ଓ୍ବାଶିଂଟନ,୧୫ା୧୧: କେବଳ ଭାରତ ନୁହେଁ, ବିଦେଶରେ ମଧ୍ୟ ପାଳନ କରାଯାଇଛି ଆଲୋକର ପର୍ବ ଦୀପାବଳି। ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏବଂ ତାଙ୍କ ସ୍ତ୍ରୀ ମେଲାନିୟା ହ୍ବାଇଟ୍ହାଉସ୍ରେ ଦୀପାବଳି ଉତ୍ସବ ପାଳନ କରିଛନ୍ତି। ଶନିବାର ଦୀପାବଳି ଅବସରରେ ଟ୍ରମ୍ପ ଦମ୍ପତି ଦୀପ ଜଳାଇବା ସହ ସମଗ୍ର ବିଶ୍ୱବାସୀଙ୍କୁ ଶୁଭେଚ୍ଛା ଜଣାଇଥିଲେ।
ଟ୍ରମ୍ପ ଏବଂ ମେଲାନିୟା ସମସ୍ତଙ୍କୁ ଆଲୋକର ପର୍ବ ଦୀପାବଳି ଅବସରରେ ଶୁଭକାମନା ଜଣାଇଛନ୍ତି। ସେ କହିଛନ୍ତି, ଏହି ଆନନ୍ଦର ପର୍ବରେ ବନ୍ଧୁ, ପଡ଼ୋଶୀ ତଥା ପ୍ରିୟଜନମାନେ ଏକାଠି ହୁଅନ୍ତି। ଏହା ବିଜୟର ଉତ୍ସବ। ଅନ୍ଧକାର ଉପରେ ଆଲୋକ ଏବଂ ଅଜ୍ଞାନତା ଉପରେ ଜ୍ଞାନ ବିଜୟ ହୋଇଥାଏ ବୋଲି ବିଶ୍ୱାସ ରହିଛି। ଏହି ପର୍ବରେ ଘରେ, ଅଫିସ ଏବଂ ପୂଜାସ୍ଥଳରେ ଦୀପ ପ୍ରଜ୍ୱଳନ କରାଯାଇଥାଏ। ଯାହା ଆମ ଜୀବନର ବିଶ୍ୱାସ ଓ ପରମ୍ପରାର ମୂଳ ଅଟେ ବୋଲି ଟ୍ରମ୍ପ ଦମ୍ପତି କହିଛନ୍ତି।
ଟ୍ରମ୍ପ୍ କହିଛନ୍ତିି, ଚଳିତବର୍ଷ ଆମ ବନ୍ଧୁ ଏବଂ ପରିବାରକୁ ସମର୍ଥନ ମିଳିଥିବାରୁ ଆମେ ଧନ୍ୟବାଦ ଦେଉଛୁ। ସମଗ୍ର ବିଶ୍ୱବାସୀଙ୍କ ପାଇଁ ଖୁସି କାମନା କରୁଛୁ। ସମସ୍ତଙ୍କୁ ଦୀପାବଳିର ଶୁଭେଚ୍ଛା ଜଣାଇବା ସହ ଏକ ନୂଆ ଆରମ୍ଭର କାମନା କରୁଛୁ ବୋଲି ଟ୍ରମ୍ପ୍ କହିଛନ୍ତି।