ଚେନ୍ନାଇ/ନୂଆଦିଲ୍ଲୀ,୧୨ା୧୧: ରାଜୀବ ଗାନ୍ଧୀଙ୍କ ୬ ହତ୍ୟାକାରୀଙ୍କୁ ମୁକ୍ତ କରିବା ପାଇଁ ସୁପ୍ରିମକୋର୍ଟ ଦେଇଥିବା ରାୟକୁ ତାମିଲନାଡୁ ମୁଖ୍ୟମନ୍ତ୍ରୀ ଏମ୍.କେ. ଷ୍ଟାଲିନ୍ ସ୍ବାଗତ କରିଛନ୍ତି। ଡିଏମ୍କେ ମୁଖ୍ୟ ଷ୍ଟାଲିନ୍ କହିଛନ୍ତି, ଏ.ଜି. ପେରାରିଭଲନ୍ଙ୍କ ପରେ ସୁପ୍ରିମକୋର୍ଟ ଅନ୍ୟ ୬ ଜଣଙ୍କୁ ଛାଡ଼ିଦେଇଛନ୍ତି। ଦୀର୍ଘ ଆଇନଗତ ଲଢ଼େଇ ଏବଂ ମାନବିକତାର ବିଜୟ ହୋଇଛି। ଏହା ହେଉଛି ଗଣତାନ୍ତ୍ରିକ ସିଦ୍ଧାନ୍ତର ବିଜୟ। ସରକାରଙ୍କ ନିଷ୍ପତ୍ତିଗୁଡ଼ିକୁ ରାଜ୍ୟପାଳ ଆଲମାରି ଥାକରେ ରଖିବା ଅନୁଚିତ ବୋଲି ଷ୍ଟାଲିନ୍ ଟୁଇଟ୍ କରିଛନ୍ତି। ସେହିପରି ବିରୋଧୀ ଦଳ ଏଆଇଏଡିଏମ୍କେ ମଧ୍ୟ ଏହାକୁ ସ୍ବାଗତ କରିଛି। ୨୦୧୮ରେ ତତ୍କାଳୀନ ଏଆଇଏଡିଏମ୍କେ ସରକାର ଦୋଷୀମାନଙ୍କ ମୁକ୍ତି ସକାଶେ ରାଜ୍ୟପାଳ ବନଓ୍ବାରିଲାଲ ପୁରୋହିତଙ୍କୁ ସୁପାରିସ କରିଥିଲେ। ଗତବର୍ଷ ଷ୍ଟାଲିନ୍ କ୍ଷମତାସୀନ ହେବା ପରେ ସେମାନଙ୍କ ମୁକ୍ତି ପାଇଁ ତତ୍କାଳୀନ ରାଷ୍ଟ୍ରପତି ରାମନାଥ କୋବିନ୍ଦ ଓ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ପତ୍ର ଲେଖିଥିଲେ। ଏଥିସହ ସେମାନଙ୍କ ଆଇନଗତ ଲଢ଼େଇରେ ସବୁ ପ୍ରକାର ସହଯୋଗ କରିଥିଲେ ବୋଲି ଷ୍ଟାଲିନ୍ କହିଛନ୍ତି। ଅନ୍ୟପକ୍ଷେ ଏଆଇଏଡିଏମ୍କେ ଏହି ମୁକ୍ତି ପାଇଁ ଶ୍ରେୟ ନେବାକୁ ଉଦ୍ୟମ କରିଛି। ଏହା ଏଆଇଏଡିଏମ୍କେ ପାଇଁ ଏକ ବିଜୟ ବୋଲି ବିରୋଧୀ ଦଳ ପକ୍ଷରୁ କୁହାଯାଇଛି।
