ନୟାଗଡ଼ ଅଫିସ,୨୦।୧୧: ସରକାର ଦଳିତ ଓ ଆଦିବାସୀଙ୍କ ପାଇଁ ବିଭିନ୍ନ ଯୋଜନା କରିଛନ୍ତି। ହେଲେ ଏହା ସେମାନଙ୍କ ପାଇଁ ଅପହଞ୍ଚ ହୋଇରହିଛି। ରଣପୁର ତହସିଲର ବିଭିନ୍ନ ପଞ୍ଚାୟତରେ ୫୦୦ରୁ ଊର୍ଦ୍ଧ୍ୱ ଦଳିତ ଓ ଆଦିବାସୀ ପରିବାର ସରକାରୀ ଜମିରେ କାହିଁ କେଉଁ ଅମଳରୁ ରହିଆସୁଥିଲେ ମଧ୍ୟ ପଟ୍ଟା ପାଇପାରୁ ନାହାନ୍ତି। ତହସିଲ ପକ୍ଷରୁ ସେମାନଙ୍କୁ ହଇରାଣ କରାଯାଉଥିବା ଅଭିଯୋଗ ଉଠିଛି। ବାସସ୍ଥାନ ପ୍ରମାଣପତ୍ର ପାଇ ନ ଥିବାରୁ ସରକାରୀ ସୁବିଧା ହାସଲ କରିପାରୁ ନାହାନ୍ତି। ଏହି ସମସ୍ୟା ନେଇ ସେମାନେ ବିଭିନ୍ନ ସମୟରେ ତହସିଲଦାର, ବିଡିଓ, ଉପଜିଲାପାଳ, ଜିଲାପାଳଙ୍କୁ ଭେଟିଥିଲେ ମଧ୍ୟ ସୁଫଳ ମିଳୁନି। ଏପରିସ୍ଥଳେ ଏହି ଭୂମିହୀନ ପରିବାର ଗୁରୁବାର ଭାରତ ରତ୍ନ ଡକ୍ଟର ବି. ଆର୍. ଆମ୍ବେଡକର ସୋସିଆଲ ୱେଲ୍ଫେୟାର ଅର୍ଗାନାଇଜେଶନ ସହଯୋଗରେ ଜିଲାପାଳଙ୍କୁ ଭେଟି ନିଜ ସମସ୍ୟା ଜଣାଇବା ସହ ଲିଖିତ ଭାବେ ଅଭିଯୋଗ କରିଛନ୍ତି।
ଅଭିଯୋଗ ଅନୁସାରେ ରଣପୁର ତହସିଲ ରାଜସୁନାଖଳା ପଞ୍ଚାୟତ କୋଟଗଡ଼ ଆଦିବାସୀ ସାହିର ୧୫, କୋଟଗଡ଼ ନୂଆସାହିର ୭, ଗୋଡ଼ିସାହିର ୫ ପରିବାର ୨୦ରୁ ଊର୍ଦ୍ଧ୍ୱ ବର୍ଷ ହେଲା ସରକାରୀ ଜମିରେ ରହି ଆସୁଛନ୍ତି। ସେହିଭଳି କୁଳାସର ପଞ୍ଚାୟତ ନିରାକାରପୁରର ୨ ପରିବାର, ଗୋପାଳପୁର ପଞ୍ଚାୟତ ୧୬ ନଂ. ୱାର୍ଡ ହରିଜନ ସାହିର ୧୨୫, ଚାନ୍ଦପୁର ପଞ୍ଚାୟତ ଚାନ୍ଦପୁର ଭୋଇସାହିର ୧୫ ପରିବାର ଭୂମିହୀନ। ଅନୁରୂପ ଭାବେ ବଜ୍ରକୋଟ ପଞ୍ଚାୟତର ୩୦, ଦର୍ପନାରାୟଣପୁରର ୧୦୦, ଖତିଆ ପଞ୍ଚାୟତ ଦଳିତସାହିର ୧୦, ରଙ୍କଦେଉଳି ପଞ୍ଚାୟତ ଗୋଡିମଡା ଦଳିତସାହିର ୩୦ ପରିବାର ପଟ୍ଟା ପାଇପାରି ନାହାନ୍ତି। ଏ ନେଇ ରଣପୁର କୋଡିଏ କାହାଣିଆ ଗଁାର ଗଙ୍ଗାଧର ନାୟକ, ଦୀନବନ୍ଧୁ ନାୟକ, ଚାନ୍ଦପୁରର ତନୁଲତା ଭୋଇ କୁହନ୍ତି, ଦଳିତ ଓ ଆଦିବାସୀ ଲୋକ ଘରବାରି ପଟ୍ଟା ନ ପାଇବାରୁ ସରକାରୀ ସୁବିଧା ସୁଯୋଗ ନେଇପାରୁ ନାହାନ୍ତି। ପଟ୍ଟା ପାଇବା ପାଇଁ ବିଭିନ୍ନ ସମୟରେ ଆବେଦନ ସହ ଅଭିଯୋଗ, ପ୍ରତିବାଦ ପରେ କେବଳ ପ୍ରତିଶ୍ରୁତି ମିଳୁଛି। ଦଳିତ ଓ ଆଦିବାସୀ ନେତା ନାରାୟଣ ଚନ୍ଦ୍ର ଦାସ, ଦିବାକର ଭୋଇ କୁହନ୍ତି, ଦଳିତ ଓ ଆଦିବାସୀଙ୍କ ସମସ୍ୟା ଅନେକ। ତେବେ ଭୂମିହୀନ ଦଳିତ ଓ ଆଦିବାସୀଙ୍କ ସମସ୍ୟାଙ୍କୁ ଗୁରୁତ୍ୱ ଦିଆଯାଇ ସମାଧାନ କରାଯିବା ଦରକାର। ସେମାନଙ୍କ ପାଇଁ ସ୍ବତନ୍ତ୍ର ଶ୍ମଶାନ, କୋଠଘର, ପୋଖରୀ, ବେକାର ଯୁବତୀଯୁବକଙ୍କ ପାଇଁ କର୍ମସଂସ୍ଥାନ ଯୋଗାଇବା ଆବଶ୍ୟକ। ଜିଲାପାଳଙ୍କ ଅନୁପସ୍ଥିତିରେ ଆମେ ଅତିରିକ୍ତ ଜିଲାପାଳଙ୍କୁ ଭେଟି ସ୍ମାରକପତ୍ର ଦେଇଛୁ। ସେ ଜିଲାପାଳଙ୍କ ସହ ଆଲୋଚନା କରି ସମସ୍ୟା ସମାଧାନ କରିବେ ବୋଲି ପ୍ରତିଶ୍ରୁତି ଦେଇଥିବା ସେମାନେ କହିଥିଲେ।