ଓଟ୍ଟାଓ୍ବା,୨୮ା୯(ପି.ଟି.):ଦ୍ୱିତୀୟ ବିଶ୍ୱଯୁଦ୍ଧ ବେଳେ ନାଜି ସେନା ପାଇଁ ଲଢ଼େଇ କରିଥିବା ବର୍ଷୀୟାନ ସୈନ୍ୟଙ୍କୁ କାନାଡା ପାର୍ଲାମେଣ୍ଟରେ ସମ୍ମାନିତ କରାଯିବାକୁ ବିଶ୍ୱବ୍ୟାପୀ ଏହାକୁ ନିନ୍ଦା କରାଯିବା ପରେ କାନାଡା ପ୍ରଧାନମନ୍ତ୍ରୀ ଜଷ୍ଟିନ୍ ଟ୍ରୁଡୋ ଏଥିପାଇଁ କ୍ଷମା ମାଗିଛନ୍ତି। କାନାଡା ଇତିହାସରେ ଏହା ସବୁଠୁ ବଡ଼ କୂଟନୈତିକ ଲଜ୍ଜା ବୋଲି ବିରୋଧୀ ଦଳ କହିଥିଲେ।
ଖଲିସ୍ତାନୀ ବିଚ୍ଛିନ୍ନତାବାଦୀ ନେତାଙ୍କ ହତ୍ୟାରେ ଭାରତ ସମ୍ପୃକ୍ତ ବୋଲି ଟ୍ରୁଡୋ ଅଭିଯୋଗ ଆଣି ନୂଆଦିଲ୍ଲୀ ସହ କୂଟନୈତିକ ତିକ୍ତତା ବଢ଼ାଇଥିବାବେଳେ ଗତ ଶୁକ୍ରବାର କାନାଡା ପାର୍ଲାମେଣ୍ଟରେ ୟୁକ୍ରେନ୍ ରାଷ୍ଟ୍ରପତି ଭୋଲୋଡିମିର୍ ଜେଲେନ୍ସ୍କିଙ୍କ ଉପସ୍ଥିତିରେ ପୂର୍ବତନ ନାଜି ସୈନ୍ୟ ୟାରୋସ୍ଲାଭ୍ ହୁଙ୍କାଙ୍କୁ ସମ୍ମାନିତ କରାଯାଇଥିଲା। ଏଥିପାଇଁ ଦାୟୀ ବାଚସ୍ପତି ଆନ୍ଥୋନି ରୋଟା ମଙ୍ଗଳବାର ଇସ୍ତଫା ଦେଇଥିଲେ।