କଟକ ଅଫିସ, ୪।୮: ସ୍ବାଧୀନତା ଦିବସ ପାଳନ ପାଇଁ ସହରରେ ବିଭିନ୍ନ ଦୋକାନରେ ବିକ୍ରି ହେଉଛି ନାନାରକମର ସାମଗ୍ରୀ। ମୁଣ୍ଡରେ ମାରିବା ବ୍ୟାଣ୍ଡ ଠାରୁ ଆରମ୍ଭ କରି ତ୍ରିରଙ୍ଗା ଟି-ଶାର୍ଟ, ବ୍ୟାଜ୍, ଘର ସଜା ସାମଗ୍ରୀ, ତ୍ରିରଙ୍ଗା ମାଳ, ତ୍ରିରଙ୍ଗା ପଗଡି, ବିଭିନ୍ନ ଗିଫ୍ଟ ଆଇଟମ ଦେଖିବାକୁ ମିଳିଛି । ତେବେ କଟକ ଚୌଧୁରୀ ବଜାର ଅଞ୍ଚଳରେ ଦୀର୍ଘ ୬୫ ବର୍ଷ ଧରି ଚାଲିଆସିଥିବା ଖଦି ଭବନରେ କିନ୍ତୁ ଦେଖିବାକୁ ମିଳିଛି କିଛି ସ୍ବତନ୍ତ୍ରତା। ବର୍ତ୍ତମାନ ସମୟରେ ବିିଭିନ୍ନ ସାମଗ୍ରୀ ଦର ଆକାଶ ଛୁଆଁ ହୋଇଥିବାବେଳେ ଏଠାରେ ଜାତୀୟ ପତାକା ମାତ୍ର ୮୦ ପଇସା ମୂଲ୍ୟରେ ମିଳୁଛି। ଚଳିତ ବର୍ଷ ଦେଶବ୍ୟାପୀ ସ୍ବାଧୀନତାର ୭୫ ବର୍ଷ ପାଳନ କରାଯାଉଥିବାରୁ ଏଠାରେ ଜାତୀୟ ପତାକା ପାଇଁ ସ୍ବତନ୍ତ୍ର ମୂଲ୍ୟ ରଖାଯାଇଛି। ୧୯୫୭ରେ ଆରମ୍ଭ ହୋଇଥିବା ଏହି ଦୋକାନ ବର୍ତ୍ତମାନ ତୃତୀୟ ପିଢି ସମ୍ଭାଳୁଛନ୍ତି। ପ୍ରଥମେ ସ୍ବର୍ଗତ ରବୀନ୍ଦ୍ରନାଥ ମହାନ୍ତି ପରେ ଦିଲୀପ ମହାନ୍ତି ଓ ବର୍ତ୍ତମାନ ଅମିତ ମହାନ୍ତି ଏହାକୁ ଚଳାଇ ଆସିଛନ୍ତି । ପ୍ରତିବର୍ଷ ସ୍ବାଧୀନତା ଦିବସ ଏବଂ ସାଧାରଣତନ୍ତ୍ର ଦିବସରେ ଏଠାରେ ଲୋକଙ୍କ ବେଶ୍ ଗହଳି ଦେଖିବାକୁ ମିଳେ। ବର୍ତ୍ତମାନର ଟ୍ରେଣ୍ଡିଂ ଅନୁଯାୟୀ ବିଭିନ୍ନ ପ୍ରକାର ସାମଗ୍ରୀ ଏଠାରେ ମିଳୁଛି। ଜାତୀୟ ପତାକାର କୌଣସି ଜାତି ଧର୍ମ ବର୍ଣ୍ଣ ନାହିଁ । ପିଲାଙ୍କ ଠାରୁ ଆରମ୍ଭ କରି ବୃଦ୍ଧ ପର୍ଯ୍ୟନ୍ତ ଯେପରି ଧନୀଗରିବ ସମସ୍ତେ ଏହାକୁ ଉଡ଼ାଇ ପାରିବେ ସେପରି ସାମଗ୍ରୀ ରଖି ବିକ୍ରି କରୁଛୁ । ୮୦ ପଇସାରୁ ଆରମ୍ଭ କରି ୨୮ଶହ ଟଙ୍କା ପର୍ଯ୍ୟନ୍ତ ତ୍ରିରଙ୍ଗା ରହିଛି। ଏଥିସହ ଲୋକଙ୍କ ଚାହିଦା ଅନୁଯାୟୀ ମଧ୍ୟ ବିଭିନ୍ନ ସାମଗ୍ରୀ ରହିଛି ବୋଲି ଏହାର ମାଲିକ ଦିଲୀପ କହିଛନ୍ତି।