ପ୍ରୟାଗରାଜ,୧୩।୪: ଉମେଶ ପାଲ ହତ୍ୟା ମାମଲାରେ ଅଭିଯୁକ୍ତ ଅସଦ ଅହମ୍ମଦଙ୍କୁ ଗୁରୁବାର ଝାନ୍ସିରେ ଏନ୍କାଉଣ୍ଟର କରାଯାଇଛି। ଏହି ଏନ୍କାଉଣ୍ଟର ଖବର ପାଇବା ପରେ ଓକିଲ ଉମେଶ ପାଲଙ୍କ ମା’ ଶାନ୍ତି ଦେବୀ ଏହା ମୋ ପୁଅ ପାଇଁ ଏକ ଶ୍ରଦ୍ଧାଞ୍ଜଳି ବୋଲି କହିଛନ୍ତି। ଏପରି କି ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କୁ ଧନ୍ୟବାଦ ଜଣାଇଛନ୍ତି। ତାଙ୍କୁ ନ୍ୟାୟ ମିଳିବ ବୋଲି ଉତ୍ତରପ୍ରଦେଶ ସରକାରଙ୍କ ଉପରେ ସମ୍ପୂର୍ଣ୍ଣ ବିଶ୍ୱାସ ରହିଥିଲା। ଏନେଇ ସେ ପୋଲିସ ବିଭାଗକୁ ମଧ୍ୟ କୃତଜ୍ଞତା ଜଣାଇଛନ୍ତି।
ଅନ୍ୟପକ୍ଷେ ଉମେଶ ପାଲଙ୍କ ସ୍ତ୍ରୀ ମଧ୍ୟ ଅପରାଧୀଙ୍କ ବିରୋଧରେ ଜିରୋ ଟଲରେନ୍ସ ନିଷ୍ପତ୍ତିକୁ ନେଇ ମୁଖ୍ୟମନ୍ତ୍ରୀଙ୍କୁ ଧନ୍ୟବାଦ ଜ୍ଞାପନ କରିଛନ୍ତି। ସେ ତାଙ୍କ ଝିଅର ସ୍ବାମୀ ହତ୍ୟାକାରୀଙ୍କୁ ଦଣ୍ଡ ଦେଇଛନ୍ତି। ମୁଁ ଆଶା କରୁଛି ଯେ, ମୁଖ୍ୟମନ୍ତ୍ରୀ ଯାହା କରିବେ ତାହା ଭଲ ହିଁ କରିବେ। ସେ ଜଣେ ପିତାଙ୍କ ପରି ବୋଲି କହିଛନ୍ତି।
ଉତ୍ତରପ୍ରଦେଶ ଉପମୁଖ୍ୟମନ୍ତ୍ରୀ କେଶବ ପ୍ରସାଦ ମୌର୍ଯ୍ୟ ରାଜ୍ୟର ଏସ୍ଟିଏଫ୍ ଫୋର୍ସକୁ ଶୁଭେଚ୍ଛା ଜଣାଇଛନ୍ତି। ଅସଦ ଏବଂ ତାଙ୍କ ସହଯୋଗୀ ପୋଲିସ ଉପରକୁ ଗୁଳି ଚଳାଇଥିଲେ। ଫଳରେ ପୋଲିସ କାର୍ଯ୍ୟାନୁଷ୍ଠାନ ଗ୍ରହଣ କରିଛି ବୋଲି ସେ କହିଛନ୍ତି।
