ଭୁବନେଶ୍ୱର,୪ା୮(ବ୍ୟୁରୋ): ଦେଶରେ ଆଜାଦୀ କା ଅମୃତ ମହୋତ୍ସବ ପାଳନ ହେଉଥିବା ବେଳେ ଏହାକୁ ସ୍ମରଣୀୟ କରିବା ପାଇଁ ୧୩ରୁ ୧୫ ଅଗଷ୍ଟ ୩ଦିନ ପର୍ଯ୍ୟନ୍ତ ଘରେ ଜାତୀୟ ପତାକା ଉତ୍ତୋଳନ କରିବା ପାଇଁ ସରକାର ଭାରତବର୍ଷର ସମସ୍ତ ନାଗରିକଙ୍କୁ ନିବେଦନ କରିଛନ୍ତି। ଭାରତୀୟ ଡାକ ବିଭାଗ ତାର ବିସ୍ତୃତ ୧ ଲକ୍ଷ ୫୯ ହଜାରରୁ ଅଧିକ ଡାକଘର ଏବଂ ଉତ୍ସର୍ଗୀକୃତ କର୍ମଚାରୀଙ୍କ ଶକ୍ତି ସହାୟତାରେ ସ୍ଥାନୀୟ ତଥା ଗ୍ରାମାଞ୍ଚଳର ଲୋକମାନଙ୍କୁ ସଚେତନ କରିବା ସହିତ ସଂସ୍କୃତି ମନ୍ତ୍ରଣାଳୟ ସହାୟତାରେ ଜାତୀୟ ପତାକା ସମସ୍ତ ଡାକଘରେ ଉପଲବ୍ଧି କରାଇପାରିିଛି। ଏଥିସହିତ ଏହି ଜାତୀୟ ଉତ୍ସବରେ ଗର୍ବିତ ଭାବେ ଅଂଶଗ୍ରହଣ କରିଛି। ସମସ୍ତ ନାଗରିକଙ୍କ ପାଇଁ ପ୍ରତ୍ୟେକ ଡାକଘରେ ମାତ୍ର ୨୫ ଟଙ୍କାରେ ଜାତୀୟ ପତାକା ଉପଲବ୍ଧ ହେବ।
ସେହି ନିର୍ଦ୍ଦେଶ ଅନୁସାରେ ଭୁବନେଶ୍ୱର ଡାକମଣ୍ଡଳ ସମସ୍ତ ଡାକଘରେ ଜାତୀୟ ପତାକା ଉପଲବ୍ଧ କରାଇଛି। ମାତ୍ର ୨୫ ଟଙ୍କା ଦେଇ ନିକଟସ୍ଥ ଡାକଘରୁ ଜାତୀୟ ପତାକାଟିଏ ସଂଗ୍ରହ କରିବାକୁ ଭୁବନେଶ୍ୱର ଡାକମଣ୍ଡଳର ବରିଷ୍ଠ ଡାକ ଅଧୀକ୍ଷକ ବସନ୍ତ କୁମାର ପଣ୍ଡା ଅନୁରୋଧ କରିଛନ୍ତି। ଭୁବନେଶ୍ୱରବାସୀ ଘରେ ବସି ହ୍ବାଟ୍ସଆପ୍ ଜରିଆରେ ମଧ୍ୟ ତ୍ରିରଙ୍ଗା ଅର୍ଡର କରିପାରିବେ। ଏଥିପାଇଁ ଜାରି କରାଯାଇଥିବା ନମ୍ବରଟି ହେଉଛି ୮୩୨୮୮୪୯୭୦୫। ସମ୍ପୃକ୍ତ ଅଞ୍ଚଳର ପୋଷ୍ଟମ୍ୟାନ୍ ପତାକାକୁ ତାଙ୍କ ଘରେ ନେଇ ବିତରଣ କରି ଆସିବେ। ଏହା ବ୍ୟତୀତ ଡାକଘର ସମ୍ମୁଖରେ ସେଲ୍ଫି ଜୋନ ମଧ୍ୟ କରାଯାଇଛି। ଯେଉଁ ଗ୍ରାହକମାନେ ଡାକଘରୁ ତ୍ରିରଙ୍ଗା କିଣିବେ, ସେମାନେ ସେଲ୍ଫି ଉଠାଇ ସୋସିଆଲ ମିଡ଼ିଆରେ ତାହାକୁ ଶେୟାର କରିପାରିବେ।