୦୦ରୁ ୨୦୦୬ ମଧ୍ୟରେ ସମସ୍ତ ଫର୍ମାଟରେ ୧୦,୦୦୦ରୁ ଅଧିକ ରନ ସଂଗ୍ରହ କରିଛନ୍ତି। ମାର୍ଚ୍ଚ ମଧ୍ୟଭାଗରେ ସେ ତାଙ୍କ ନୂଆ ଦାୟିତ୍ୱ ଗ୍ରହଣ କରିବେ ବୋଲି ଆଶା କରାଯାଏ। ବର୍ତ୍ତମାନ ସେ ସମରସେଟ୍ର ସହକାରୀ କୋଚ୍ ଅଛନ୍ତି।