ବାଙ୍ଗିରିପୋଷି,୨୫ା୮(ଡି.ଏନ.ଏ.): ମୟୂରଭଞ୍ଜ ଜିଲା ବାଙ୍ଗିରିପୋଷି ବନାଞ୍ଚଳ ଅଧୀନ ଅଗ୍ନିଶମ ବିଭାଗ ରାସ୍ତାରୁ ଏକ କେନ୍ଦୁପତ୍ର ବୋଝେଇ ଟ୍ରକ୍କୁ ବନ ବିଭାଗ ଜବତ କରିଛି। ଏହି ଘଟଣାରେ ଟ୍ରକର ଚାଳକ ଝାଡ଼ଖଣ୍ଡ ରାଜ୍ୟ ଗିରିଡ଼ିହି ଜିଲା ଅନ୍ତର୍ଗତ ଗୌରାହଣ୍ଡ ଗ୍ରାମର ନରେଶ କୁମାର ରଜତ ଓ ଖଲାସି ପଶ୍ଚିମବଙ୍ଗ ମେଦିନିପୁର ଜିଲା ଅନ୍ତର୍ଗତ ନନାକୋରୀ ଗ୍ରାମର ସୈଇଫୁଲ ଖାଁଙ୍କୁ ପୋଲିସ ଗିରଫ କରିଛି। ଜବତ କେନ୍ଦୁପତ୍ରର ଆନୁମାନିକ ମୂଲ୍ୟ ପ୍ରାୟ ୫ ଲକ୍ଷ ଟଙ୍କାରୁ ଅଧିକ ହେବ ବୋଲି ଭାରପ୍ରାପ୍ତ ବନାଞ୍ଚଳ ଅଧିକାରୀ ଶୈଳେନ୍ଦ୍ର କୁମାର ଦାସ କହିଛନ୍ତି।
କେନ୍ଦୁପତ୍ର ଚାଲାଣ ସମ୍ପର୍କରେ ବିଶେଷ ସୂତ୍ରରୁ ଖବର ପାଇ ବାରିପଦା ବନଖଣ୍ଡ ଅଧିକାରୀଙ୍କ ନିର୍ଦ୍ଦେଶରେ ବନ ବିଭାଗ କର୍ମଚାରୀମାନେ ଦ୍ୱାରଶୁଣି ଘାଟିରେ ଜଗି ରହିଥିଲେ ା ବନ ବିଭାଗର କର୍ମଚାରୀଙ୍କୁ ଦେଖି ଟ୍ରକଟି କେନ୍ଦୁପତ୍ର ନେଇ ପଳାଇ ଯିବାକୁ ଉଦ୍ୟମ କରୁଥିବା ବେଳେ ଭାରପ୍ରାପ୍ତ ବନାଞ୍ଚଳ ଅଧିକାରୀ ଦାସଙ୍କ ନେତୃତ୍ୱରେ ଏହାକୁ ଜବତ କରାଯାଇଥିଲା। ବନପାଳ ଲକ୍ଷ୍ମୀକାନ୍ତ ବେହେରା, ବନରକ୍ଷୀ ରଜନୀକାନ୍ତ ଚୌଧୁରୀ, ଗୌତମ ସିଂ, ମଳୟ କୁମାର ମହାନ୍ତ, ଚାଳକ ତପନ ବେହେରା ଓ ସବୁଜ ବାହିନୀ କର୍ମଚାରୀ ପ୍ରମୁଖ ଚଢାଉରେ ସାମିଲ ଥିଲେ।