ବାଙ୍ଗିରିପୋଷି,୨୨ା୧୨(ଡି.ଏନ୍.ଏ): ମୟୂରଭଞ୍ଜ ଜିଲା ବାଙ୍ଗିରିପୋଷି ଥାନା ଅଧୀନ ଭାଲୁପାହାଡ଼ି ଗ୍ରାମ ନିକଟସ୍ଥ ୪୯ ନମ୍ବର ଜାତୀୟ ରାଜପଥ କଡ଼ରୁ ଗତ ନଭେମ୍ବର ୨୧ରେ ବିହାର ରାଜ୍ୟର ସାରଣ ଅରୁଣ ରାୟ ନାମକ ଜଣେ ଟ୍ରକ୍ ଡ୍ରାଇଭରଙ୍କ ମୃତଦେହ ଜବତ ଘଟଣାର ପର୍ଦ୍ଦାଫାଶ କରିଛି ପୋଲିସ। ଟଙ୍କା ପଇସାକୁ ନେଇ ବଚସାରୁ ଟ୍ରକ୍ର ହେଲପର ହତ୍ୟାକାଣ୍ଡ ଘଟାଇ ମୃତଦେହକୁ ରାସ୍ତା କଡ଼ରେ ଫିଙ୍ଗି ଦେଇଥିଲେ। ଏନେଇ ଏକ ହତ୍ୟା ମାମଲା(ନଂ.୨୬୮/୨୧) ରୁଜୁ ହୋଇଥିବା ବେଳେ ମାସେ ପରେ ଅଭିଯୁକ୍ତ ଅମର ବାହାଦୁର ଯାଦବଙ୍କୁ ଗିରଫ କରାଯାଇଛି। ତାଙ୍କ ଘର ଉତ୍ତରପ୍ରଦେଶର ବାଲିଆ ଜିଲା ଅଧୀନ ଇଫିରାମପତି ଗ୍ରାମରେ। ବୁଧବାର ବାଙ୍ଗିରିପୋଷି ଥାନାରେ ଆୟୋଜିତ ଏକ ଖବରଦାତା ସମ୍ମିଳନୀରେ ଏସ୍ଡିପିଓ କେ.କେ. ହରିପ୍ରସାଦ ଏହି ସୂଚନା ଦେଇଛନ୍ତି।
ଘଟଣା ଦିନ ଟ୍ରକ ମଧ୍ୟରେ ଟଙ୍କା ପଇସାକୁ ନେଇ ଉଭୟଙ୍କ ମଧ୍ୟରେ ବଚସା ହୋଇଥିଲା। ଏଥିରେ ଅମର ଉତ୍କ୍ଷୀପ୍ତ ହୋଇ ଏକ ଲୁହାରଡ୍ରେ ଅରୁଣଙ୍କ ମୁଣ୍ଡକୁ ଜୋରରେ ଆଘାତ ଦେବାରୁ ଟ୍ରକରେ ହିଁ ସେ ଟଳି ପଡ଼ିଥିଲେ। କିଛିବାଟ ଆସିବା ପରେ ଏକ ଦଉଡ଼ିରେ ମୃତଦେହକୁ ବାନ୍ଧି ରାସ୍ତା ପାର୍ଶ୍ୱକୁ ଫିଙ୍ଗି ଅମର ଟ୍ରକ୍ ନେଇ ପଳାଇଥିଲେ। ପ୍ରାଥମିକ ତଦନ୍ତରୁ ଏହା ଏକ ହତ୍ୟାକାଣ୍ଡ ବୋଲି ଜାଣିବାକୁ ପାଇ ବାଙ୍ଗିରିପୋଷି ଥାନା ଅଧିକାରୀ ସଞ୍ଜୟ ପରିଡ଼ା ଏବଂ ତଦନ୍ତକାରୀ ଟିମ୍ ଅନୁସନ୍ଧାନ ଚଳାଇ ହତ୍ୟାକାରୀଙ୍କୁୁ ଧରିବାରେ ସଫଳ ହୋଇଛନ୍ତି।
