ରାଉରକେଲା,୨୧ା୯(ଦିନେଶ ମିଶ୍ର): ପୁରୀ-ରାଉରକେଲା ମଧ୍ୟରେ ବନ୍ଦେ ଭାରତ ଏକ୍ସପ୍ରେସ୍ ଟ୍ରେନ୍ର ଟ୍ରାଏଲ୍ ରନ୍ ବୁଧବାର ସଫଳତା ସହ ସମ୍ପନ୍ନ ହୋଇଛି। ଏହା ସକାଳ ୫ଟାରେ ପୁରୀ ଷ୍ଟେସନ ଛାଡି ମଧ୍ୟାହ୍ନ ୧୨ଟା ୪୫ରେ ରାଉରକେଲା ରେଳ ଷ୍ଟେଶନରେ ପହଞ୍ଚତ୍ବାର ଥିଲା। ମାତ୍ର ନିର୍ଦ୍ଧାରିତ ସମୟ ୧୮ମିନିଟ୍ ପୂର୍ବରୁ ରାଉରକେଲା ରେଳ ଷ୍ଟେଶନରେ ପହଞ୍ଚତ୍ଥିଲା। ଏହି ଟ୍ରେନ ରାଉରକେଲା ରେଳ ଷ୍ଟେଶନ ପ୍ଲାଟଫର୍ମ ନମ୍ବର ୧ରେ ପହଞ୍ଚତ୍ବା ପରେ ସହରବାସୀ ତଥା ଯାତ୍ରୀଙ୍କ ମନରେ ଉତ୍ସାହ ଦେଖାଦେଇଥିଲା। ସହରରେ ଥିବା ବୁଦ୍ଧିଜୀବୀ, ସମାଜସେବୀ ଓ ରାଜନେତା ଷ୍ଟେଶନରେ ପହଞ୍ଚତ୍ ହାତରେ ତ୍ରିରଙ୍ଗା ଧରି ଏହି ଟ୍ରେନକୁ ଭବ୍ୟ ସ୍ବାଗତ କରିଥିଲେ।
ବନ୍ଦେ ଭାରତ ଏକ୍ସପ୍ରେସ୍ରେ ୮ଟି ଏସି କୋଚ ରହିଛି। ଏହି ଟ୍ରେନ ରାଉରକେଲା ରେଳ ଷ୍ଟେଶନରୁ ଅପରାହ୍ନ ୨ଟା ୧୦ରେ ଛାଡି ପୁରୀ ଅଭିମୁଖେ ଯାତ୍ରା କରିଥିଲା। ଉକ୍ତ ଟ୍ରେନ ପୁରୀ ଓ ରାଉରକେଲା ମଧ୍ୟରେ ଖୋର୍ଦ୍ଧାରୋଡ଼, ଭୁବନେଶ୍ୱର, କଟକ, ଢେଙ୍କାନାଳ, ଅନୁଗୋଳ, ସମ୍ବଲପୁର ସିଟି, ଝାରସୁଗୁଡ଼ା ଆଦି ଷ୍ଟେଶନରେ ରହଣି କରିବ। ରାଉରକେଲାରୁ ପୁରୀ ୫୦୫ କିଲୋମିଟର ଦୂରତାକୁ ୭ ଘଣ୍ଟା ୪୫ ମିନିଟ୍ରେ ଅତିକ୍ରମ କରିବ। ଏହି ଟ୍ରେନ ଶନିବାର ବ୍ୟତୀତ ସପ୍ତାହର ବାକି ୬ ଦିନ ଯାତ୍ରା କରିବ। ଏହି ଟ୍ରେନକୁ ସ୍ବାଗତ କରିବା ପାଇଁ ରେଲୱେ ମଣ୍ଡଳ ପରିବହନ ନିରୀକ୍ଷକ(ଡିଟିଆଇ) ପି.କେ. ଜେନା, ଏରିଆ ରେଲଓ୍ବେ ମ୍ୟାନେଜର (ଏଆର୍ଏମ୍) ଆର.କେ. ମହାନ୍ତି, ରେଲୱେ କମର୍ସିଆଲ ଇନ୍ସପେକ୍ଟର ତପନ କୁମାର ମଣ୍ଡଳଙ୍କ ସହ ଭାଜପା ବରିଷ୍ଠନେତା ଧୀରେନ ସେନାପତି, ନୀହାର ରାୟ, ଜଗବନ୍ଧୁ ବେହେରା, ଲତିକା ପଟ୍ଟନାୟକ, ସମାଜସେବୀ ସୁମନ ଦତ୍ତଙ୍କ ସହ ସମସ୍ତ କର୍ମକର୍ତ୍ତା ଉପସ୍ଥିତ ଥିଲେ।
ପ୍ରକାଶ ଯେ, ଏହି ଟ୍ରେନ ଗତ ୧୨ ତାରିଖରେ ପୁରୀ-ତାଳଚେର ରୋଡ ମଧ୍ୟରେ ପ୍ରଥମେ ଟ୍ରାଏଲ ରନ କରିଥିଲା। ଚଳିତ ମାସ ୨୩ରେ ରାଉରକେଲା ରେଳ ଷ୍ଟେଶନରୁ ଏହାର ଶୁଭ ଉଦ୍ଘାଟନ ହେବ ବୋଲି ଷ୍ଟେଶନ ମ୍ୟାନେଜର ପ୍ରଭାସ ରଞ୍ଜନ ଦାସ ସୂଚନା ଦେଇଛନ୍ତି।