ଓ୍ବାଶିଂଟନ୍,୧୬।୩: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ରେଡ୍ ସି ଜାହାଜ ଉପରେ ଆକ୍ରମଣର ପ୍ରତିଶୋଧ ନେବା ପାଇଁ ୟେମେନର ଇରାନ ସମର୍ଥିତ ହୁଥି ବିଦ୍ରୋହୀଙ୍କ ବିରୋଧରେ ଏକ ବିଶାଳ ସାମରିକ ଅଭିଯାନ ଆରମ୍ଭ କରିଛନ୍ତି। ଯେଉଁଥିରେ ଅତି କମରେ 19 ଜଣ ଲୋକ ପ୍ରାଣ ହରାଇଛନ୍ତି। ଟ୍ରମ୍ପ ଚେତାବନୀ ଦେଇଛନ୍ତି ଯେ ଯଦି ହୁଥି ବିଦ୍ରୋହୀମାନେ ଆକ୍ରମଣ ଜାରି ରଖନ୍ତି, ତେବେ ସେମାନଙ୍କର ପରିସ୍ଥିତି ନର୍କଠାରୁ ମଧ୍ୟ ଖରାପ ହୋଇଯିବ।
ସେ ଇରାନକୁ ତୁରନ୍ତ ହୁଥିମାନଙ୍କୁ ସମର୍ଥନ ବନ୍ଦ କରିବାକୁ ଚେତାବନୀ ମଧ୍ୟ ଦେଇଛନ୍ତି। ଟ୍ରମ୍ପ ସ୍ପଷ୍ଟ କରିଦେଇଛନ୍ତି, ‘’ଯଦି ଇରାନ ଆମେରିକାକୁ ଧମକ ଦିଏ, ତେବେ ଆମେରିକା କୌଣସି ପ୍ରକାରର ନରମ ସ୍ବଭାବ ଦେଖାଇବ ନାହିଁ।’
ରଏଟର୍ସର ଏକ ରିପୋର୍ଟ ଅନୁଯାୟୀ, ଏହି ଆକ୍ରମଣ ବିଷୟରେ ସୂଚନା ଦେଉଥିବା ଜଣେ ଅଧିକାରୀ କହିଛନ୍ତି ଯେ ହୁଏତ ଏହି ଆକ୍ରମଣ ସପ୍ତାହ ପର୍ଯ୍ୟନ୍ତ ଜାରି ରହିପାରେ। ଉଲ୍ଲେଖନୀୟ ଯେ ଜାନୁଆରୀରେ ଟ୍ରମ୍ପ ରାଷ୍ଟ୍ରପତି ପଦ ଗ୍ରହଣ କରିବା ପରେ ମଧ୍ୟପ୍ରାଚ୍ୟରେ ଆମେରିକୀୟ ସେନା ଦ୍ୱାରା କରାଯାଇଥିବା ଏହା ସବୁଠାରୁ ବଡ଼ ସାମରିକ ଆକ୍ରମଣ। ଏହି ଆକ୍ରମଣଗୁଡ଼ିକ ଏପରି ସମୟରେ ହେଉଛି ଯେତେବେଳେ ଆମେରିକା ତେହେରାନ ଉପରେ ଆର୍ଥିକ ଚାପ ବୃଦ୍ଧି କରୁଛି ଏବଂ ଏହାର ପରମାଣୁ କାର୍ଯ୍ୟକ୍ରମ ଉପରେ ଆଲୋଚନା କରିବାକୁ ରାଜି କରାଇବାକୁ ଚେଷ୍ଟା କରୁଛି।
