ଖୋର୍ଦ୍ଧା ଅଫିସ,୭ା୪: ଛତିଶଗଡ଼ର ବିଜାପୁର ଜିଲା ତଥା ମାଲକାନଗିରି ଜିଲା ସୀମାନ୍ତରେ ମାଓବାଦୀଙ୍କ ଆକ୍ରମଣରେ ୨୨ଜଣ ଯବାନ ଶହୀଦ ହୋଇଛନ୍ତି। ଶହୀଦ ଯବାନଙ୍କ ସ୍ମୃତିରେ ବିଭିନ୍ନ ମହଲରେ ଶୋକର ଛାୟା ଖେଳିଯାଇଛି। ଟାଙ୍ଗୀ ବ୍ଲକ ଅନ୍ତର୍ଗତ ସରାପାରି ଗ୍ରାମର ସୁଦାମ ଚରଣ ସାହୁ ଅଭିନବ ଉପାୟରେ ଶହୀଦ ଯବାନଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରିଛନ୍ତି। ଖୋର୍ଦ୍ଧା ସାମନ୍ତରାପୁର ଗଦା ପୋଖରୀରେ ବୁଡି ଯୋଗାସନ ସ୍ଥିତିିରେ ଦୁଇ ହାତରେ ଜାତୀୟ ପତାକା ଏବଂ ପେଟରେ ଦୀପ ରଖି ୩୦ମିନିଟ୍ରୁ ଊର୍ଦ୍ଧ୍ୱ ସମୟ ଧରି ପାଣିରେ ବୁଡି ରହି ଶହୀଦଙ୍କୁ ଶ୍ରଦ୍ଧାଞ୍ଜଳି ଦେଇଥିଲେ। ଏଥିସହ ଶହୀଦ ପରିବାରଙ୍କୁ ସମବେଦନା ଜଣାଇଛନ୍ତି। ସୁଦାମ କହିଛନ୍ତି, ଏହି ଘଟଣା ଅତ୍ୟନ୍ତ ମର୍ମାହତ କରିଛି। ଶହୀଦ ଯବାନଙ୍କୁ ଏଭଳି ଭାବେ ଶ୍ରଦ୍ଧାଞ୍ଜଳି ଦେବା ଲାଗି ମନସ୍ଥ କରିଥିଲି। ସେମାନଙ୍କ ଆତ୍ମାର ସଦ୍ଗତି କାମନା କରୁଛି।
ସେହିପରି ଅଖିଳ ଭାରତୀୟ ବିଦ୍ୟାର୍ଥୀ ପରିଷଦ ଖୋର୍ଦ୍ଧା ନଗର ପକ୍ଷରୁ ଖୋର୍ଦ୍ଧା ପିଏନ୍ କଲେଜ ନିକଟ ଏକ ମନ୍ଦିର ପରିସରରେ ପ୍ରଦୀପ ପ୍ରଜ୍ଜଳନ କରି ଶ୍ରଦ୍ଧାଞ୍ଜଳି ଅର୍ପଣ କରିଛନ୍ତି। ନଗର ସମ୍ପାଦକ ଲଳିତ ବଡ଼ଜେନା, ସହ ସମ୍ପାଦିକା ଦୀପ୍ତିମୟୀ ପ୍ରତିହାରୀ, ବିନୟ ପାତ୍ର, ପ୍ରିୟବ୍ରତ ପ୍ରଧାନ, ଶିବ ପ୍ରସାଦ ପଟ୍ଟନାୟକ, ଅଭିଷେକ ସେଠୀ, ଧନେଶ୍ୱର ସାମନ୍ତରାୟ, ଅନିଲ ପରିଡ଼ା ପ୍ରମୁଖ ଉପସ୍ଥିତ ଥିଲେ।