ଓ୍ବାଶିଂଟନ,୪ା୧୧: ଆମେରିକାର ପରବର୍ତ୍ତୀ ରାଷ୍ଟ୍ରପତି କିଏ ହେବ ସେନେଇ ସମଗ୍ର ବିଶ୍ୱବାସୀଙ୍କ ନଜର ରହିଛି। ଆମେରିକାରେ ରାଷ୍ଟ୍ରପତି ହେବା ପାଇଁ ମୋଟ୍ ୨୭୦ ଇଲେକ୍ଟୋରାଲ ଭୋଟ୍ ଆବଶ୍ୟକ। ତେବେ ଏନେଇ ଡୋନାଲ୍ଡ ଟ୍ରମ୍ପ ଏବଂ ଜୋ ବାଇଡେନଙ୍କ ମଧ୍ୟରେ କଡ଼ା ଟକ୍କର ଚାଲିଛି। ସନ୍ଧ୍ୟା ୫ଟା ସୁଦ୍ଧା ଜୋ ବାଇଡେନ ୨୩୮ଟି ଇଲେକ୍ଟୋରାଲ ଭୋଟ୍ ପାଇଥିବା ବେଳେ ଟ୍ରମ୍ପ ୨୧୩ଟି ଇଲେକ୍ଟୋରାଲ ଭୋଟ୍ ପାଇଛନ୍ତି।
ଏକ ରିପୋର୍ଟ ଅନୁଯାୟୀ, ପ୍ରାଥମିକ ପର୍ଯ୍ୟାୟରେ ଡେମୋକ୍ରାଟିକ୍ ପ୍ରାର୍ଥୀ ଜୋ ବାଇଡେନ ଟ୍ରମ୍ପଙ୍କ ଠାରୁ ବହୁ ଆଗରେ ରହିଥିଲେ। କିନ୍ତୁ ପରେ ଏହି ସଂଖ୍ୟାରେ ପରିବର୍ତ୍ତନ ଆସିଛି । ଟ୍ରମ୍ପ ଅଲବାମା, ମିସିସିପି, ଓକଲାହାମା ଏବଂ ଟେନେସିରେ ବିଜୟୀ ହୋଇଛନ୍ତି ।
ସେହିପରି ବାଇଡେନ କନେକ୍ଟିକଟ, ଡେଲାବେୟର, ଇଲିନୋଇସ, ମେରିଲାଣ୍ଡ, ମାସାଚୁସେଟସ, ନ୍ୟୁଜର୍ସି ଏବଂ ରୋଡ୍ ଆଇଲାଣ୍ଡ ରାଜ୍ୟରେ ବିଜୟୀ ହୋଇଛନ୍ତି। କେଂଟୁକି ଏବଂ ଇଣ୍ଡିଆନାରେ ଟ୍ରମ୍ପ ବିଜୟୀ ହୋଇଛନ୍ତି। ଆରକାନାସରେ ଟ୍ରମ୍ପ, ନ୍ୟୁୟର୍କରେ ଜୋ ବାଇଡେନ ବିଜୟୀ ହୋଇଛନ୍ତି। ଏଥିସହ ଅନେକ ନାଗରିକ ମେଲ ଇନ୍ ବାଲାଟ ଓ ପୋଷ୍ଟାଲ ମାଧ୍ୟମରେ ଭୋଟ୍ ଦେଇଛନ୍ତି। ଏହାର ଗଣତି ବର୍ତ୍ତମାନ ସୁଦ୍ଧା ସରିନାହିଁ। ଏହାକୁ ମିଶାଇଲେ ଚୂଡ଼ାନ୍ତ ଫଳାଫଳ ଆସିବ ବୋଲି କୁହାଯାଉଛି।